شب عاشورا
..
..
عبّاسعلی یحیوی «ائلچی»
..
..
گینه جولانه گلمیش رگلریمده شور عاشورا
مجسم دور خیالیمده شب دیجور عاشورا
فضای ذهنیمی روشن قیلیبدور نور عاشورا
منی سرمست ائدیبدور جذبۀ معطور عاشورا
قراره گلمیشم وصف ایلیوم اول لیل فیّاضی
امیدیم وار بو نظمیم روح عشقی ائیله سین راضی
..
..
قالین ظلمت چکیبدور پرده سین آفاق دنیایه
کأنّه قافین اوسته شهپر سیمرغ آسیب سایه
اولوبدور عترت اللّهین خیامی دشته آرایه
ملک لر صف به صف گویده دایانمیشلار تماشایه
حسینین محضرینده روح آرامش سالیب لنگر
عدو رُعب امامتدن دوشوبدور وحشته تیترر
..
..
زمان، خوش بیر زماندور لیلۀ پرشور عاشورا
قمر دریای شبده نقره گون قایق کیمین پیدا
سکوتون جوهریندن قاوزانیر تکبیر روح افزا
تحیّر عالمین سیر ایله ییر دنیا و مافیها
فضای انسى کلاً ترک ائدیب اغیار و بیگانه
کناره ردّ اولوب پرده میان شمع و پروانه
..
..
مزیّن ائیله ییبدور بزم عشقی، نور رحمانی
ملک لر شهیریلن فرش اولونموش صحن روحانی
آچیبلار حوری لر گل چتر زلف عنبرافشانی
اولوب مستغرق نور هدایت لیل ظلمانی
قدح لر پایلانیب بزم اهلینه انوار رحمتدن
قیزیل قابلاردا اَندی مائده تالار جنتدن
..
..
خرابات اهلی گلبانگ تلاوتدن بوتون مسحور
فضای محفلی آیات مشکین ائیله ییب معطور
اورکلر مست و گوزلر نرگس مستانه تک مخمور
حلول شوق صهبای ولادن سینه لر پر شور
حسین اول پیر عرفان بیر بئله محفلده ساقی دور
او نورانی قدحلر ایندی ده جنّتده باقی دور
..
..
نه محفل ؟ جلوه گاه معرفت کانون سرّالله
مقدس پایگاه معدلت، عزّتده گردونجاه
او بزمین آستانین ئوپمه گه آماده مهر و ماه
شکوه مقدم حرّیّته شایسته بیر درگاه
او محفل ده وقار و اعتبار کبریا واردور
حسین بن علی تک بیر مقدّس رهنما واردور
..
..
او خلوتگه، تجلّی زار حسب الحال مشتاقی
سراسر مستدور پیمانه و خمخانه و ساقی
گلیر هر گوشه دن بیر سس: بده ساقی می باقی
بو بزمین جلوه سی سرمست ائدیب انفس له آفاقی
شهادت جذبه سی شوق آتشین جانلاردا یاندیرمیش
یانان جانلار جنونی، چرخی حیرتدن دایاندیرمیش
..
..
او محفل ده تلألؤ ایله ییر بیر شمس ربانی
کمالیندن تجلّایه گلیب انوار عرفانی
جمالیندن اولوب طالع مقام عشق سبحانی
او عشقین جلوه سی روشن قیلیب دنیا و عقبانی
او بزم نورده یتمیش ایکی مرد خدا واردور
دوداقلاردا سرود اَلبلاءُ لِلولا واردور
..
..
آسیلمیش چلچراغلار، عالم معناده گویلردن
سپیلمیش دسته دسته لاله، روضات معنبردن
چکیلمیش رشته رشته نهر رحمت حوض کوثردن
صدای “انت محبوبی” گلیر دلداره دلبردن
آچیلمیش هشت باب جنّت الاعلا او محفل ده
گوروندی آیری بیر شور آرتیران سودا او محفل ده
..
..
قوروبدور خیمه گاهینده حسین بیر مجلس شورا
حضور یار و انصاریله بو محفل اولوب برپا
صاقیندا اکبر اجلاس ایله میش صول سمتده سقا
گورونمور هئچ اثر نامحرم و بیگانه دن اصلا
ائدیر پروانه لر کسب فضیلت شمع مولادن
علاقه قطع اولوبدور حلقۀ وصلتده دنیادن
..
..
نمازه باغلانیب صف، مقتدا پیر گرانمایه
همای رحمت مطلق، سالیبدیر محفله سایه
طُمأنینیله ائله حمدی ذکر اندنده آیه به آیه
جمال نور حق وئرمیش در و دیواره آرایه
دایانمیش انبیا صف لرده اجرای نماز ایلر
خلوصیلن اورکلر حقّیلن رازونیاز ایلر
..
