حالات حضرت ابوالفضل در صحرای کربلا
وداع-شجاعت-شهادت
292 بیت
.
.
علومی تبریزی
.
.
اوّل دفتره یاز قادر قهار آدینی
یادایله هر عملنده حق دادار آدینی
.
ایسته سن دهرده عزت تاپاسان خیره چالش
ایله چوخ ورد زبان احمد مختار آدینی
.
حل ایدن مشگلوی محنت و غمدن قوتاران
ثبت ایله لوح دله حیدر کرار آدینی
.
حضرت فاطمه نی اون بیر امامی ایله یاد
دل پاکیله سوله عترت اطهار آدینی
.
حاجتین اولسا ایشین مشگله هر یرده دوشه
بیرده اخلاصیله سال یاده علمدار آدینی
.
آدی عباس و ابوالفضلدی مأیوس ایلمز
صدق اوزیله بیری ذکر ایتسه او سردار آدینی
.
دفتر مهر وفانی آچا هر کیمسه گورر
سطر اوّلده یازوبلار او وفادار آدینی
.
گرچه قارداشیدی شاه شهدایه امّا
جان ویرینجه او شهین ائتمدی اظهار آدینی
.
چاغوراردی اونی که سیّدی گاهی مولا
ادبیله آپاراردی شه ابرار آدینی
.
.
گوردی اطراف حسینی بوریوب فوج بلا
گلدی عرض ایلدی ای پادشه کرب و بلا
.
.
نه روادی آدیم عالمده علمدار اولسون
اگلشیم خیمه ده اولاد علی خوار اولسون
.
نیه لازمدی بو قولّار بو شجاعت بیله آد
منه بیله یاشاماخ خفّتیله عار اولسون
.
دولدوروب خیمه لری قزلاریوین العطشى
هانی بیر کیمسه بو اطفاله هوادار اولسون
.
سو بیابانی دوتوب اصغر عطشدن چابالور
نه روادور آناسی بیر بیله خونبار اولسون
.
شیریوین قولّارین آچ یوز چویریم میدانه
صولت شیر خدا دشمنه تکرار اولسون
.
ضرب شصتیله علی اکبریوین قانین آلوم
خواب غفلتده یاتان کیمسنه بیدار اولسون
.
چویریم شطّ و فراتین سویونی خیمه لره
سودان آسوده هامو عترت اطهار اولسون
.
لشگرین نظم و نظامین پوزوم ای شاه بوگون
کوفه ده زاده ی مرجانه عزادار اولسون
.
منم عباس اوزوم حیدر کرار اوغلی
زنده بو چولده گرک حیدر کرّار اولسون
.
اذن ویر قولّاری باغلو گتوروم سعداوغلین
دشمنین سیّدی لازمدی گرک خوار اولسون
.
هله من ئولمه مشم سن توکه سن گوز یاشوی
حوصله منده نقدر ای شه ابرار اولسون
.
.
شاه لب تشنه گوروب سینه سی چاک عبّاسی
او قدر قالمور ایده غصّه هلاک عبّاسی
.
.
کیمدور عبّاس دیدی عالم آرا غم سیز اولا
بیر گل اولماز چمن عشقده شبنم سیز اولا
.
گل رضا اولما حسینون دوشه هجران اودونا
اورگی یاره لنه یاره سی مرهم سیز اولا
.
سندن اوزگه منه بو عرصه ده یوخ پشت و پناه
اولما راضی بو بلا همدمی همدم سیز اولا
.
بیله اصرار ایلمه محرم اسرار حسین
وای او گوندن که حسین تک قالا محرم سیز اولا
.
سنه ال تاپسالا کیم صاحب اولار پرچمیمه
هانسی بیر شهدی که دعوا گونی پرچم سیز اولا
.
هله سن وارسان اوجالمور باجیمون ناله سسی
قوی هله اهل حرم خیمه ده ماتم سیز اولا
.
.
قلبیوی ایمدیکه قارداش بورویوب فوج ملال
گیت بو لب تشنه قالان قزلارا بیر مشگ سو آل
.
.
سس دوشوب خمیه ده میدانه او سالار گیدور
سو گتورماقه سوسوز قزلارا سردار گیدور
.
الده سو جامی سوسوزلار هامو صف باغلادولار
گوردولر سمت فراته او فداکار گیدور
.
چولقادی واعطشا زمزمه سی خیمه لری
بیر بیرین ائتماقا بو حاله خبر دار گیدور
.
حولیله بیر قوری سو مشگی سکینه گوتوروب
سمت عبّاسه گوزی یاشلی او ناچار گیدور
.
یتوب آغلار گوزیله دوتدی علمدار اتکین
بیلدی سو آلماقا سقّای وفادار گیدور
.
دیدی وار قرخا یاخین ای عمو عطشان قوناقیم
قاباقمدان صول و صاقه هامو خونبار گیدور
.
ویردی سو وعده سی سو مشگین آلوب دوشدی یولا
پرچم دینی دوتوب الده علمدار گیدور
.
