زبدةالاشعار

نیرۀ چرخ حیا زینبیدی زینبیدی #زینبیه_معزی_اردبیلی

حالات حضرت زینب (س) از #خروج_مدینه تا #ورود_مدینه
47 بند
.
✍️ زبدة الاشعار ✍️
.
🆔: @nohe_torki
.
.
مرحوم #معزی_اردبیلی
.
نیرۀ چرخ حیا زینبیدی زینبیدی
نائبۀ خیر نِسا زینبیدی زینبیدی
.
.
ذرّیده غوغا ایلین لوحه تماشا ایلین
ذِیلینی امضا ایلین عهدینه ایفا ایلین
دینینی احیا ایلین دشمنی رسوا ایلین
ظلمینی افشاء ایلین روحینه ایذا ایلین
صاحبۀ مهر و وفا زینبیدی زینبیدی
.
.
دُخت علی اُخت حسن فاطمه دن دوز صود اَمَن
اللّرین حورالر اؤپن صحنینی مریم سوپورَن
نطقده نطّاق زمن سینه سی صندوق سخن
روحی حسینیله گزن عقدی گونی غرق محَن
عاشق شاه شهدا زینبیدی زینبیدی
.
.
سیرت و صورت ده زَکی سینۀ زهرا بزَه کی
دُرّ عطوفت مَحَکی سفرۀ عصمت نَمکی
ایلین حیران ملکی نهضت خونین کمکی
آهی پوزان نُه فلکی اولمیان هیچ زای اَمکی
شیر زنِ کرب و بلا زینبیدی زینبیدی
.
.
آدین علی خاطرینه رَبّی الاَعلا بَگنوب
فاطمه نی ختم رُسُل زینبی زهرا بَگنوب
همت والاسین حسین سیّد بطحا بَگنوب
منطیقنی خطبه سینی مردم دنیا بَگنوب
پیکرۀ صدق و صفا زینبیدی زینبیدی
.
.
#ماه_رجب ده دلِ شب ماه سپهر عظمت
قافله ده عزّتیلن کعبیه ایتدی حرکت
ترک ایلیوبدور وطنی منبع خیر و برکت
عشق مناسینده ویره فدیه ایکی ماه صفت
بَسلیَن اسلامه فدا زینبیدی زینبیدی
.
.
پرچم اسلامی هله وَقریلن عبّاس دوتوب
شقّه سینی منّتیلن خضریله الیاس دوتوب
معجر زَردوزین ایله طاهرۀ ناس دوتوب
چرخ حسدیندن شررِ غمده یانوب یاس دوتوب
طیّبه ناموس خدا زینبیدی زینبیدی
.
.
کعبه ده زهرا بالاسی ایستَه مَه دی قان توکوله
کرب و معلّاده دیدی اوستومه پیکان توکوله
وورماقا چوخ یاره منه فرقۀ عدوان توکوله
اوخ یاراما ظهر چاقی زلف پریشان توکوله
زلفه یاخان قاندان حنا زینبیدی زینبیدی
.
.
مکّه دن آیریلدی حسین اولدی حزین بیت الحرام
قانلو بیابانه گلوب قافله امر ایتدی امام
یرلرینی ویردی نشان قوردی اباالفضل خیام
چادرینه قویدی قدم زینب مرضیّه مقام
محترمِ آل عبا زینببدی زینبیدی
.
.
خیمه سراده اوجادان آیۀ قرآن دیولور
اکبر هاچان ویرسه اذان جانینه قربان دیولور
صحبته دیل گلسه اَوَل صحبت جانان دیولور
کلمۀ قارداشدا هله زینبه بش جان دیولور
مظهر اُمّ النّجبا زینبیدی زینبیدی
.
.
پَرلری سالم دور هله عشقلی پروانه لرین
نازینی عبّاس چکور خورداجا دُردانه لرین
حفظ ده ساخلار گیجه لر خانه و کاشانه لرین
باشلارا آسوده وورور اهل حرم شانه لرین
آمره بی چون و چرا زینبیدی زینبیدی
.
.