..
دوشوبلر سجده یه، سبحان ربّی، ربّى الاعلا
دوداقلار تک گلیب شوره کونوللر ایله پر نجوا
مکبّر حضرت جبریل دور، تکبیری عشق افزا
بو عبدیت گورونمز هئچ زمان تا موسم عقبا
سر سجّاده ده حورا آچیب گیسولرین تئل تئل
ائدیبدور بزم مشتاقان، حِرا قدّستین حاصل
..
..
اوزاندی سجده لر تکرار اولوب اذکار ربّانی
آچیلدی پرده لر اولدی هویدا نور رحمانی
گول آچدی سینه لرده دم به دم آیات قرآنی
اورک لرده تجلی ایلدی سیمای سبحانی
اولوب رشک بهشت اول بزم شورانگیز نوشانوش
دوروب بیر گوشه ده زینب باخیردی صحنیه خاموش
..
..
حسین بن علی، استاد دانشگاه عشق الله
شهادت سرینه بیربیر قیلیب قربانلارین آگاه
وقایعدن خبردار اولجاقین زینب چکیب بیر آه
گلیبدور نالیه بشکسته پر بولبول کیمین ناگاه
دئدی مظلوم حسینیم وای عزیزیم وای حبیبیم وای
بو غربت ئولکه ده بی یار و بی یاور غریبیم وای
..
..
مثال طور ،سینا ناگهان دنیا ایشیقلاندی
کأنّه مهر عالمتاب تک یوزمین چراغ یاندی
بوتون جنّ و ملک حیرتده مستغرق نه طوفاندی
بو یئرهانکی مکاندور کی فضاسی نورباراندی
مقام قدسی دادار عالمدن ندا گلدی
سمادن دشت عاشورایه نورانی لوا گلدی
..
..
لوا ابریشمین گول یاپراقیندان خرم و شاداب
پاریلدار پهنه سینده کلمه لر چون مهر عالمتاب
شهیدان معظّم اسمینی درج ایله میش کتّاب
حسینین نام والاسیله یکسر طفل و شیخ و شاب
بولاردور بیر به بیر قربانی میدان عاشورا
بهار عشقده بشکوفۀ خندان عاشورا
..
..
او عاشقلرده کیمدور صبح اولونجا فکر خواب ایلر
اورکلر سرّ غیبی درک ائدیب چوخ پیچ و تاب ایلر
لقاء الله اوچون یوخدور قراری اضطراب ایلر
سیزیلدار نی کیمین گوزدن روانه اشک ناب ایلر
بئله بیر حالیلن باشلاندی استقبال عاشورا
دئمک اول لحظه دن جوشلاندی شور و حال عاشورا
..
..
عراقین ئولکه سی یای فصلی گرماخیز بیر صحرا
گئجه اوز بوقچاسین بوکدی اولوب ظلمت بوتون امحا
زامان ناقوسی سسلندی آچیلدی صبح عاشورا
قیزیل بیر تشت تک خورشید خون آلود اولوب پیدا
گونش چیخدیقجا اود یاغدیقجا گرما هوپدی توپراقه
سوسوز آهولرین سوز و گدازی قالخدی آفاقه
..
..
قلم کی بو طریقیلن او بزمین حالتین یازدی
قتیلان منانین شور و حال و لذتین یازدی
او مستی خانه نین حیرت فزا وضعیتین یازدی
محبان حسینین حق یانیندا رُتبتین یازدی
اراده ایلدی و ترسین ادامه نظم اشعاره
جناب یحیوی، سؤز دفتریندن گلدی گفتاره:
..
..
«ائله که صبح آچیلدی شمس عاشورا عیان اولدی
گئجه سیر مقامات ایلینلر شادمان اولدی
رباب و زینب و کلثوم و لیلا باغری قان اولدی
او حاله آغلادی زهرا خدیجه نوحه خوان اولدی
بلا عاشقلری میدان عشقه ائتدیلر سبقت
مقابل اولدی روز روشناده نوریله ظلمت
..
..
حبیب ابن مظاهر نیزه آلدی قاچدی میدانه
دالیجا مسلم ابن عوسجه اول شیر فرزانه
زهیر و عبد رحمان گتدیلر شمشیری جولانه
جهانی تنگ ائدیب هر تک تکی احباب سفیانه
قوجا سربازلر آخر کفن پوش اولدی پیکاندان
بهشت عدنه فوراً گنچدیلر دنیای زنداندان
..
..
چیخارتدی جوشن و پیراهنین عابس اولوب عریان
ائدیب اوخلار قباقینده برهنه سینه سین قلخان
دئدی یوخدور هراسیم نیزه دن شمشیردن اوخدان
وورون من تئز کئچیم بو کورپودن گوزلر منی جانان
حسینین دفترینده تا منیم آدیم شهید اولسون
بو قانلی صورتیم زهرا حضورینده سفید اولسون
..