حیرته دوشدی فلک قالدى تحیّرده ملک
کیمدی بو رزمگه جنگه سبکبار گیدور
.
تازه دن یوخسا اُحد جنگیدی یا حمزه دی بو
موته دعواسیدی یا جعفر طیّار گیدور
.
مصطفا دن دیه سن رخصت آلوب دعوایه
قلعۀ خیبره یا حیدر کرّار گیدور
.
ویردیله سس سسه بیردن حرم اهلی دیدیلر
سوسوز اطفاله سو آلماقه سپهدار گیدور
.
.
گتدی بیر آز گوروب آردیجه گلور ناله کنان
الى قویونوندا حسیندی دیور عبّاس دایان
.
.
گیدوسن ایمدیکه ای شیر شجاعت ایکیمیز
دور ائداخ بو دم هجرانیده صحبت ایکیمیز
.
سفر اوستونده سنی ساخلامارام غصه لی سن
ولی لازمدی بیلاخ وقتی غنیمت ایکیمیز
.
نه دویونجا سنی گوردوم نه یتوردوم سوزومی
ائتمه دوخ مجلس هجرانیده خلوت ایکیمیز
.
بورا خلوتدی بیر آز گل ایلیاخ راز و نیاز
آیرلوق وقتی سالاخ بیر اله فرصت ایکیمیز
.
آچ او قولّاریوی سال بوینوما آلنوندان اؤپوم
که چتین وصله یتاخ بیرده سلامت ایکیمیز
.
قول بویون اولماقی بیر وقت اولی حسرت ایدروخ
آتش حسرتیله یانّوخ او ساعت ایکیمیز
.
غصّه لنمه آتام اوغلی بو بیاباندا گرک
ایداخ اؤز دینیموزه شوقیله خدمت ایکیمیز
.
بویاناخ تشنه لب اوز قانیمیزه بو چولده
شافع امّت اولاخ روز قیامت ایکیمیز
.
بولار ایستولّه که اسلام آدی گتسون آرادان
ایدروخ بیز گینه بو قومه نصیحت ایکیمیز
.
.
قول بویون اولدولا باخدى بالالار آغلادیلار
گلدیلر شوره اسیر اولماقا بئل باغلادیلار
.
.
شه وزیرین یولا سالدی صف اشراره طرف
گوندروب بیر گلی گویا نچه مین خاره طرف
.
دیزی گلموردی قیتسون حرمه قارداشسیز
دوندی بیرده دالیه باخدی علمداره طرف
.
دیدی الله نجه گور گیتدى الیمدن کومکیم
بیرده سالم گله مشگل بو دل افکاره طرف
.
گلدی کفّارله عبّاس مقابل دایانوب
بیر دولاندوردی گوزین لشگر کفّاره طرف
.
شامده چوخلار ایشیتمیشدی ابوالفضل آدینی
دولانوب بی حرکت جمله او رخساره طرف
.
دوشدی سیر و حرکتدن هامو سسلر کسیلوب
باخدولار حیرتیله گوزلر او قولّاره طرف
.
اوجا شمشیر اوزون قول اوجا قامت دیدیلر
کیمده جرئت اولی گئتسون بیله سرداره طرف
.
.
بو خیالیله تانتدورسون او قومه اؤزینی
باشلادی بو دیلیله اهل جفایه سؤزینی
.
.
دیدی ای قوم منم حیدر کرّار اوغلی
آدیم عبّاسیدی سلطان وفادار اوغلی
.
بو حسین ابن علیدی بو گون اسلامه امیر
حضرت فاطمه نین قافله سالار اوغلی
.
حجّت الله بودور عالمه بوندان غیری
اولا بیلمز دوتا حق مرکزین اشرار اوغلی
.
منی سقّا ایلیوب تشنه قالان اطفاله
مرحبی ئولدورنین دیده سی خونبار اوغلی
.
ویرمیوب رخصت دعوا منه صد حیف سیزه
بیلدیرردیم که بو گون کیمدی سپهدار اوغلی
.
گر آچام ال بو قوشوندان بیری سالم قالماز
بیر به بیر طعمۀ شمشیر اولی کفاراوغلی
.
بیر فقط اذن ویروب سو آپارام خیمه لره
بو شهین تشنه دی چوخ چون سود امر زار اوغلی
.
تئز آچون سو یولونی گوزلوری بیر مشگ سویی
سروریم تاج سریم احمد مختار اوغلی
.
.
بیرنفر ایتدی جسارت ویروب عبّاسه جواب
دیدی تا وار بو قوشون سیزلره مشگل اولا آب
.
.
.
هر نه فرمایشین اولسا بیزه سیجادی بو گون
قوی کناره بو سوزی موقع دعوادی بو گون
.
یا یزیده ایلیه بیعت حسین ابن علی
یا بو لشگر داغلا جنگه مهیادی بو گون
.
بیر ولایتده اولانماز ایکی سلطان اولسون
آل سفیان هامو بو ایشلره دارادی بوگون
.
