دیر راهب
.
✍️زبدة الاشعار✍️
?: @nohe_torki
.
مرحوم علی اکبر عماد (رمزی تبریزی)
.
نه حالیله یتیشوب دیره دختران رسول
نزول ایلوب او یرده تمام قوم جهول
.
صدای بانگ جرس دوتدی کوه و صحرانی
چیخوبدی دیریدن اُول دمده پیر نورانی
.
گوروب امام حسین باشینی جداده او پیر
ازل اؤرکدن ایدوب آه و ناله شبگیر
.
بویاندا باخدی نگوردی که سید سجاد
توکور عذارینه گوزیاشینی دیور ای داد
.
اسیر قید ستم بند بانوان حجاز
اویاندا عشرته مشغول جمله اهل مجاز
.
سئوال ایلدی راهب ایا گروه شریر
بو گون بو دشتیده کیمدور سیزه رئیس و امیر
.
نشان ویروبله اونا شمر شوم و بی عاری
ایدوبدی عارضه راهب سرشک تر جاری
.
گلوب سوال ایلدی ای امیر لشکر شام
بو باش کیمین باشیدور نیزده آلور آرام
.
امامه خارجی نسبت و یروبدور اول گمراه
ائشیتدی بو سوزی راهب چکوب جگردن آه
.
دیدی بو باشی ویرون بیر گئجه منه مهمان
دوباره ردّ ائدرم ایسته سوز اگر هر آن
.
امام باشینی ویردیله پیر ترسایه
یتیشدی درد و الم چرخیده مسیحایه
.
او نازنین باشی گتدی او پیر خوش سیما
پیمبر اوغلی گیدوب دیره، آه و واویلا
.
او پیر اوتوردی ازل بیر طرفده چوخ نگران
نگوردی عرشه چخوب آه و ناله و افغان
.
تمام نازل اولوب دیره انبیای عظام
ائدوبدی دیریده گویا که شور حشر قیام
.
پیمبران او باشی بیر به بیر زیارت ایدوب
مقربان اونی سرمایۀ سعادت ایدوب
.
علاوه جدّی، حسین وای دیردی آغلاردی
فغان و ناله سی کرّوبیانی داغلاردی
.
دوباره بیر نچه خاتون ائدوبدی دیره نزول
اولار تمامی سیه پوش اشکبار و ملول
.
یقین ائتدی اولار هاجریله سارادور
بیریسی مریم کبری بیریسی زهرادور
.
او نازنین باشی بیر بیر باسوبلا آغوشه
شمیم یتدی مشامه گئدوبدولر هوشه
.
آناسی فاطمه آلدی او باشی عزتیله
باخاندا عارضه گوز یاشی آخدی سرعتیله
.
بویوردی یا وَلَدی کیم سنی بو حاله سالوب
حرملرین نه اولوب زینبین هایاندا قالوب
.
مگر اوغول دئمدون من عزیز زهرایم
اولارا سویلمدون سبط شاه بطحایم
.
گلوب تکلُّمه اُول قانلی باش دیدی آناجان
ترحُّم ایتمدیلر ویردیم اوز اوزیمی نشان
.
ستمله گلشنیمه صرصر خزان اسدی
اون ایکی ضربتیله شمر باشیمی کسدی
.
قویوب یره او باشی گئتدی بانوان کرام
گوروبدی راهب او احوالی اُولدی بی آرام
.
دئدی قسم سنی ویرم خدای یکتایه
جناب مریم و هم حضرت مسیحایه
.
منه نشان ویر اؤزون کشف قیل بو اسراری
غمین ملاله سالوبدور تمام ابراری
.
گلوب تکلُّمه اُول راس سید مظلوم
بویوردی راهبه گویا او شه اَنَا المَظلوم
.
دئدی شها بو عیاندور که اولموسان مظلوم
وَلیک ایله اؤزون بیر منه بو دم معلوم
.
بویوردی سبط شهنشاه عالمینم من
سوسوز باشی کسیلن تشنه لب حسینم من
.
آنامدی زهرۀ زهرا بابامدی شیر خدا
منی شهید ایلیوب ظلمیله گروه دغا
.
دیدی که ایله منی دین حقّیدن آگاه
بویوردی سویله گلن لا اله الا الله
.
او قانلی باش او گئجه دیریده یاتوب راحت
اولاندا صبح آلوبلار اونی ایدوب حرکت
.
چالندی طبل، ایدوب لشکر جفا حرکت
حسین حرملرینه یوز وئروب غم و محنت
.
یتیردیلر اسرانی چو قلعۀ شامه
دونوبدی صبح بنات حریم حق شامه
.
یتیشدی سوز او یره «رمزیا» تمام ایله
سوزیوه خاتمه ویر آخر کلام ایله
.
.
#دیر_راهب
#نه_حالیله_یتیشوب_دیره_دختران_رسول
#رمزی_تبریزی
#ترکی
.
✍️ #زبدةالاشعار✍️
.
?: @nohe_torki
نظر دهید