فراق رمضان
..
..
محمد هوشمند (مدهوش تبریزی)
..
..
یارب نظر ائت فصل کرامت گئدیر الدن
افسوس اولا که ماه عبادت گئدیر الدن
..
مین آیدان اولان قدریده افضل شب قدری
الله آیی ایام هدایت گئدیر الدن
..
سیراب ائله دی قلبلری چشمۀ قرآن
قرآنیله چون جهل و جهالت گئدیر الدن
..
شهر رمضان آچدی گوزل سفره سین اما
قویدی بیزی بیر ایل یئنه حسرت گئدیر الدن
..
به به واریدی ذکر و مناجات و دعاسی
صبحونده اولان عطر و طراوت گئدیر الدن
..
باشدان باشا عاصی لره اومّید آییدی
نومید ائلمه نعمت و قسمت گئدیر الدن
..
عزت واریدی وقت اذان سفره باشیندا
ائولرده اولان شور و حلاوت گئدیر الدن
یارب کرم ائیله نظر لطفیوی کسمه
چون عشقیویله کبر و منیت گئدیر الدن
..
درگاهیوه مین دفعه ده شکر ائیلسم آزدی
توفیقین اگر اولماسا عزت گئدیر الدن
..
عفو ائیله بیزی پنج تن آلعبایه
تا واردی بو آی رحم ائله فرصت گئدیر الدن
..
بایرام گلیری ائیلمه هیچ بیر کسی نومید
لطفونله اورکدن غم و حسرت گئدیر الدن
..
یارب بیزه دنیا بویی وئر صبر و بصیرت
صبر اولماسا هر قلبیده طاقت گئدیر الدن
..
هر شام و سحر روحیمی مدهوش ائله یارب
غفلت ده عجب عمر موقت گئدیر الدن
..
..
..
#رمضانیه_وداع #محمد_هوشمند #رمضانیه #ترکی #زبدةالاشعار
نظر دهید