کوفه ده قتل حسینه ویرلوب فتوالر
بیزی آماده ایدن جنگه او فتوادی بوگون
.
مجری حکم امیروخ بو بیابانیده بیز
تابع امر یزیدوخ بیزه مولادی بوگون
.
ییز حسینی تانوروخ زاده ی پیغمبر دی
اعتنا ایلمروخ بیکس و تنهادی بو گون
.
.
ایشیدن وقتده بو سوزلری اول اشجع ناس
غضیله ویردی جوابین او گروهین عباس
.
.
دیدی درک سخنه مردم هشیار ایستر
گوهر معرفت و فضله خریدار ایستر
.
سیزده یوخ معرفت آثاری سیزی غفلتدن
ضرب شمشیر بو گون ائتماقا بیدار ایستر
.
او که بیعتدی اونی فاطمه دلبندی بیلر
جنگی بیر مسئله شمشیر شرر بار ایستر
.
تار و مار ایلماخ ایمدی بو سپاهی من تک
بیر قوی پنجه اوزون قولّى علمدار ایستر
.
سیز باشارسوز سو یولین باغلیون ای قوم ولی
آچماقون بازوی سردار فداکار ایستر
.
سرنگون ایلماق ایمدی علم کفری بوگون
من کیمی شیر خدا اوغلی سپهدار ایستر
.
.
دیدی بو سوزلری یوخ گوردی داخی جای درنگ
اؤزینی ویردی او دریا قوشونا مثل نهنگ
.
.
حمله ور چون سپه شامه او سردار اولدی
اوزگه هنگامه او صحراده پدیدار اولدی
.
.
نه قباقه گلن اولدی نه مقابلده دوران
وحشته دوشدی هامو قاچماقا ناچار اولدی
.
آتلو قاچدی آرادان قالدی پیاده آرادا
زاغ تک پنجۀ شاهینه گرفتار اولدی
.
گه آچوب گاه بوکوب بیر بیره ویردی قوشونی
صحنۀ کرب و بلا صفحه طومار اولدی
.
بسکه قولّار سالنوب قان توکولوب هر یاندان
قان دوتوب هر طرفی چشمه نمودار اولدی
.
قبض روحه ملک الموت تاپانموردی مجال
بسکه اعدا هدف تیغ علمدار اولدی
.
داغلوب مور و ملخ تک او بیابانه قوشون
بعضی آتلار آیاقی آتدا قالوب خوار اولدی
.
هر کسه غیضیله بیر باخدی او سردار غیور
یخلوب اوندا دیمه طاقت رفتار اولدی
.
دایانوب کوفیه القصّه قاچانلار قاباقی
کوفه ده خلق بو احواله خبردار اولدی
.
چخدولار باملره باخدولا صحرایه طرف
هره بیر گوشه ده باش آچدی عزادار اولدی
.
بیر فقط قاره بولود گوردوله صحرانی دوتوب
بسکه آفاق گوزونده هامونون تار اولدی
.
دیماق اولماز که علی صولتی یاددان چخدی
سهم حیدر دیوله وار یری تکرار اولدی
.
.
گه باخاردی قاچان اشراره ابوالفضل دلیر
گه دونوب خیمه لره دلده صدای تکبیر
.
.
گه عقابه دوتوب اوز دمبدم ایلردی خطاب
دورما همّت ایله بیر وقت غنیمتدی عقاب
.
تشنه سن سنده منیم تک بلورم یورقونسان
یوز چویر سمت فراته ایله تعجیل و شتاب
.
العطش ناله سی گورنه بوریوب خیمه لری
گور نه جام الده دوروب خیمه قباقینده رُباب
.
جدّ و جهد ایله فراته یتیشاخ سو گوتوراخ
یتوراخ خیمه ده بلکه اولا اصغر سیراب
.
راضیم جانیمی بو یولدا قویام لیک آلام
گوزی یولّاردا قالان عترت پیغمبره آب
.
ویرموشم وعده حسینون قزینا سو آپارام
ایمدی گوزلور یولومی گوزلری قلبی بیتاب
.
ویروری دمبدم اطفاله تسلّی آنالار
خیمیه ایمدی گلر سو بیله توکمه خوناب
.
.
مارد اوز خیمه سین ائتموشدی مکان مست و غرور
نه بیلوردی که ابوالفضل سالوب عالمه شور
.
.
ناگهان گوردی سپاهین اوجالوب همهمه سی
عالمی چولقالیوب شیون و فریاد سسی
.
دامن خیمه نی رد ایلدی گورسون که نه وار
گوردی وار عرصه ی میدانین عجب منظره سی
.
یوز قویوب قاچماقا لشگر ایتیروب اؤز اؤزینی
اؤزینه آختاروری مأمن و ماوا هره سی
.
گوز گوزی گورموری دوتموش او بیابانی غبار
اوزگه سس یوخدی بغیر از سپَهین ولوله سی
.
هی علمدى یخلور فوج نظامی داغلور
هی بدندی توکولور توپراقا گلمور نفسی
.