..
گئدیب قانه بکشدی اکبر تازه جوان گلدی
حسین بوکدی عبایه خیمیه بیر لخته قان گلدی
گئدیب دوغراندی قاسم کاکلیندن بیر نشان گلدی
گئدیب اوخلاندی اصغر تشنه لب اول بی زبان گلدی
ابوالفضل دلاور قامتی قولسوز یئره دگدی
آغارتدی زینبین زُلفون حسینین قدینی اگدی»
..
..
بو دمده بولبول طبعیم دوباره گلدی آوازه
ائده عرض ادب استاد پیره چیخدی پیشوازه
خیالیمده آچیلدی تازه دن بیر تازه دروازه
او شهبازه داها بیر لمحه فرصت یوخدی پروازه
ییخلمیش قانلی پیکرلن، گلن ووردی گئدن ووردی
کأنّه نیزه لر اوخلار باشی اوسته چادیر قوردی
..
..
چالیخلار قان ایچینده لبده اذکار مناجاتی
طلبدن باشلاییب سیر ایله میش عالی مقاماتی
کمال وجدیلن طىّ ایلینده قانلی آناتی
سروش غیب ائدیب پاره حضورونده حجاباتی
دئدی ای زادهۀ زهرا سن احیای نماز ائتدون
منای عشقده جدّون رسولی سرفراز ائتدون
..
..
سن ای غرق بلا سیماسی خندان مست جام عشق
مقام و شأنووه زیبنده دور یکسر مقام عشق
مراموندور مرام حق قیاموندور قیام عشق
سنه عرض سلام ایلر بو دم دارالسلام عشق
مقام قدسیِ قُربِ خداده جایگاهون وار
بلا جامین ایچن جانلاردا دائم پایگاهون وار
..
..
اوزون حقسن سؤزون حقدور مرامون حق وجودون حق
حیاتون حق صلاتون حق قیامون حق قعودون حق
جدالون حق قتالون حق رکوعون حق سجودون حق
کمالون حق جلالون حق طریقون حق شهودون حق
حقیقت حکمتی سن تک گوزل قربانه لایقدور
بو حق لر حکمت و قرآنیلن عرفانه لایقدور
..
..
سنون شأنون معلّادور مقام عشقون اعلادور
قاشون طاق مصلّادور گوزون مرآت معنادور
مرادون حىّ یکتادور بو سودا آیری سودادور
لبون عطشان من المادور سؤزون آخر نفس لادور
او لا، الّایه واصل وصلتون سبحانه لایقدور
او الّا اعتلای حضرت قرآنه لایقدور
..
..
شئونوندن بشر حیران بو حیرتدن اورکلر مست
سینونده یاره لر خندان بو گلشندن فدک لر مست
قدوموندن صفا جاری عروجوندن ملک لر مست
خسوفون ظلمته غالب کسوفوندن فلکلر مست
سنون بیر لمحه تشریفون بوتون کیهانه لایقدور
نظام ماسوى الله سن کیمین سلطانه لایقدور
..
..
گلیب زهرا دئدی اوغلوم بو ماتمدن ئولر زهرا
سنی مسلخ ده تک قویماز گلر زهرا ملر زهرا
مقدّس قانووه زُلفون آچار زهرا بلر زهرا
اویانمیش لبلره قانیاش بولودلار تک اَلَر زهرا
بو سیزغین چکّه لر اول غنچۀ سوزانه لایقدور
بو قانلی طرّه لر اول پیکر عریانه لایقدور
..
..
قیزیل چترین گونش بوکسون حرارتلر اوزاقلاشسین
بولودلار داغلار اوستوندن یاخینلاشسین قوجاقلاشسین
سنه یاس توتماقا گویلر بولودلار بیرگه باغلاشسین
منیم بو داغلی سینم تک گلیب افغانه آغلاشسین
سرین شئح لر آنون قربان سوسوز ریحانه لایقدور
سراسر باغ جنّت سن کیمین عطشانه لایقدور
..
..
حسین جان «ائلچی نی» تاپشیر اوزون قولسوز علمداره
زبان نارسائیلن گلیب عشقونده گفتاره
آتام دیوانی تک عطف نظر قیلسین بو اشعاره
چکر حسرت کی تقدیسونده دولسون شوق سرشاره
شرار شمعدن نور ایچمه گه پروانه لایقدور
سنون ای جان جان عشقون فقط جانانه لایقدور
..
..
..
#شب_عاشورا #یحیوی_اردبیلی #زبدةالاشعار #ترکی
نظر دهید