لیلۀ عاشور گلوب دشت نواده قاباقا
اکبری لیلا بزه دی قویدی دوداقین دوداقا
صود اَمرینده بیر آنا یاتمادی آلدی قوجاقا
خواهرِ مظلومِ حسین دوردی یریندن ایاقا
دینه ایدن دِینین ادا زینبیدی زینبیدی
.
.
فنّ جدل وئرسون ئوزی گلدی شیرین دِللّرینه
جان کیمی آغوشه چکوب شانه ووروب تِللّرینه
خورداجا شمشیرلرین بند ایلدی بِللّرینه
پس ایکی قلخان گتوروب ویردی گوزل اَللّرینه
همّتی بی ریب و ریا زینبیدی زینبیدی
.
.
قیلدی بیان مشق ایلیون بیر بیره شمشیر وورون
عرصه بیلون چادروزی نعرۀ تکبیر وورون
تا سحر اولسون سپهِ کفره گیدون تیر وورون
کیم قاباقا گَلسه آچون پنجوزی چون شیر وورون
تا سیزه بیلسونلر آنا زینبیدی زینبیدی
.
.
ذّریده کی لوحه ده وار ایتمیشم اعلان دایوزا
عالی قیامینده ایدم خدمت شایان دایوزا
امر ایلیوب یولّا فدا حضرت جانان دایوزا
قسمتیم اولسا وئرورم من ایکی قربان دایوزا
زینت بزم عُرفا زینبیدی زینبیدی
.
.
زینت ایدوبدور بزه دی خیمه ده قربانلارینی
بیر بیرینه چالدی اولار اوخ کیمی مژگانلارینی
گتدی سحر قارداشینون یانینه اوغلارینی
عشق مناسینده فدا ویرمه گه عطشانلارینی
خواهر انگشت نما زینبیدی زینبیدی
.
.
عرض ایلدی قویما منی اشک ملاله بویانیم
محضرووه گلدیم حسین شمع محبّتده یانیم
تک بو ایکی نو گلیدی الّی بش ایلدی اولانیم
اذن جدل وئر بولارا باشووه قارداش دولانیم
سنده گورن لطف و عطا زینبیدی زینبیدی
.
.
زینبنون سوزلرینه میر حرم سامع اولوب
قانلو منایه بالالار عازم اولا مانع اولوب
رخصت دعواده خانم مدرکیلن قاطع اولوب
حاکم اولوب عشق آرادا هر ایکی سی تابع اولوب
هر غمه دین اوسته رضا زینبیدی زینبیدی
.
.
قتلگهَه گیتسون اولار ذوقیله باغلاندی کمر
یوللادی میدانه دلِ حضرت زهرایه ثمر
گوزلره گورسندی گوزل چهره لری مثل قمر
اندیله میدانه طرف واهمه سیز الده سپر
چون اولارا راهنما زینبیدی زینبیدی
.
.
وحشته کفّاری سالوب غیضیلی نظّاره لری
حمله ایدوب زین اَبین دلبر و مهپاره لری
گوشیده تیترَردی ایکی حیدری گوشواره لری
ووردی اولار یاغی لره کاری اولان یاره لری
خیمه ده مشغول دعا زینبیدی زینبیدی
.
.
جنگ ایله دی دشمنیلن پای پیاده بالالار
ووردیلار اوخ یاره لنوب قانلو مناده بالالار
قان آخیلوب گیتدی توان قالدی آراده بالالار
چالدیلار، حاصل ال ایاق بحر بلاده بالالار
گوزتیکن افسرده یولا زینبیدی زینبیدی
.
.
خورداجا قارداش نه گوروب بیر اوخ آتور خصم علی
وئردی الین تز قاباقا تیره سپر اولسون الی
آلننا تیکدی الینی فِدیه اولوب منظره لی
ایستی قوم اوسته یخیلوب پَرپَر اولوب گُل مَثَلی
مام بلا غرق بلا زینبیدی زینبیدی
.
.
گلدی حسین داده تاپوپ شمع فروزانلارینی
آه چکوب اوپدی صورا صورت رخشانلارینی
خیمه لره گتدی غرض زینبون اوغلانلارینی
زینبه ابلاغ ایله دی گورمَگَه قربانلارینی
صدره نشین اُدَبا زینبیدی زینبیدی
.