بیر اوزون قولّی دلاور دولانور ساقی تک
بادۀ مرگی ایچیردور ولی یوخ دادرسی
.
گورمیوب بیله جوان گردش چرخین آتاسی
دوغمیوب بیله اوغول دُور زمانین نه نه سی
.
بدنی تیتردی تا باخدی اوزون قولّارینا
الیک جنگ ائتماقا عبّاسیله آرتوب هوسی
.
گیوب اسباب جدل خیمه دن اولدی خارج
چکدی بیر نعره کسیلدى قوشونین هلهله سی
.
.
ماردی گوردی عمرسعد گلوب جسمینه جان
یوز دولاندوردی قاچان لشگره اول بی ایمان
.
.
قاچمیون ای سپه شام بیله وحشتیله
آتلانوب رزمگهه مارد اوزی جرعتیله
.
قایدون اوز یروزه صفلره ترتیب ویرون
ئولدورر ایندی ابوالفضلی بو گون خفّتیله
.
اوجادون طبل دهل همهمه سین افلاکه
گتورون عرصۀ میدانه اول عزّتیله
.
ماردین صاق طرفین دوتدی سران لشگر
صول طرفدن دوزلوب اهل جفا کثرتیله
.
پیش روده نچه سرکرده جلودار اولدی
گتدیلر حضرت عبّاسه طرف سرعتیله
.
تلّه چخدی بو هیاهوده حسین ابن علی
بیر باخوب مارده بیر قارداشنا حسرتیله
.
گوردی میدانیده یالقوز دایانوب سرداری
گلوری جنگنه دشمن ولی جمعیتیله
.
امر ایدوب زینب ایده خیمه ده سقّانی دعا
آناسی یوخدی تماشایه چخا عترتیله
.
آلدولار اللرینه اوغلی ئولنلر قرآن
توکدولر گوزیاشی گل یوزلره چوخ شدّتیله
.
.
خیمه ده آل علی مجلس ماتم قوردی
گلدی مارد یتوب عباسه مقابل دوردی
.
.
نور ظلمتله دوران دمده برابر او زمان
تلّدن چخدی تماشایه حرملر او زمان
.
چخدی کلثوم مناجاته دالندا بالالار
وان یّکادی اوخودی زینب مضطر او زمان
.
آخدی گوز یاشی رُبابین گوروب عبّاسی وحید
آچدی لیلا باشین آلدى اله معجر او زمان
.
سیره ارواح رسل عالم معناده چخوب
کربلا دشتی دولوب شورله یکسر او زمان
.
آناسی فاطمه گلدی آتاسی شیر خدا
او بیابانه نظر سالدى پیمبر او زمان
.
جنگ عبّاسی گوره چوخ فلک ناچاراً
نچه ساعت سالوب اول عرصه ده لنگر او زمان
.
.
مارد عباسه باخوب گلدی جسارتله دیله
دیدی نه شورش و غوغادی سالوبسان بو چوله
.
.
نه سالوبسان بو سپاهی بیله خوف و خطره
ماردم من منی بیر آلمادون اصلا نظره
.
بو قوشوندا دیمدون من کیمی نام آور وار
ماردی خلق برابر بیلوری مین نفره
.
من سدیف اوغلیام ایمدی سنی آتدان سالارام
کسرم باشیوی عبرت اولا اهلِ بصره
.
گیدرم خیمه ده ئولدورّم حسینون اؤزینی
اعتنا ایلمرم عورته یا سود امره
.
ویروب عباس جوابین دیدی باغلا دیلوی
آچ الین عیبدی هذیان دیماق اهل هنره
.
گلدی غیظه ویروب اوز تیغینه مارد حرکت
چکدی بیر نعره که چخدی سسی چرخ خضره
.
فرق عباسه ایله سرعتیله اندیردی
بیله فکر ایتدی هامو یخدی علمداری یره
.
دشمنه ویرمدی فرصت اسدالله اوغلی
مرحبا چرخ شجاعتده درخشان قمره
.
چکدی شمشیرینی گزدیردی باشی اوستونده
ماردین جانی دوشوب خوفه ال آتدی سپره
.
اندیرن وقتیده شمشیرین ابوالفضل رشید
چکدی باشین دالیا مرکبی سالدى خطره
.
یخلوب دوردی او دم لشگره یوز دوتدی دیدی
منه مرکب گتورون گئتدی امیدیم هدره
.
ماردی سالدی او سردار عقابین دوشونه
گزدیروب صاق و صولی دوندی باخوب خیمه لره
.
مارده ایستدی مرکب گتوره بیر ناکس
اودا قتله یتشوب یاندی وجودی شرره
.
ایشیدوب بو سسی قارداشی حسیندن عباس
ویرمه فرصت آتام اوغلی داخی اول بد سیره
.
دیدی تکبیر دولاندی او لعینین باشنا
لرزه سالدى او صداسی دل قوم کفره
.
یا حسین سسلدی ویردی باشنا بیر ضربت
نحس روحین چخادوب یولّادی نار سقره
.
.
