غارت خیام
.
✍️ زبدة الاشعار ✍️
?: @nohe_torki
.
مرحوم شهاب تبریزی
.
آز قالدی یانسون ظلمیله
بو خیمگاهی زینبون
اِمداده گَل قارداش حسین
یوخدور پناهی زینبون
.
دور خیامی آلدیلار بو بد جماعت یا اَخا
قالموب او قدری ظلمیله ایتسونله غارت یا اَخا
حَددن گیچوردوب ظلمینی اهل عداوت یا اَخا
جور و ستمدن اوج ایدور افلاکه آهی زینبون
.
قارداش اگر وار قدرتون قیل چاره بو کافرلره
بو اهلبیتون ناله‌سی یکسر دایاندی گویلره
اولما رضا آهو کیمی دوشسون عیالون چوللره
آخر اوزون دور داده گَل ای پادشاهی زینبون
.
چون جلد قرآن اود دوتوب ظلم آتشیله خیمگاه
اوراق اولوب قرآن کیمی قارداش بَنات بی‌پناه
دوشدی عیالون چوللره نیلوم من بختی سیاه
یوز مین گروه اشقیا یوخ دادخواهی زینبون
.
عرشه دایاندی یا اَخا جور و جفای کوفیان
آل رسولی سربسر خوفه سالوب شمر و سنان
گر خواب نازه نازیله مشغولسن برجه اویان
بر اوزگه سمته یوخ بوگون امّیدگاهی زینبون
.
آخر همان زینبدی بو ای پادشاه کربلا
بر آن خیم‌دن چخماقا اولمازدون عالمده رضا
ایمدی روادور رختینی سویسون گروه اشقیا
اولسون یوزینون حایلی زلف سیاهی زینبون
.
جور و جفاسین دمبدم ایلر زیاده اشقیا
دشمنلر ایچره عترت بی‌یاورون قویما قالا
آز قالدی باجون قوللاری دشمن النده باقلانا
آیا ندور قارداش حسین جرم و گناهی زینبون
.
بو دشت غمده اشقیا ظلمتین نمایان ایلدی
آل رسولین باغرینی لاله صفت قان ایلدی
تاب ایلدیم بو دشتیده هر ظلم عدوان ایلدی
آخر بو مطلبده سن اول قارداش گواهی زینبون
.
ایله «شهابا» مایل محنت دل سوزانوی
دولدور مدام اشکیله هم بو دیدۀ گریانوی
اولسا بو سوز وِرد زبان خوش دوتموسان عنوانوی
آز قالدی یانسون ظلمیله بو خیمگاهی زینبون
.
#سبک_ای_شاه_مظلومان_حسین (5 سبک متفاوت سینه و زنجیر و … )
.
#غارت_خیام
#آز_قالدی_یانسون_ظلمیله_بو_خیمگاهی_زینبون
#شهاب_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید