در مدح و شهادت حضرت صادق علیه السلام
.
.
.
مرحوم حاج حیدر خسروشاهی ( حزین )
.
.
گویول مصمّم اولوب گر عنایت ایلسه خالق
اولام مدیحه سرای امام جعفر صادق
.
اگر چه فوق مدیح و ثنادی شأن و جلالی
گلور جلالت و شأنی تصوّراتیمه فائق
.
نه تک من ایلیه بولمم ائدم او سروری تعریف
ادای حقّینه عاجزدی فکر کلّ خلائق
.
اودور سپهر جلال و شرفده نیّر تابان
مدام نیّر افلاک پای بوسنه شائق
.
وروب او سرور دینون علوّ شان و جلالی
مقام قرب خداوند لا مکاندا سُرادق
.
امام مفترض الطاعه میر ملک ولایت
تمام دردلره بیر طبیب آگه و حاذق
.
مقام و منزلت علمنه هامی علمانون
وار اعترافی مخالف اولا و یا که موافق
.
اودور امان بحقّ و رئیس مذهب شیعه
وجودی مخزن علم الاه و کنزه حقایق
.
پیمبرین زحماتین ویروردی ظلم الی باده
اولوردی دستخوش حادثات جمله سوابق
.
درخت نحس ضلالت دوباره ریشه سالیردی
اولوردی جهلده امّت گئچن زمانلارا لاحق
.
ائمه نی که قویموردی غصب حق ائلینلر
صراحتاً ائده لر نشر علم و کشف حقایق
.
اودم که ظالمی مشغول ائدوبدی ظالمه الله
گوروب امان مبین نشر حقّه وقتی مطابق
.
بلی امام موظّفدی حفظ دین مُبینه
اودور حقیقت ائدر هر زماندا باطلی زاهق
.
او باغبان گلستان دین سالوب اله فرصت
علوم گل لرینی نشر ائدوب یاراتدی خدائق
.
ویروب همان او حدائقده پرورش نچه ایل لر
علوم شرعده گل لر چه نسترن چه شقایق
.
تمام علملرین کسبنه زمینه یاراتدی
تاپوب مراتب علمینی صاحبان علائق
.
تاپوبلا مکتب صادقده پرورش او زماندا
مبلّغین درخشان روان و فاضل و لایق
.
نه تک فروغ هدایت سپهر یثربی دوتدی
نه تک او نور ولادن منّور اولدی مناطق
.
او آفتاب هدایت فروغی دوتدی جهانی
شعاع علمله دولدی مغاربیله مشارق
.
گیدوردی ایلیه صحن جهانی گلشن دانش
هزار حیف ولی قویمادی گروه منافق
.
بناحق اؤزلرینی پیشوای خلق بیلنلر
بظاهر آدلاری مسلم و لیک اؤزلری فاسق
.
آییردیلار وطنیندن ائلیندن اول شه دینی
بیان حقه امام بحق اولانمادی ناطق
.
ائدوبله روحونی آزرده،جسم پاکینی خسته
اولوبدی ابر ستم پرده دار جلوۀ شارق
.
مه سپهر فضایل محاق جبره سالیندی
که بلکه ایلیه لر نشر حقّه سدّ طرائق
.
ولیک بولمدیلر گون بولوتدا دائمی قالماز
اولار حوادث ایّام حق و باطله فارق
.
ویروبله زهر جفا عاقبت امام هُمامه
اولوب او زهرله اجداد طاهریننه لاحق
.
« #حزین»، نه حاله قالار جاهله اسیر اولا عالم
بئله دیرله که مین ایل اولار گوزونده دقائق
.
#صادقیه_مدح
#صادقیه_شهادت
#گویول_مصمم_اولوب_گر_عنایت_ایلسه_خالق
#حزین_خسروشاهی
#ترکی
#زبدةالاشعار
نظر دهید