جلالت و فداکاری حضرت سیدالشهداء(ع)
.
#زبدةالاشعار
.
: @nohe_torki
.
مرحوم صافی تبریزی
.
یازیلسا هر ورق اوستونده ماجرای حسین
گرک باشیندا کتابت اولاوفای حسین
.
ازلده هرنه بلا ذکر اولوندی لادیمدی
بلایه سالدى عیالین ازون بلای حسین
.
هامی بلالره غیب عالمینده دل ویردی
شهود عالمینه قالدی ابتلای حسین
.
بسان غنچه گوگل پرده پرده قان باغلار
دوشنده یادیمه اوضاع کربلای حسین
.
او قدر محنت و غم غصه رنگ رنگ بلا
وجودیمی غمیله دولدوروب بلای حسین
.
اگرچه قصّۀ مشهوردور ذبیح وخلیل
ذبیحی اکبر اولوب کربلا منای حسین
.
آلان بو گوگلیمون آرامینی او ساعتدور
بویاندى قانه جوانان مه لقای حسین
.
ئولوب کمک لری قالدی اوزی وحید و فرید
کسیلدى عالم امکاندن رجای حسین
.
یارالی گون قاباقندا سوسوز ویروبدیله جان
قوری یر اوسته دوشوب جسم اولیای حسین
.
گوزی باخا باخا اکبر کیمی جوانی ئولوب
باتوب قزلقانا بیر ایله دلربای حسین
.
جفا الیله علمدار اللری کسیلوب
دوشوبدی بیر یانا یرده قالوب لوای حسین
.
گیوبدی قاره قزی فاطمه عروس حسن
یاخوبدی قان الینه تازه کدخدای حسین
.
ال اوسته اصغرینی اوخلیوبله قلبی یانوب
جهانه شور سالوب نوحه و نوای حسین
.
گوروب کنارین آلوبلار او قوم بیگانه
اولوب خدنگیله شمشیر آشنای حسین
.
آچوبدی گلشن جسمی او قدر قرمزی گل
فضای قدسی بوتون دولدوروب صفای حسین
.
بو جان قولاقینه هل من معین سسی گلوری
قرار و صبریمی دلدن آلور صدای حسین
.
ملائکه متأثّر اولوب اوعالمدن
سالوب تحیرّه لاهوتی بو ندای حسین
.
دولوب همان سسیله بارگاه قدس جلال
مؤثّر اولدی او درگاهه التجای حسین
.
بولوب جواب ویرن یوخ أؤزی دیوب لبیک
عنایت اوسته گلوب سس وئروب خدای حسین
.
گوی اهلینه بویوروب سیز بو حاله شاهد اولون
یتیشدی باشه معیّن اولان قضای حسین
.
دیور رضاً بقضائک ویرور رضائیله جان
گرک جزا گونی گلسون اله رضای حسین
.
بساط سلطنتمیدن نه ایستَسَه ویرّم
جزا دگل نه ویریلسَه منم جزای حسین
.
حسین قانینی بوقوم بی بها بولدی
منم بوناحق آخان قانه خونبهای حسین
.
حبیبدن بو عطوفت حبیبی راحت ایدوب
اولوب او عین فنا اولماقی بقای حسین
.
حسینه لطف أولونان بیر حسینه لایقدور
نه گلسه فکریمه بوللم دگل جزای حسین
.
اگرچه اولمادیلار جان ویرنده یانینده
او خیمه لرده اولان خویش و اقربای حسین
.
سوسوز یارالی قوری توپراق اوسته جان ویردی
سرسنانه یتوردی باشین هوای حسین
.
اوجالدی گرچه باشی بیرجدا بویی یردن
یتیشدی قبّۀ افلاکه ارتقای حسین
.
آناسی جدّی آتاسی گلوب او نعش اوسته
دوتولدی قتلگه عشقده عزای حسین
.
گوتوردی یاخدی قانندان ازل یوزه باخدی
آتاسی حیدره یول آچدی مقتدای حسین
.
آناسیدا بویادی ساچلارین اوقانیله
بویار قوائم عرشی بو قان حنای حسین
.
ویروبله سس سسه ایوای حسین حسین دیدیلر
اولوب او دجلۀ خون تعزیت سرای حسین
.
او قانیلن بویانان توپراق اولدی خاک شفا
هامی مریضه یتر ایستسه شفای حسین
.
حسین دیوب آناسی بیرده کوفیه گلدی
بولوب که خانۀ خولیده وار بقای حسین
.
کول اوسته گوردی حسین باشینی وروب باشه
باشا ورا ورا سسلندی وای وای حسین
.
ایکی الیله اوباشی تنوردن چخادوب
آلوب کناره مناسب دگلدی جای حسین
.
قویوب یوزین یوزینه یاندی باسدی سینه سینه
نچون او سینه ده کی شیریدی غذای حسین
.
یولون غبارینی سیلمیشدی چون که خاکستر
نشان ویروب حقی مرآت حقنمای حسین
.
او بیر تجلّی مخفیده غشّ ایدوب زهرا
دوباره هوشه گتوردی اونی صلای حسین
.
.
#حسینیه_صافی_تبریزی
#حسینیه_شهادت
#یازیلسا_هر_ورق_اوستونده_ماجرای_حسین
#ترکی
.
#زبدةالاشعار
.
: @nohe_torki
نظر دهید