عرض ارادت به ساحت مقدس حضرت سیدالشهدا (ع)
..
..
..
..
رضا غلامپور (دلپاک)
..
..
..
..
ملجأ اهل دیانتدور بو دربارون حسین
قرب و عزّت تاپدی درباریندا انصارون حسین
..
..
..
..
بیر نفس تا اَسدی سمت مهر و لطفوندن نسیم
گوستریب نیلر نفوس حقه انفاس سلیم
جنّت الاعلانی تسخیر ائتدی ناگه خوش شمیم
گولّنیب تا کربلا دشتینده گلزارون حسین
..
..
..
..
رونق شورون سالیب بازار عشقه ولوله
بیر بو شوروندان صورا تعطیل اولوب هر مشغله
سن دئدون تا جان متاعین من اوزوم آلّام اله
من اوزومده حق دئدی اولام خریدارون حسین
..
..
..
..
مین رضایت تاپدی جلوه بیر نگاه عشقیده
اولدی محکوم فنا هر غصه آه عشقیده
نکته نکته قطره قطره وعده گاه عشقیده
سرّ ثارالهی معنا ائتدی ایثارون حسین
..
..
..
..
نقشهٔ فکرینده ترسیم اولدی مرز اقتدار
نقشین ایفا ائتدی بو همتده عالی ذوالفقار
مرکز قدرتده تا تاپدون وقاریله قرار
رسم ائدیب بیر بیر خطوط حقی پرگارون حسین
..
..
..
..
قلزم سرّ ضمیرون مخزن اصداف حق
درکینه عاجز هامی غواص فکر ماخلق
گوردی تک بیر شمه خلقی امر لطفه مستحق
فاش اولوب موجیله تک بیر درّ اسرارون حسین
..
..
..
..
سطوتوندن خصم بی دین رزمگهده منفعل
بیر به بیر دعواده دشمن ضرب شستوندن خجل
تا نیامیندن چیخیب سرعتله سالدی متصل
خرمن بیداده اود تیغ شرر بارون حسین
..
..
..
..
جان آلیب نیروی شستوندن قلنج جانستان
بی امان اردوی دشمندن ائدیب سلب امان
دفتر هیجاده وه کی جانستان و جانفشان
تازه بیر صفحه یاراتدی مشق پیکارون حسین
..
..
..
..
رشتهٔ جانیله ائتدون ساتر دینی رفو
پاک ائدیب گردین صورا قانیله ائتدون شستشو
کیم قیامون اوسته عرض ائتدی ائداخ گل گفتگو
اولدی تک هیهات من الذله گفتارون حسین
..
..
..
..
حلقه حلقه غم دانیشدی نیت محصوریله
قلبیوی سالدی حصاره بیر گران منظوریله
لیک استحکامی سیندی جلوهٔ مسروریله
تا حصاریندا تجلی ائتدی کردارون حسین
..
..
..
..
تاپدی حرّیت سنیله هر کیم اولدی آشنا
کربلاده بو جهاندا سنله اولدی کربلا
اولدی بالله قید و بند ظلم ظالمدن رها
هر کیم اولدی دهریده بیر یول گرفتارون حسین
..
..
..
..
بیر تعامل باشلادون منظورون اوسته جانیله
منعقد ائتدون شروطون تپراق اوسته قانیله
تا محکدن سوز آچیلدی سنجش ایمانیله
آشکار اولدی سرای حقده معیارون حسین
..
..
..
..
سن او شهسن حافظ دین اولدی یارو یاورین
مدرک متقندی بو امره علی اصغرون
بیرق توحید اوجالدی قانه باتجاق لشکرون
خاصه آتدان دوشدی تا قولسوز علمدارون حسین
..
..
..
..
ماتمونده قاره چکدی عالمه دست غسق
گون دلینده اولدی جاری آیهٔ رب الفلق
باتدی افغانیله قانه شرق مقتلده شفق
سرخ فام اولجاق دم حلقیله رخسارون حسین
..
..
..
..
اولدی بیر امر خطیره اشقیا تا مرتکب
گورسنیب واحد وجودون تپراق اوسته منشعب
ووردی دستارین یئره باشدان پیمبر منقلب
اولدی غارت تا بلا دشتینده دستارون حسین
..
..
..
..
مقتله گلدی باجون زینب سرشک آلیله
عرض ائدیب قارداش یاتیبسان بس ندن بو حالیله
گلمیشم بو آخرین دیداره استقبالیله
ئولدور گرچه منی بو غملی دیدارون حسین
..
..
..
..
گلمه میشدیم کربلایه خسته دل گوز یاشیلن
بلکه گلمیشدیم گلنده یاریلن یولداشیلن
سن کیمین بیر یاریلن عباس تک قارداشیلن
هاردا قالموش بس ابوالفضل وفادارون حسین
..
..
..
..
نچه دم کی سنله اولماق زینبه اولدی مجال
متصل غمدن دانیشدی اولدی مأنوس ملال
نیله سین هر نیلدی گوزده سرشک افسرده حال
تاپمادی غمدن صورا سوز غملی غمخوارون حسین
..
..
..
..
زینب خاطر حسینیم ایله دلپاکه عطا
عمروجه اولسون دلینده یاحسین یا کربلا
ماتمونده نوحه یازسین آغلاسین دوتسون عزا
چون بولور مشمول لطفوندور عزادارون حسین
..
..
..
..
#حسینیه #دلپاک #حسینیه_مدح #حسینیه_شهادت #ترکی #زبدةالاشعار
نظر دهید