نجه بیر شیر گیدر دستۀ روباه اوسته
حمله ور اولدی او دم لشگر گمراه اوسته
.
.
هر یانا یوز قویوب اول فارس هیجا یریدی
قاچدی دشمن پول آچیلدی او دل آرا یریدی
.
گنه اشرار جفاکاره بلانازل اولوب
ساقی بزم بلا رزمده تنها یریدی
.
غضب آلود گوروب لشگر فرعون اونی
یول آچوب جانب دریایه چو موسی یریدی
.
مشگ چگنینده حسینون علمی بیر الده
گوردی کفّار فرات اوستونه سقا یریدی
.
پرچمین گوردی حسین خیمه ده سسلندی دیدی
زینبیم گل باخ ابوالفضله تماشا یریدی
.
بیر بیره فوراً او دم مژده آپاردی بالالار
هره تلّ اوستنه قلبنده تمنّا یریدی
.
.
ذات یکتایه ازل حمد و ثنا ایله دیلر
صورا گوزیاشلی ابوالفضلی دعا ایله دیلر
.
.
تافراته قدمین قسویدی او سقای بنات
گوردی دریا کمی سرعتله گلور موجه فرات
.
ایتیروب فوراً اوزین دولدوروب اوجون او سودان
ایستدی شوقیله سیراب اولا اول پاک صفات
.
الى اوستونده سوگلدی دیله عباسه دیدی
منی محروم ایلیوب سیزلره بو چولده عدات
.
نیه آلدون الیوه ای الى مشگل لر آچان
اللرون جسمده قالسون داخی سالم هیهات
.
گوزلرون چون منه باخدی هدف ایللّر اوخا
سنه سوساقی کوثر گتورر وقت ممات
.
چکمه بیهوده اذیت سو آپارما حرمه
سوسوز اطفاله یتیشمز بو سو چکمه زحمات
.
بیرده عباس گوروب اصغرین عکسین او سودا
تا برودت گتوروب حاله تاپوب تازه حیات
.
اوزگه بیر مرحله دی درکنه عاجزدی عقول
آیری بیر حالیدی او حاله قالوب عالم مات
.
نجه ایچمز سویی بیر کس که یانور دل دوداقی
قالوب اوچ گوندی سوسوز شافع یوم عرصات
.
بوردا عبّاسه یتوب باب حوائج لقبی
یتیشر اوندان عزادارینه دائم حسنات
.
سویی توکدی یرینه ایتدی ملامت نفسین
معنی مهر و وفانی ایدوب اوُل دم اثبات
.
.
دیدی ای نفس اوتان رسم وفادن گچمه
دوتا دنیانی سو، شرم ایله حسینسیز ایچمه
.
.
مشگی دلدوردی سالوب چگننه همت ایلدی
چخدی دریادن او دم خیمیه رجعت ایلدی
.
گوردی یول باغلدی لشگر دایانوب آماده
اؤزون آمادۀ جنگ ایتدی شهامت ایلدی
.
حمله ور اولدی سپاهه یول آچوب دوشدی یولا
دشمنی بیر بیرینه ویردی قیامت ایلدی
.
اشقیاء ماه بنی هاشمون اطرافین آلوب
آتش جنگ اوجالدی گنه شدت ایلدى
.
ایستدی تئز یته اطفاله نیستانه دونوب
بسکه احساس خطر مشگه او حضرت ایلدی
.
سعدین اوغلی ایلدی لشگری دعوایه حریص
شمر اعدانی هجوم ائتماقا دعوت ایلدی
.
جنگه مشغولیدی عباس یدالّه اوغلی
بیر زنا زاده همان حالده فرصت ایلدی
.
گلدی ویردی دالیدان صاق قولونی ایتدی قلم
سوسوز اطفاله او بی شرم خیانت ایلدی
.
آلدى شمشیرینی عباس جوان صول الینه
گنه دنیانی او ناکسلره ظلمت ایلدی
.
.
دوردی بیر باخدی کسیلمش قولونا حسرتیله
گوردی توپراقه دوشوب قانی گیدور سرعتیله
.
.
.
دیدی ای قول بویادی اهل جفا قانه سنی
چوخ جسارتله بو گون سالدولا میدانه سنی
.
منه چوخ گوردوله بو چولده حیاسیز لشگر
بیله یاندوردولا بیر آتش هجرانه سنی
.
گلمه چوخ نالیه قان آغلاما دور ایلمه غم
چونکه قربان ایلدیم اصغر عطشانه سنی
.
سسی گلمز تک الین ایندی رفیقونده گلر
یتورر محضر پیغمبر رحمانه سنی
.
بیر دایان یولّارام ایندی سنه یولداش صولومی
قویمارام تک گیده سن محضر جانانه سنی
.
بدنیمده بیلوسن سن منه بال پریدون
لیک توش ایتدی قضا ظلم فراوانه سنی
.
بیلورم بو یولی ایندی گله جاق شاه شهید
بیلسون آخرده فدا ایتدیم او سلطانه سنی
.
سنی ای ال الى اوسته او لب عطشان آلاجاق
اوندا شامل ایدجاق رتبۀ شایانه سنی
.
