#عاشورا_گونی
..
..
مرحوم شعاع تبریزی
..
..
یا علی دور قبردن گل کربلا صحراسنه
باخ حسینون قطعه قطعه دوغرانان اعضاسنه
..
..
صبح عاشورا او چولده ابن سعد بیحیا
ویردی بیر فرمان ایدوب طاعت او امره اشقیا
بیردن آتلاندی اوتوز مین سنگدل جاهل قوا
اولدولار سعد اوغلونون آماده بیر ایماسنه
..
..
آتدی بر اوخ حجة اللهه طرف اول بی ادب
بو جسارتدن جسارت تاپدی اشرار عربه
ویردی یوز آل رسوله بو جفادن تاب و تب
یاندی دلدن عترتون بو ظلم آتش زاسنه
..
..
کاش اولیدی ابن سعدین نحس الی اول دمده شل
هتک حرمت ایلینده سبط طاهایه ازل
ایتمییدی آتش ظلمی او چولده مشتعل
یانمییدی خرمن دین نار محضوراسنه
..
..
ویردی فرمان باشلانوب دعوا او مرتدّ و لعین
اضطرابه دوشدی یکسر آل ختم المرسلین
ایتدیلر جنگه اراده بیر به بیر انصار دین
باغلیوب همّت کمربندین عدا دعواسنه
..
..
جان متاعین ساتماقا بازار عشقه گتدیلر
عرصه نی هر تک تکی شام اهلینه تنگ ایتدیلر
نوش ایدوب جام شهادتدن مرامه یتدیلر
اولدولار دنیا بوئی دینون سبب ابقا سنه
..
..
اوز الیله بیچدی اوغلون خلعت اوغلی اکبره
ویردی قربان نوجوانین دین حیّ داوره
سالدیلار مجنون کیمی لیلانی آخر چوللره
قویدی حیران هاجری اوز همّت والاسنه
..
..
قاسمین نعشین ایدوب سمّ ستوران پایمال
دوتماقا ماتم سریّه تاپمادی بیر آن مجال
عمریجه ایوای اوغولوای اولدی وردی ماه و سال
اشک حسرت آخدی مطلق دیده دن سیماسنه
..
..
قویمادی نقصان جفادن ابن سعد کینه جو
حکم ایدوب سو یولّارین هر سمتدن دوتدی عدو
قالدی اوچ گون اوچ گجه عطشان بنات ماه رو
لیل داج اولدی ایشق گون گوزده آل یاسینه
..
..
خیمه لردن عرشه اوج ایتدی صدای العطش
اولدی غنچه لبلرین جلدی عطشدن منکمش
دمبدم ایلوب عطشدن نازنین اطفال غش
قالمادی طاقت اوشاقلاردا عطش ایذاسنه
..
..
قویدولار حق صاحبین حسرت سویا سفیانیان
ظاهر اولدی گلشن زهراده آثار خزان
گوردی سقا تشنه لیق سلب ایتدی اصغردن توان
یاندی باخدیقجا او طفلون حال غم افزاسنه
..
..
بیر قوری سو مشگی سالدی چگننه اول نامدار
دور شمع جسمین آلدی قزلارون پروانه وار
اللرینده بوش سو جامی دل پریشان اشگوار
ایتدیلر شِکوه عطشدن کربلا سقاسنه
..
..
ویردی تشنه لبلره سو وعده سی اول منتخب
گلدی بیر باش محضر شاهه ایدوب رخصت طلب
ویردی سقّایه اجازه الغرض شاه عرب
دولدی اما اشک حسرت دیدۀ شهلاسنه
..
..
آیریلوب قارداشدان اولدی عازم نهر فرات
ایتدی بیر حمله آلوب نهری کنار اولدى عدات
یکّه تاز عرصۀ هیجا قویوب اعدانی مات
شیعه لر قربان او ضرب شصت بی همتاسنه
..
..
دولدوروب سو مشگینی امّا اؤزی سو ایچمدی
نفسینی نفس بنات مصطفادن سچمدی
گلشن آمالدن صد حیف اولا گل بیچمدی
اسدی چون باد مخالف گلشن اهواسنه
..
..
قویمادی عبّاسی مقصوده چاتا قوم لئام
هر طرفدن آلدیلار اطرافین ای شاه انام
تیره باران ایتدیلر سرلشکری اشرار شام
اوغلوین ال تاپدی اعدا ضیغم هیجاسنه
..
..
هر طرفدن آل سفیان کسدی چاره یولارین
یخدیلار ام البنینن شیر دل اوغلانلارین
سالدیلار بیر مشک سو اوستونده سقّا قولارین
تاپدی ال روبه صفتلر قاف رزم عنقا سنه
..
..
آلدیلار الدن حسینون جمله یار و یاورین
گتدی میدانه ال اوسته شیر خواره اصغرین
حرمله پیکانیله بیچدی او تشنه حنجرین
یاخدی اصغر قانین اوغلون عارض زیباسنه
..
..
گئچدی ظلم اندازه دن آخر ایا شاه نجف
بیر خطالی ال جفایه آچدی ال یالَاالاَسَف
زهرلی پیکانه ایتدی اوغلوین قلبین هدف
قلبنون قانى قارشدی اشک یم آساسنه
..
..
کربلا دشتینده قالدی شاه دین فرد و وحید
باخمادی اوغلى ئولوب دلدن یانوب شاه شهید
اون ایکی ضربتله کسدی باشنی شمر پلید
هر گلن بیر یاره ووردی قامت رعناسنه
..
..
ایش هارا منجر اولوب آگهسن ای شاه امم
نیلدی جمّال و بجدل یا سنان بدشیم
ساربان نه ظلم ایدوب دوتمور دلیم واضح دیم
چوخ جسارت ایلدی اول بیحیا مولاسنه
..
..
گوردی اعدا یوخ داخی حامی بنات حیدره
قویدولار یوز خیمه گاهه اهل کینه یکسره
آچدیلار ال غارته قزلار داغلدی چوللره
باخمادی بیکسلرین ناکسلر آه و واسنه
..
..
تیر محنتله دل آل رسولی اویدولار
عصمت کبرا حریمین اهل کوفه سویدولار
خیمگاهی یاندورب اطفالی آغلار قویدولار
قزلارین آغلاردی یر گوی ذکر والحفاسنه
..
..
بیر یانان چادرده قالدى عابد والاتبار
نار ظلمه زینبون ووردی اؤزون پروانه وار
اوغولووی ایتدی یانار اوددان او مظلومه کنار
زینبیّت قدرتین گوستردی دین اعدا سنه
..
..
دوشمشم مدتدی من دنیاده شاها مشکله
فُلک صبریم بند اولوب دریای مننده گله
خادموزدور بو «شعاع» چک بحر غمدن ساحله
قویما خلقین یالوارا اعلا و یا ادناسنه
..
..
#عاشورا #شعاع_تبریزی #ترکی #زبدةالاشعار
نظر دهید