یاران دوشوب یولا گینه بیر کاروان گیدر #اربعین_شهاب_تبریزی

اربعین
.
#زبدةالاشعار
.
: @nohe_torki
.
مرحوم شهاب تبریزی
.
یاران دوشوب یولا گینه بیر کاروان گیدر
اندوه و درد و غم اونیلن هسچنان گیدر
.
شور نوا و غلغله افلاکی دولدوروب
اوج سپهره پایه به پایه فغان گیدر
.
گویا یتوبدی مژدۀ فصل بهاریدن
گلشن سراغ ایدوب پر آچوب بلبلان گیدر
.
فرصت تاپوبدی سلسلۀ عشق عُسردن
معشوق کشف ایتمگه راز نهان گیدر
.
گویا حسین عیالی چخوب شام شومدن
کرب و بلا دیارینه اولموش روان گیدر
.
دوشموش قباقه حضرت زین العبادی گور
چاوش وار سسلنوری زایران گیدر
.
اهل حرم گیدر یولی اما فغانیلن
حفظ ایلیویدی هر بیری بیر داستان گیدر
.
زینب دیرکه یولّاریوا من فدا حسین
بُلَّم مزاریوه یتیشینجه بو جان گیدر
.
دورت مین یارالی پیرهنی باغرینا باسوب
قارداش مزارینه آپارور ارمغان گیدر
.
لیلا باسوبدی سینیه اکبر عمامه سین
ایلوب دمادم اسمینی ورد زبان گیدر
.
هر دم دیر که ئولسون آنان ای جوان اوغول
سنسیز مدینیه نجه لیلا آنان گیدر
.
کلثوم زار آلوب اله عباس بیدقین
أم البنینه ویرمگه نام و نشان گیدر
.
داماد عروسی باشه سالوب معجر سیاه
زلفین سفید باغورین ایدوب لخته قان گیدر
.
زخم خدنگ حلقنی احوال دوتماقا
اصغر آناسی قامتین ایلوب کمان گیدر
.
.
منزل بمنزل ایتدیله طیّ مراحله
کرب و بلا دیارینه چون یتدی قافله
.
.
کیچدی نوای اهل حرم نُه قُبابدن
طاقت کسیلدی زینب علیا جنابدن
.
فرمایش ایتدی سید سجاد دل ملول
ایتسون بویرده قافلۀ درد و غم نزول
.
کرب و بلادی اهلحرم جمله بلدولر
عورت اوشاق کجاوه لریندن توکولدولر
.
آخدی سرشک زینب کبری عذارینه
سالدی اوزین فغانیله قارداش مزارینه
.
چون توزلی گوردی گوشه بگوشه مزارینی
سیلدی سوپوردی زلفیله گرد و غبارینی
.
قویدی ایاقینه یوزینی چکدی بیرصدا
عرض ایتدی توزلی قبریوه قارداش باجون فدا
.
دور شامدن مزاریوه بیر کاروان گلوب
پوزقون گلوب شکسته گلوب باغریقان گلوب
.
چکدیم گیجه گونوز غم و درد و ملالوی
گتدیم دیار شامدن آخر عیالوی
.
مدّتدى ویرمیوبدیله بودم امان منه
قارداش حسین دویونجا عزادار اولام سنه
.
فرصتدی ایمدیکه ایدرم شیون آغلارام
ناله چکوب حرملرون آغلار من آغلارام
.
شامه گیدنده من سنه بیر آغلیانمادیم
مرهم سالوب یارالاریوی باغلیانمادیم
.
حالوندن ایله ایمدی حسین حالی زینبون
نه قِسمیلندی یارهسی جسم مخضّبون
.
ششگوشه قبردن یرى وار دور صدا گله
ناله آنام باجی بو قَدَر ایتمه صبر ایله
.
یاخشی اولوبدی هر نه که پیکر یاراسی وار
لیکن اورکده حشرہ تک اکبر یاراسی وار
.
اکبر خیالی لیلینی حیران دولاندروب
غم شعله سینده جانینی یکباره یاندروب
.
بیحسّ سالدى جسمینی اکبر ایاقینه
گویا باخان دیردی یتوب جان دوداقینه
.
هوشه گلوب دوباره دیدی وای جوان اوغول
چخماز بوجان عجیبدور ئولمز آنان اوغول
.
راحت منه حیاتدن ایمدی مماتدور
ئولسون آنان زمانه ده بونه حیاتدور
.
سنسیز من آرزوی وطن ایتمرم علی
بیرده مدینیه قویالار گیتمرم علی
.
قالام یانوندا هر گیجه هر گوندوز آغلارام
ناله چکوب ئولونجه گیجه گوندوز آغلارام
.
اولّام مجاورون على آلّام کناروی
جاروب ایدوب بو زلفی سوپورّم مزاروی
.
قاسم خیالی فاطمه نی ایتدی دل کباب
یتدی مزاری اوسته سپوب اشکیلن گلاب
.
بلبل تک ایلیوب گلینه خاریدن گله
عشاق ایدر بو رسمدور اغیاریدن گله
.
عرض ایلدی دیمم که عروسم عزیزدوم
عالمده من عم اوغلی وفالی کنیزدوم
.
بلمه عم اوغلی جان او قدر بیوفا منی
سندن آیردی ظلمیلن اهل جفا منی
.
یوخسا ئولونجه ایتمزیدیم ترک کوی وصل
عاشق اولان همیشه ایدر آرزوی وصل
.
اولدوم اسیر گیتدیم او ویرانه شامه من
صد شکر ئولمدیم گینه گلدیم سلامه من
.
گون قورتولوب بوگون چخا جانیم عم اوغلی کاش
راحت اولوب قویام سنیله بیر مزاره باش
.
سمت حجازه بیرده یوزوم گلموری گیدم
هر کسی گوروب دیر که عروس اولدی بد قدم
.
کلثوم باده ویردی او صحراده صبرینی
گزدی دولاندی تاپدی علمدار قبرینی
.
بیر آه سوزناکیله دنیانی یاندروب
غملر آناسی زینبه بیر یوز دولاندروب
.
سسلندی دورما گل باجی ماتم قوراخ گیداخ
عباسه بر عزا دوتوب اوندان دوراخ گیداخ
.
اهل حرم یغلدی او قبرون کنارینه
قول سالدیلار ایکی باجی قارداش مزارینه
.
زینب دیردی قبروه قربان اولوم اویان
دور کربلایه گلدی دوباره بو کاروان
.
بیچاره فاطمه باخوب آغلاردی های های
گاهی عمو دیردی گهی وای عم اوغلی وای
.
لیلا ووراردی باشنه کلثوم سینیه
قارداش دیردی دور گیدروخ بیز مدینه
.
زینب دیردی دور قباقمجا علم گوتور
یبرده بلا کشیده باجون یثربه یتور
.
باب المراد اسمی شهابا گلوب دله
گیچمه داخی کلامی بو اسمیله ختم ایله
.
مقبول ایدر بو خدمتون اول جود معدنی
ایستر او غملو روضیه حضّاریلن سنی
.
.
#اربعین_شهاب_تبریزی
#یاران_دوشوب_یولا_گینه_بیر_کاروان_گیدر
#ترکی
.
#زبدةالاشعار
.
: @nohe_torki