شهادت حضرت زهرا سلام الله علیها
.
.
.
مرحوم شهاب تبریزی
.
یا فاطمه ئولونجه شاد اولمادون جهاندا
ظلم آتشیله یاندون آخر قاپون یاناندا
.
.
اون سگز ایل بو فانی دنیاده عمرون اولدی
درد غمیله قلبون هر صبح و شام دولدی
باد ستمله رنگون گل تک سارالدی سولدی
سن تک بلاکش عورت اولموبدی هیچ زماندا
.
.
دنیاده بسکه چکدون یا فاطمه مصیبت
زلفون آغاردی غمدن اولدون خمیده قامت
قویمادیلار اولیدون بیر اوز ایوینده راحت
اولدی فزون ملالون هر ساعت و هر آندا
.
.
رحلت ایدن زمانی جدّون رسول رحمت
تاپشوردی امّتینه آخر سنی امانت
حقّون عجب مراعات ایتدی وفاسیز امّت
هیچ کیم بیله امانت حفظ ایتمیوب جهاندا
.
.
گیتدی او گونکه جدّون ختم رسل بقایه
دوشدی بلالی باشون عالمده مین بلایه
اگنونده غم لباسی مشغولیدون عزایه
امّت عجب تسلّی ویردی سن آغلیاندا
.
.
باش ساقلوقی که اعدا ویردی عزا زمانی
درگاهوه وروب اود ازّل ستمله جانی
بلمم او اود نه اوددور اودلار خانم جهانی
قالدون اوزون نه حاله درگاهون اودلاناندا
.
.
بیر درگهی که دائم جبریل اولاندا داخل
ال سینه ده ادبله ایتسون اجازه حاصل
اود ووردی نه یوزیله یاندوردی قوم باطل
چوخ صبر واردی الحق خلّاق لامکاندا
.
.
اودلاندی چارچوبه باخ جانیده حیایه
وردی او شل ایاقین درگاه کبریایه
یوخدور خانم دلیمده یارا بو ماجرایه
یتدی سنه نه صدمه بو ظلم عیان اولاندا
.
.
بو حالتون گراندور مطلق ابوترابه
گورسون سنی سالوبلار گل برگی تک ترابه
صبر ایتدی اوز قولوندا باغلادیلار طنابه
سرّ عظیم واردور بو صبر و امتحاندا
.
.
فکر ایلینده حالون قلبیم گلور فغانه
وردی عدو قولوندان ظلمیله تازیانه
وار ایمدیده قولوندا اول صدمه دن نشانه
بو داریدن گیدنده گیتدون همان نشاندا
.
.
قویدون یرونده نائب زینب قیزون گیدنده
سن تک بلایه دوشدی تا روحی وار بدنده
یا فاطمه او بیکس خاتونه آغلا سنده
آغلاتدی ماسوانى قوللاری باغلاناندا
.
.
درگاهوه اگرچه اود وردی اودّا یاندی
اما خیام زینب هم یاندی هم تالاندى
بیر گونده یدّی قارداش آلقاننه بویاندی
گیتدی جلالی الدن قالمادی تابی جاندا
.
.
یا فاطمه شهابه ایله اوزون حمایت
بو جمعیله اونا قیل محشرگونی شفاعت
بیرده خدادن ایسته قبرون ایده زیارت
ایستر زیارت آغلار هر روز و شب جهاندا
.
.
#فاطمیه_شهاب_تبریزی
#فاطمیه_شهادت
#یا_فاطمه_ئولونجه_شاد_اولمادون_جهاندا
#ترکی
.
نظر دهید