زبانحال حضرت صغری (س)
.
✍️ زبدة الاشعار ✍️
?: @nohe_torki
.
مرحوم قدرت اله نادری میانجی
.
جدّه جان عراقیدن
خوش خبر هاچان گلر
قورتارام فراقیدن
اُول شه جهان گلر؟
.
جدّه جان نظاره قیل گوزده کی بو یاشیمه
قورخورام بلا گله بو بلالی باشیمه
یوز وئره خطر گنه اوردا آل هاشمه
دئ نه وقته جدّه بس اکبر جوان گلر؟
.
گوگلوم ایستوری گوروم دل آچوبدی اصغریم
یا که طوی ائدوب گورک شاهزاده اکبریم
بیرده گول آچوب گورم نو شکفته گوللریم
مهربان سکینه می سویله نه زمان گلر؟
.
باور ایله جدّه جان طاقتیم اولوبدی طاق
یوخ یانمدا ائللریم ئولدورر منی فراق
گورموشم یوخودا من قانیلن دولوب عراق
گل تسلّی وئر منه ایندی جان آلان گلر
.
جدّه بو گجه ئوزوم گورموشم یامان یوخی
اصغرون بوغازینه ووردولار بلا اوخی
اود ووروبلا خیمیه یاندی قزلارین چوخی
بیرجه یالقوز اوستونه لشگرِ گران گلر
.
گورموشم بو خوابده نعش ساق و صول دوشوب
قان آخوبدی هر طرف تک وسطده یول دوشوب
نهر علقم اوستونه جدّه ایکی قول دوشوب
قُملار اوسته سو آخار مشکدن روان گلر
.
سرو تک دوشوب عموم تشنه سمت علقمه
کور اولان گوزوم دوشوب یرده قانلو پرچمه
ال آتوب منیم فلک چنگ ووردی سینمه
ایندیده بو سینه دن ناله و فغان گلر
.
گوردوم اوردا جدّه جان لنگه دوشدی قافله
اکبریم یارالانوب قان دولوبدی کاکله
ایپ قولوندا عمه مون میندی پاره محمله
دوغری اولسا بو یوخی هاردا عمه جان گلر؟
.
گوردوم اوردا جده جان دین ائوین یخوبدیلار
سینۀ امامته چکمه لی چخوبدیلار
قاسمون الینه چوخ قان حنا یاخوبدیلار
بس نجه بو حالیله شاه انس و جان گلر؟
.
گوردوم آی باتوب گوگون تار اولوبدی اولدوزی
روبرو گلوب منه اوندا مسلمون قزی
عرض ائدوبدی گور نجه خوار ائدوب فلک بیزی
یوخدی دادرس خدا ایندی شامیان گلر
.
جدّه جان فلک منه آتدی چون جفا داشین
گورمیه منیم کیمی بیرجه باجی قارداشین
ووردولار جدایه چون گوردوم اکبرین باشین
عمّه لر اسیر اولوب شمره ارمغان گلر
.
گوردوم آل هاشمی ایلیوبله قتل عام
قوملار اوسته باش گئدوب بی کفن قالوب امام
کهف سوره سین اوخور باشی نیزه ده امام
گون کیمی طلوع ائدوب خیمه سی یانان گلر
.
«نادری» بو واقعه شیعه صبرینی آلار
بیر مریضه قز نجه باشینه قرا سالار
گورمگه مسافرین بیرده محشره قالار
شامدن مدینیه غملی کاروان گلر
.
#سبک_مسلمون_شهادتی ( 5 سبک سینه زنی و زنجیر )
.
#حضرت_صغری
#جده_جان_عراقیدن_خوش_خبر_هاچان_گلر
#نادری
#ترکی
.
✍️ #زبدةالاشعار ✍️
?: @nohe_torki
واقعا نوحه های نادری عالی هستند.حرف نداره.یاده سالهای دور میفتم.
سلام و درود
ممنون از حضورتان
التماس دعا