طفلان حضرت مسلم
.
✍️ زبدة الاشعار ✍️
.
🆔: @nohe_torki
.
مرحوم حافظی تبریزی
.
یتیمه رحم ایدر اولسا نجه کین پرور ئولدورمز
مسلمان سهلیدی، حارث قوناقی کافر ئولدورمز
.
.
مسلمانسان اگر، هر امره بول خلّاقیوی عالم
گل ئولدورمه بیزی، گیچ قانیمیزدن، رحم ایله ظالم
جزانی یاده سال، ایله مرخّص زنده و سالم
دیمه ساخلار سنی هرگز خدای داور ئولدورمز
.
.
گوروب بیز چوخ مصیبت آز زماندا، دویموشوخ جانه
آتاسیز قالمیشوخ گه دوشموشوخ کوه و بیابانه
بلائیله گه اولدوخ گوشه ی زنداندا همخانه
زیاد اوغلی دیردوخ حبسیدن قاچساخ گر ئولدورمز
.
.
خلاص ایتدی بیزی زنداندان آخِر پیر زندانبان
قویوب پیغمبره منّت، ایدوبدور مسلمه احسان
قضا دوتدی یول آزدوخ تا گجه گلدوخ سنه مهمان
گمان ایتدوخ قوناقه میزبان رحم ایلر ئولدورمز
.
.
سنه بیز اولموشوخ ایمدی ایکی قارداش پناهنده
یویوندوخ که خلاص اولدوخ، دچار اولدوخ گینه بنده
گوتور ال کینه دن اللهه باخ آزاد ایله سنده
غزالی دامیده بیر صید ایدن بداختر ئولدورمز
.
.
آنامیز وار وطنده، یول گوزتلور ایمدی قان آغلور
ایکی آرام جانیندن قالوبدور ناگران آغلور
اوز اوزون ئولدورور، صبح و مسا ایلور فغان آغلور
ایکی اوغلوندان اوتری اوز اوزین بیر مادر ئولدورمز؟
.
.
رضا اولما بو حسرتله ویراق جان بیز ایکی قارداش
گلینجه بیز سنه مهمان ئولِیدوخ گلمیِیدوخ کاش
سنه عجز ایتمیِیدوخ، توکمیِیدوخ عارضه قانیاش
قتیلین گورسه قاتل گوزده وار اشک تر ئولدورمز
.
.
پیمبر عترتین اوز امّتی ئولدورمز، ئولدورمه
بولر ناحق قانین وار قیمتی ئولدورمز، ئولدورمه
گورر وار خوب و زشتین اجرتی ئولدورمز، ئولدورمه
ولو دنیا دولوسی ویرسه لر سیم و زر ئولدورمز
.
.
اگر مقصودون اولسا مال دنیا قتل نفس ایتمه
دولاندور قول یرینه سات، دیمروخ نفعیوه یتمه
اوزیوه رحم ایله گل زیر بار ظلمه سن گیتمه
اوزین نار جحیمه عاقل ایتمز مجمر ئولدورمز
.
.
و یا ابن زیاده گل آپار قول باغلی ویر تحویل
آل انعامون یتیش خیره، بو امر خیری قیل تعطیل
او ایتسون حقّیمیزده هر نه نوعی ایلسه تاویل
اودا یا ئولدورر یا حبس ایدر چوخ ایللر ئولدورمز
.
.
بیزی بو حالیده گورسه زیاداوغلی بو اثناده
یانار قلبی، یقین بوشلار، ال آچماز ظلم و بیداده
سنه اولّوخ دعاگو تا واروخ بو دار دنیاده
سنیده حق یقین بول ئولدورنده مضطر ئولدورمز
.
.
بو قدری عجز و الحاح اولدی گر بیهوده بیر صحبت
داخی ال ساخلا، دوگمه، وورما، اینجیتمه، ایله رافت
ایکی رکعت نمازین قدریجه ویر بیزلره مهلت
صورا ئولدور بیزی که غصّه و دردسر ئولدورمز
.
.
ایکی رکعت نمازه آلدیلار مهلت او کافردن
نجات آلسونلا بلکه بارگاه حیّ داوردن
قویوبلار سجدیه باش چون کسیلدی چاره هر یردن
بو فکریله نمازین احترامین گوزلر ئولدورمز
.
.
گوروبلر اولمادی داده یتن، دلدن چکوبلر آه
ایدوبلر عرض اول شاهد بو احواله اوزون الله
آلوب نفرین سسین اول بی حیا غیظه گلوب ناگاه
مسلمانی نماز اوسته دیموب که کافر ئولدورمز
.
.
اوئیکه ایتمه لیدی ایلدی اول دشمن خالق
ایکی طفلین ایدوب روحین آتاسی مسلمه لاحق
نه ایله بیر جفاگستر گلر و نه گلوب سابق
بیله بیر سنگدل اولماز، ایکی مه منظر ئولدورمز
.
.
او ظلمیکه ایکی طفله او بی ایمان روا گوردی
دگل شرحی سزا هامّی بولر فوراً جزا گوردی
ایشیتمیشدی اوئیکه منتقم وار برملا گوردی
دیدی اوز قاتلی مهمانی بیر کین گستر ئولدورمز
.
.
جدا ایتدی بدندن نحس باشین حارثین مامور
نییدی نیّتی الله بولر، بو سوز دگل منظور
اله مقصودیمیز گلمز بو مطلب قالماسا مستور
عجبدور لیلینی داغ علیّ اکبر ئولدورمز
.
.
بیله مشهوردور فوتین ایکی طفلین آنا بولدی
نچه گون اتّصالاً آغلادی، بیر کس دیمز گولدی
بالاوای اولدی وردی عاقبت جان تاپشیروب ئولدی
دیمه که بلبلی درد گل و برگ و بر ئولدورمز
.
.
نه حاله قالدی لیلا بارالها روز عاشورا
او ساعت که یتیشدی اکبرینه نوبت دعوا
نجه آیریلدی اوغلوندان، نجه ال اوزدی بس آیا
بولردی ئولدورر، هرگز دیمزدی لشکر ئولدورمز
.
.
او قدری گیچمدی گوردی بالاسین قانینه غلطان
باخوب باشدان ایاقه گوردی پیکر گل کیمی خندان
دیدی ایوای علی اکبر آنان لیلا سنه قربان
ئولنه بیر بیله دگمز سَنان و خنجر ئولدورمز
.
.
خدایه شکر ایله ای حافظی یاخشی موفّق سن
قالور دنیا یوزینده یاخشیدان بیرده اثر پیسدن
دگل بو خدمتون پیس، ایتمه غم، تیز گیج اگر ئولسن
سنی ساخلار دیری بو خامه و بو دفتر ئولدورمز
.
.
.
#یتیمه_رحم_ایدر_اولسا_نجه_کین_پرور_ئولدورمز
#ترکی
.
✍️ #زبدةالاشعار ✍️
.
🆔: @nohe_torki
نظر دهید