ای شامیده ویرن جان ای مه لقا رقیه #حضرت_رقیه_تابع_تبریزی

آرزوی زیارت قبر حضرت رقیه (ع )
.
.
مرحوم تابع تبریزی
.
.
ای شامیده ویرن جان ای مه لقا رقیه
واردور گوزل آدوندا درده دوا رقیه
.
.
آز سنیله گوروبسن چوخلی غم و مصیبت
علت اودور که شهلر قبرون ایدر زیارت
شاماتیده تاپوبسان عالی مقام و شهرت
دین اهلینه اولوبسان بیر رهنما رقیه
.
.
قلب شریفون اولدی تیر غمه نشانه
عاجزدی دل گتیرسین درد دلون بیانه
آج قالماق اولدی باعث یا ضرب تازیانه
سالدى سنی ایاقدان ای مه لقا رقیه
.
.
دست جفادن اولدون عمرونده دلشکسته
چوخ ظلملر گوروبسن یولاردا ناقه اوسته
آخر گتیردی دشمن شاماته دست بسته
جور جفادن اولدون اوردا رها رقیه
.
.
آز سنیّله رقیّه دلدن یارالیسان سن
شهزاده سن ولکن باشی بلالیسان سن
بسدور سنه بو عزت اکبر مارالیسان سن
اکبر دیدون ئولنجه باخدون یولا رقیه
.
.
هجر علی اکبر سالدى سنی فشاره
اما بابان وصالی ادتدی او درده چاره
ترک ایلدون جهانی گرچه اورکده یاره
اما جهاندا اولدون مشگل گشا رقیه
.
.
چوخداندی وار باشیمدا قبرون ایدم زیارت
صد حیف ال یتیشمیر قالمیش اورکدہ حسرت
ای معدن سخاوت گل بیر ایله عنایت
ویرانه ده دوتاخ بیز بزم عزا رقیه
.
.
بزم عزاده هر آن من آه و زاره گلم
گورماقه خردا قبرون ایتسن نظاره گلم
گر للف ایدوب چاغورسان مهمان دوباره گلم
گوزده سرشک دلده مین آه و وا رقیه
.
.
گر تابع دین اولسا زوار بیرجه شامه
عمرونجه شکر ایتسه باجادی لاینامه
گورسه گوزل مزارون بالله یتر مرامه
قبروندن آلام اوندا بیر کربلا رقیه
.
.
#حضرت_رقیه #تابع_تبریزی #حضرت_رقیه_مدح #ترکی #زبدةالاشعار #حضرت_رقیه_شهادت