قالمیشام دشمن الینده یا حسین فریاده گل #مسلمیه_شوری_تبریزی

شهادت و زبانحال حضرت مسلم (ع)
..
..
..
مرحوم شوری تبریزی
..
..
..
قالمیشام دشمن الینده یا حسین فریاده گل
سال عم اوغلون مسلمی یاده اماندور داده گل
..
..
..
کوفه اهلیندن ازلده عهد و بیعت آلمیشام
سندیریلار بیعتى من ایمدی یالقوز قالمیشام
سندن اؤتری باشیمی بیله بلایه سالمیشام
سودیدور باش ویرماقیم یوخدور ضرر سوداده گل
..
..
..
ویرمیشم جانانیمه وعده اؤزوم روز ازل
من سنون دشمنلرونلن ایلیم جنگ و جدل
گل تماشا قیل اؤزون ای نور پاک لم یزل
گر چه عین اللهسن آگاهسن معناده گل
..
..
..
نوشدور یتسه منیم هر قدر یاره جانیمه
ریزه ریزه دوغرانا جسمیم باتام اؤز قانیمه
فخردور بیله ملاقات ایلیم جانانیمه
روسفید اولام حسین جان محضر زهراده گل
..
..
من غریبم یالقوزام یوخ یار و یولداشیم منیم
وار عم اوغلوم نه اوغول نه قوم و قارداشیم منیم
عارضه جاری اولور حسرتله گوز یاشیم منیم
آختارور مولا سنی بو عرصۀ هیجاده گل
..
..
..
دوره می لشگر آلوب چوخ تنگ اولوب دنیا منه
شیر یزداندور عموم عجز ایتمرم من دشمنه
بیر نفر یوخدور کومک گوز تیکمشم آخر سنه
دادیمه بیر کیمسه یوخ یتسون اوزون امداده گل
..
..
..
هر گلن سسلر وورون اولماز دین یوخ وورمیون
بو کومکسیز آرخاسیزدی رحم ایدون چوخ وورمیون
یوخ بدنده صاف یری بیر بیله سیز اوخ وورمیون
جانیوه اولسون قسم گلمز یارام تعداده گل
..
..
..
نه آنام واردور یانیمدا تا یارامی باغلاسون
نه باخیم وار سس چکوب اؤز سینه سینی داغلاسون
نه قزیم وار زلفونی ایتسون پریشان آغلاسون
باری لطف ایت بو غریبی سال اوزون بیر یاده گل
..
..
..
زحمت اولسا گر سنه گوندر رشید عبّاسیمی
عون و جعفر لن عم اوغلوم شاهزاده قاسمی
اوخشاسونلار بیر منی دوتسونلا یاخشی یاسیمی
قویماسونلا نعشیمی بو صفحۀ غبراده گل
..
..
..
من سنه قربان اولوم ای خامس آل عبا
گلمه بو شهره بو اهل کوفه ده یوخدور وفا
وار بولاردا نه دیانت نه لیاقت نه حیا
ایتماقا امّا تماشا قوم بد بنیاده گل
..
..
..
گر قبول اولسا بو اهل بیته «شوری» خدمتون
اؤزلری ایلر روا دنیا و عقبا حاجتون
لیک فانی دور جهان عقبایه اولسون همّتون
عرض قیل داده آقاجان محشر کبراده گل
..
..
..
#مسلمیه_شوری_تبریزی #ترکی #زبدةالاشعار