من غم اسیری شمره گرفتارم آغلارام #حضرت_رقیه_خوندل_تبریزی

خرابه شام
زبانحال حضرت رقیه (س)
.
.
مرحوم خوندل تبریزی
.
.
من غم اسیری شمره گرفتارم آغلارام
ویرانه یرده درده خریدارم آغلارام
.
هر چند شامون اهلی بیزی خارجی بولور
من نور چشم احمد مختارم آغلارام
.
بیخود دگل خرابه نشین اولماقیم بابا
افتادۀ جنایت اشرارم آغلارام
.
ظاهرده خوار ایدر بو اسیر اولماقیم منی
اما عزیز عترت اطهارم آغلارام
.
چون پا پیاده شمر منی چوخ دولاندروب
بیر گل کیمی اسیر غم خارم آغلارام
.
بیخود دگل که لاله کیمی قان اولوب گوگل
مقهور ظلم دشمن خونخوارم آغلارام
.
عفو ایت عرایضیم سنه گر اولسا دردسر
یوخ چاره عرض حالیمه ناچارم آغلارام
.
هر بیر غم و ملاله بو یولدا دایانمشام
یورقون یارالی خسته دل و زارم آغلارام
.
بیر اولدوزام یاخیندی آخام چرخ شامده
چون صبح اولونجا دیده سی بیدارم آغلارام
.
یانّام چراغ آهیمله صبح اولونجا من
زلفیم کیمی انیس شب تارم آغلارام
.
بیر عمر اکبر آیریسیام یولدا گوزلریم
نیلوم بو یرده حسرت دیدارم آغلارام
.
شهزادیم خرابه اولوبدور نشیمنیم
دائم بو یرده دیده سی خونبارم آغلارام
.
قتله یتیشدی ظلمیله یاورلریم منیم
منده اسیر لشکر اشرارم آغلارام
.
شهزاده اکبریم منی گوزدن سالوب اودور
گلمور عیادت ایتماقا بیمارم آغلارام
.
بیر تار طرّه سندن اولوب پای بند دل
مقهور تار زلف سمن بارم آغلارام
.
بیر بلبلم که گلشنیمی ظلم سولدوروب
غم دیده و شکسته دل و زارم آغلارام
.
از پا فتاده بیر قیزی دشمن ندن ؤورار
گورمولّه بیر غریب دل افکارم آغلارام
.
بولدوم نیه یتیم اولانون اولماز عزّتی
من بیر یتیم واقف اسرارم آغلارام
.
جاندان عزیز قارداشیم اکبر ئولوب منیم
عمریم نقدر اولسا عزادارم آغلارام
.
بیر گون بو اهل کینه منی غصّه مرگ ایدر
ئولّم قتیل شمر ستمکارم آغلارام
.
«خوندل» یازار بو نوحه نی هر دم بیان ایدر
خدمتگذار سیّد ابرارم آغلارام
.
#حضرت_رقیه #خوندل_تبریزی #حضرت_رقیه_شهادت #ترکی #زبدةالاشعار