ای اولان بو تیره شام شام ایچنده ماه زینب #ورود_شام_سعدی_زمان

زبانحال علیا مکرمه
حضرت زینب سلام الله علیها بسر امام مظلوم
در شهر شام
.
.
مرحوم حسینی سعدی زمان
.
.
ای اولان بو تیره شامِ شام ایچنده ماه زینب
تیره گون ایلوبدی سنسیز آفتابی آه زینب
.
.
اودلی بیر مشعلدی گویا گویده کای ماه درخشان
ایلیوب تأثیر آهیم چرخ اطلسده فروزان
شعلۀ آتش تک ایلر کایناتی سینه سوزان
آتشین دلدن چکنده نالۀ جانکاه زینب
.
.
قطره قطره نوک نیدن باشوون آخدوقجا قانی
زینبون درّ سرشگین ایلیوبدور ارغوانی
یولّارا بسکه سپوب سو اشک چشم خونفشانی
گل نشیندور پای ناقه ایسلانوبدور راه زینب
.
.
بی سبب سانما که سوز آه زینب دلنشین دور
تیره شبلرده چراغ راهی آه آتشین دور
حایل رخساری گیسو چتر عصمت آستین دور
دود دلدن باشی اوسته نصب اولوب خرگاه زینب
.
.
شعلۀ شمعی گورنده کیم دیر پروانه یانماز ؟
اولماسا امّید وصلی صبر ایدوب هجره دایانماز
بو ستمدیده بلاکش چوللری بیجا دولانماز
بو خط سیرینده واردور عمده بیر دلخواه زینب
.
.
گیرم اسلامه مروّج اولدى اوضاع شهادت
گیزلنوردی اول شهادت اولماسیدی بو اسارت
جدّیمون قانون شرعی محو اولوردی فی الحقیقت
گر اسارتده اولیدی ذرّه جه اکراه زینب
.
.
رونق دین و شریعت اولماسیدی بو اسارت
دستگیر اولمازدی شمره عترت ختم رسالت
تک بتک ترویج ایده لّر دینی بو اهل خدارت
خواه کلثوم بلاکش خواه لیلا خواه زینب
.
.
گر چه ایلور شامین اهلی آل اطهاره نظاره
نور حق رخساری اما کشف اولونماز اهل ناره
عترت طاها سالوبلار ساچلارین یکسر عذاره
محو ایدر شامی اشاره ایلسه هر گاه زینب
.
.
قتلگاه کربلاده ساچلاریم باتمشدی قانه
تازہ دن ایتدی مخضّب یولدا ضرب تازیانه
قولّاریمدا وار آنام تک گور نجه نیلی نشانه
سنسیز الدن گیتدی قارداش شأن و عزّ و جاه زینب
.
.
گوز دولاندور نیزه دن بیر قیل نظر بیمار امامه
گور نجه آغلور باخاندا ازدحام اهل شامه
گردنینده غلّ جامع یوخدی باشندا عمامه
قان اولوب بو ماجرادن خاطر آگاه زینب
.
.
بیر نفر یوخدور دیسون بو شمره ای شوم جفا کار
ناخوشی وورمازلا ظالم نیلیوب آخر بو بیمار ؟
قمچی بیماره ووراندا یالوارلّار شمره ناچار
گه رقیّه گه صفیّه گه سکینه گاه زینب
.
.
کربلادن شهر شامه ویرمیوب مهلت بو لشگر
قیزلارون بیر آغلاسونلارسس سسه ویرسونله یکسر
وار نه غم خواری نه یاری نیلسون بو بی برادر
نالۀ شبگیر اولوبدور روز و شب همراه زینب
.
.
مطلع شعرون «حسینی» اولدی «هندی» یادگاری
نوحه خوان میرزا منافی قیل شریک جرینده باری
ایتمه غم بو روزگارین وار سیزه بیحد فشاری
صدقیله ایتسوز توسل قورتارار والله زینب
.
.
#ورود_شام #سعدی_زمان #ترکی #زبدةالاشعار