قان ریزین گوستر اونا تا تاپا السیز بدنی
گتوروب ملحق ایده جسم پریشانه سنی
.
.
بیرده دوندردی یوزین دشمنه اول اشجع ناس
دیدی باک ایله مز عالمده ئولومدن عباس
.
.
صاق الیم دوشدی ایدر حقّه حمایت صول الیم
صاق الیم تک ایدر اوز دیننه خدمت صول الیم
.
بیله فکر ایله میون همّتیم ای قوم آزالار
اولوب آماده بو یولدا ایده همّت صول الیم
.
صاق الیم گئتدی بو یولدا هامو ظلمه دوزرم
چتین اولماز نقدر گورسه اذیّت صول الیم
.
بوسو مشگی منه ای قوم امانتدی بیلون
اودی هر لحظه ایدر حفظ امانت صول الیم
.
ستمیله قلم ایتدوز بو رشیدین صاق الین
گنه بو حالیله ایلر منه نصرت صول الیم
.
اَل نَدى باشیمى قربان ویررم بو یولدا
یوخ غمیم قالماسا جسمیمده سلامت صول الیم
.
حفظ مشگ اوسته صاقیم دوشدی مسلّمدی دوشر
شه دینه ایده اثبات محبّت صول الیم
.
.
بو بیاناتی دییَن وقتده فرزند علی
قلم اولدی ستم و ظلمیله ناگه صول الى
.
آلدى شمشیریله مشگی دیشه امّا علمی
یخولا قویمادی بس نیله دی آیا علمی
.
کسیلن قولّاریله ساخلادی آغوشینده
خیمه دن تا گوره گوز یاشلی صبایا علمی
.
نجه آغوشه باسار اوغلونی ایستکلی آنا
سینه سنده ایله حفظ ایتدی همانا علمی
.
گوز تیکوب بیلدی باخور خردا اوشاقلار علمه
سعی ایدور قویمیا دوشسون یره سقا علمی
.
نه علم صاحبی تک قانیله الوان اولموش
گورمیوب چشم زمانه ایله زیبا علمی
.
نه علم گه اَگیلور صورت عباسی اؤپور
خبر مرگی ویرور گوشینه گویا علمی
.
نه علم جلوه لنور عرصۀ میداندا چوماه
هر طرفدن گوروری اهل تماشا علمی
.
کربلا دشتی او دم منظرۀ محشریدی
هدف ائتمشدی هامو لشگر اعدا علمی
.
.
اؤزی راضیدی دگه دیدۀ پر اشکنه اوخ
ولی اول معرکده دگمیه سومشکینه اوخ
.
.
دیدی لشگر بو قدر قلبیمی قان ایله میون
بوندان آرتوخ ستم و کینه عیان ایله میون
.
سیز که دنیانی دوتوب دینی آتو بسوز اما
سو کیمی قانیمی توپراقه روان ایله میون
.
شاهباز فلک همّتی بی پر ایلدوز
هر طرفدن هدف تیغ و سنان ایله میون
.
منى السیز گوروسوز جرعتیله ال آچوسوز
شرم ایدون چوخ منی بی تاب و توان ایله میون
.
ایمدیکه یاغدوروسوز اوخلاری ای فرقۀ دون
یوخ سوزوم کینه زی دللرده نهان ایله میون
.
ویرون اما یارالی سینمه اوخلاری تمام
ولی سو مشکینی اوخلاره نشان ایله میون
.
.
دل سقّایه گینه عالمی تنگ ایله دیلر
ناگهان مشکینی آماج خدنگ ایله دیلر
.
.
دگدی سو مشکینه اوخ چخدی آغیر قیمته سو
اولمادی حیف اولا قسمت حرم عصمته سو
.
سو توکولدی یره سیراب ایلدی توپراقی
یاندی سقّا کیمی آخر شرر خجلته سو
.
اؤزی سو ایچمدی تا که ایچه قارداشی حسین
آپاروردی حرم شاهه همان نیّته سو
.
دگه راضیدی گوزوندن او زمان دشمن اوخی
دگمیوب مشگه یتیدی او سوسوز عترته سو
.
بیر اوزی بیلدی بیر الله که نحاله قالدی
بیرده قارداشی که سالمشدی اونی زحمته سو
.
ایکی قول ویردی که بیر مشگ سو آلسون حرمه
ویرمدی لشگر بی رحم او باغیرته سو
.
آتاسی ساقی کوثر دیدی معناده اوغول
دوش آتوندان یره گل آلما داخی منته سو
.
.
گوردی بیر اوخ هامو زحمتلرینی ایتدی هدر
داخی گئتماقه خیامه ایلدی صرف نظر
.
.
دیدی ای مشگه دگن اوخ نه جسارت ایلدون
قارداشمدان منی بو چولده خجالت ایلدون
.
گئتمرم خیمه لره بیرده بو چولدن الى بوش
اصغرین وصلینه یاخشی منی حسرت ایلدون
.
نقدر سینمه دگمشدی بو میداندا یارا
سن اولاردان منه مافوق خیانت ایلدون
.
یخا بلمزدی منی لشگر اشرار یره
سن عناد اهلینه بو عرصه ده نصرت ایلدون
.
حفظ مشگ اوسته ایکی قولّاریم اولموشدی قلم
تازه دن بو یارالی قلبی جراحت ایلدون
.
بو سو مهریّۀ زهرائیدی اشرار دوتوب
حقّ پیغمبری سن یاخشی رعایت ایلدون
.
گوزلریم قانیله دولموشدی بو صحراده منیم
گورمدیم یاخشی کمین ائتماقا فرصت ایلدون
.
نیه بس گوزلریمه دگمدون ای تیر بلا
بیر سو مشگین منه چوخ گوردون اصابت ایلدون
.
.
سوز بیوکدی بیریسی باخمادی سقا سوزونه
ناگهان ویردولا بیر اوخدا او شهلا گوزونه
.
.
یوخیدی اللری بیردم آلا لشگر قاباقین
دوتا پیکان یولونی نیزه و خنجر قاباقین
.
اولدی آراسته ظلم ایلماقا اهل جفا
کسدیلر چوخلار او ساعتده او سرور قاباقین
.
اوخ ویران نیزه آتان بیر بیره یکسر قارشوب
دوتان اولمادی بیری لشگر کافر قاباقین
.
سرو تک قامت موزونی عیان اولدوقجا
صف به صف باغلادی اوخلار او هنرور قاباقین
.
لفظ کَاالقنفذی مقلتده یازولّار گچورم
هامو دوتموشدی او سردار دلاور قاباقین
.
نه ایمش کرب و بلانین او بلاسى الله
باغلادی لشگر دون زاده ی حیدر قاباقین
.
خولی خنجر اله آلمشدی سنان الده سنان
شمر شمشیریله دوتموشدی او مضطر قاباقین
.
حرمله غیضیله بیر تیر و کمان آلدى اله
گوردی بیکس، کسوب اول بیکس و یاور قاباقین
.
بیلدی بیر صاف یری یوخ سجده گهندن ویروب اوخ
آخدی قانی گوزونون دوتدی سراسر قاباقین
.
دوشمدی اوخ یره آلنندا قالوب یازهرا
هلهله اولدی دوتوب قوم بد اختر قاباقین
.
دیزینی قوزادی دوتدی اوخی ویردی حرکت
بلکه قان دوتمیه اول صورت احمر قاباقین
.
اوخ چخوب دوشدی عمامه یره قالدی باش آچوخ
کسدی روباه زمان شیر غضنفر قاباقین
.
تاپدی فرصت بیر عمود الده یتیشدی نوفل
گور نه منظوریله کسدی او دلاور قاباقین
.
.
چوخ دیر بو سوزی زوّاری یارالی دلیله
دشمن ئولدوردی سنی هم الیله هم دیلیله
.
.
او زنازاده دیدی سنده کی قدرت هانی بس
او شجاعت او شهامت او رشادت هانی بس
.
سن مگر ایلمه مشدون قوشونا عرصه نی تنگ
ندن آرام دوتوبسان او جسارت هانی بس
.
سن دگلدون مگر ای شیر خدانین بالاسی
ایلمشدون بیزه بو دشتی قیامت هانی بس
.
منه گوستر گوروم اول صولتیوی سطوتیوی
هارا گتدی هانی بس سنده کی صولت هانی بس
.
نیه گلمور سنون امدادیوه بس شیر خدا
سندن حیدرده اولان مهر و محبت هانی بس
.
هانی سو مشگی اوزون قولّاریوا بس نه گلوب
آپاروردون سویی قارداشه بو ساعت هانی بس
.
.
گئتمزدی دله سقّانی نهایت یاراسی
قلبین اما یارا دؤندوردی شمادت یاراسی
.
.
دیدی افسوس گلوب گورمدون ای شوم دنی
اللریم جسمده سالم بو بیاباندا منی
.
سنده بو چولده گورردون او زمان قدرتیمی
یتیرردوم بو گیدن قافلۀ شومه سنی
.
حیف اولا ایمدی گلوبسن که دوشوب صاق و صولوم
قان دوتوب گوزلریمی گورمورم ایندی گلنی
.
او زنازاده ایشتدی بو سوزی ویردی جواب
ایدرم ایندی دل افسرده آتان بوالحسنی
.
قولّاریم وار بدنیمده منیم ای صاحب علم
قویمارام گوزلیه یول سبط رسول مدنی
.
سالّام آتدان سنی ایندی یره بو لشگر آرا
چکرم داغ دل امّ بنینه علنی
.
دیدی بو سوزلرینی ویردی عموده حرکت
باش آچوخ پیکر بیدست، ووران خصم دنی
.
ایله دگدی او آچوخ باشه عمود آهن
که سنوب کاسۀ سر سولدی حسینون چمنی
.
ممکن اولمادی دایانسون داخی مرکب اوسته
هلهله ایتدیلر گلدی یره السیز بدنی
.
.
کیمدی بیلسون که نجه دوشدی او سردار یره
علمیله یخلوب قولسوز علمدار یره
.
.
ال که وار جسمده نعمتدی بیوک قیمتی وار
هامویه مسئله روشندی نچه علّتی وار
.
گوزی حفظ ایلین عالمده خطردن الدور
اولسا السیز بیری دائم غمی وار حسرتی وار
.
یخلاندا بیری اوّل سپر ایلر الینی
گوزین حفظ ائتماقا هر کیم اولا بو عادتی وار
.
ایله بیر لحظه مجسّم او رشیدین حالنی
گور دوشنده یره آتدان نه بیوک زحمتی وار
.
نجه دوشدی یره آتدان یارالی پیکریله
قاباقا دوتماقا ال یوخدی اوجا قامتی وار
.
بند اولوب بیر ایاقی حلقۀ زینه او زمان
یوزی یرده سورونوب بو خبرین صحّتی وار
.
باش یارا گوز یارا آنّی یارا پیکر دولی اوخ
کیمدی بیلسون او جوانین نه چتین ساعتی وار
.
انتقام آلماقا لشگر توکولوب هر یاندان
وصفنه نه دلمون نه قلمون قدرتی وار
.
.
ایله بیر وقته که قان ایله دیلر گوز یاشنی
خاطریندن گینه محو ایلمدی قارداشنی
.
.
دیمدی یتدی خزانه ستمیله چمنیم
قالدی آتلار ایاقی آتدا یارالی بدنیم
.
دیمدی قولاریمی اهل جفا ایتدی قلم
بیر نفر دادرسیم اولمادی بو چولده منیم
.
دیمدی دگدی آچوخ باشیمه بو چولده عمود
گوزومه ویردیلار اوخ آرتدی ملال و محنیم
.
دیمدی قالدى وطنده گوزی یولّاردا آنام
اونا زندان اولی بوندان صورا ملک وطنیم
.
دیمدی قالدی بو دنیاده یتیم عبدالله
صرصر ظلمیله سولدى سمن و یاسمنیم
.
دیمدی ایندی کسلّلَر یارالانمیش باشیمی
بدنیم یرده قالوب عاقبت اولماز کفنیم
.
دیدی الله بو بیاباندا حسینم قالدی
بو قدر دشمنیله نیلر او شاه زمنیم
.
.
یخلاندا یره آتدان او داغلمش بدنی
گوردی چشم دلیله اوردا خانم فاطمه نی
.
.
آچوب آغوشنی بیر عاشق مستانه کیمی
دوزولوب دانه ی اشگی یوزه دردانه کیمی
.
گه باخور قانلو باشا گه کسیلن اللرینه
شوریله گه دولانور باشینه پروانه کیمی
.
گه دیور باشه یتیشدی بالا دنیاده غمون
آناوام گلمه مشم یانوا بیگانه کیمی
.
بو آتان شیرخدادی که سنه سو گتوروب
گور نه عشقنده دوشوب چوللره دیوانه کیمی
.
گل گیداخ گوزلوری طاها یولووی جنّتده
گوزلری اشگیله دولموش دولی پیمانه کیمی
.
اوزیوی قارداشوا شوقیله قربان ویردون
ایتدیله تیغله شان شان بدنین شانه کیمی
.
سنه قربان گل اوغول قالما حسیندن نگران
گلر آردنجا اودا بو یولی رضوانه کیمی
.
.
بیلدی اوغلوم دیدی زهرای دل افکار اونا
اودا مولاسینه قارداش دیه اولماز بو خطا
.
.
سسلدی قارداش حسین گل یره سقا یخلوب
ظلمیله معرکۀ جنگیده تنها یخلوب
.
پیشواز ایله مسم عفوایله من معذورم
گل اوزون گور نجه سقّا یره آیا یخلوب
.
قولّاریم بیر طرفه بیر طرفه سو مشگیم
پرچمیم بیر یانا چون لالۀ حمرا یخلوب
.
یخلاندا یره من حالیمه لشگر گولدی
ایله بیلدیم که حسین باشیمه دنیا یخلوب
.
صون نفسده یوزیوی گورمگه چوخ وار هوسیم
یره چوخ زحمتیله دوغرانان اعضا یخلوب
.
سالمیوب گوزدن ابوالفضلی آتام شیر خدا
گوروب احوالیمی بیر سمتده زهرا یخلوب
.
ای قلم ساخلا سوزی بوردا مگر بیلمورسن
خیمه ده تا ایشیدوب بو سسی مولا یخلوب
.
بئلی گلمور که چخا مرکبه میدانه گله
چون رکابین دوتان اوُل زینب کبرا یخلوب
.
شه وزیرین باشی اوسته نجه گلدی بلمم
تاپوب عبّاسنی اوُل وارث طاها یخلوب
.
.
.
#عباسیه #علومی_تبریزی #ترکی #زبدةالاشعار #عباسیه_شهادت #عباسیه_شجاعت
نظر دهید