.
من دیدی لبیک حسین بیر یول عزیزان دیمیشم
من اونون اوغلانلار اونون ایتمیشم عنوان دیمیشم
جانیمیده قارداشیمون جانینه قربان دیمیشم
چیخمارام اصلاً قاباقا بو سوزی چوخدان دیمیشم
صابرۀ اهل وِلا زینبیدی زینبیدی
.
.
محضر قارداشدا دیدی اشگ یوزه باغلامارام
دوزدور ایکی اوغلوم ئولوب من ولی دل داغلامارام
گورسه منی چوخ اوتانار سینه ده اَل باغلامارام
اکبرینه آغلیارام گُللّریمه آغلامارام
چیخمیان هرگز قاباقا زینبیدی زینبیدی
.
.
واقعاً عشّاقه بویوک حامل مشعل دی خانم
دینه گوره ویردی ایکی اوغلینی دینجلدی خانم
ساکت اولوبدور اوره گی عشقیده دیرچلدی خانم
دوشدی حسین قتلگهَه باشدا اَلی گلدی خانم
باشه سالان یدّی قرا زینبیدی زینیبیدی
.
.
گوردی حسینی یخیلوب قتلگهه باش یارالی
آلننی گُل پیکرینی یکسر ایدوب داش یارالی
من دیدی دیلدن یارالی سنده کی قارداش یارالی
دور ایاقا قیزلاروا خیمه ده چک باش یارالی
تک قَیِیدن دلده نوا زینبیدی زینبیدی
.
.
زینب همان زینبیدی غارت اولان وقته خیام
لشکر کفّاره دیدی صبر ایدون ای فوج ظلام
وورمیون اطفالی ویروم من سیزه اشیانی تمام
تابع قرآن سوز اگر یاندی امام اوغلی امام
دادرس زین العبا زینبیدی زینبیدی
.
.
زینب همان زینبیدی محنتی عظما تانینوب
پوزمادی بیر ذرّه اوزین صبریده دریا تانینوب
کوفه ده تاریخه باخون نطقیده یکتا تانینوب
ابن زیاد اولدی خجل خطبه سی غرّا تانینوب
دائم اولان وردی ثنا زینبیدی زینبیدی
.
.
زینب همان زینبیدی زلفین ایدوب یوزده نقاب
شامیده هنداوغلی گوروب دائر ایدوب بزم شراب
قارداشینون یاره لَنَن لبلرینه وئردی عذاب
کیم دور او محجوبه خانم حاجبینه قیلدی خطاب
بیلمه دی خاتون بقا زینبیدی زینبیدی
.
.
سسلنوب ای شوم و دغا آگه و بیدار منم
زینبم علامه منم عارفم هوشیار منم
سِرّ خدا مَحرمینه مَحرم اَسرار منم
قیزلارا غم خوار منم نهضتینه یار منم
مَلجع فوج اُسرا زینبیدی زینبیدی
.
.
بیرده بیان ایتدی بابام ختم پیمبردی تانی
فاطمه نین دختریم پاک و مُطهّردی تانی
طشت ده کی یاره لی باش گو گُلره لنگردی تانی
فخر ایدورم قارداشیما خالقه مظهردی تانی
ورد زبان خُطبا زینبیدی زینبیدی
.
.
زینب همان زینبیدی اولدو کی ویرانه نشین
ایله دی تبلیغ قَوی سِندِیروب اشرار دیشین
شامیده آز فاصله ده گوردی قیامین چوخ ایشین
گُل کیمی آغوشه آلوب ئیله دی زهرا یِریشین
یات دِیَن ای نازلو بالا زینبیدی زینبیدی
.
.
باخدی دولومسیندی او قیز زینب علیا یوزینه
سالدی نگاهینده شرر یکسره دنیا یوزینه
سیلی وورولمیشدی ز بس دختر زیبا یوزینه
بَنذه ریدی صورتی چوخ اُمّ ابیها یوزینه
غصّه سی چوخ قلبی یارا زینبیدی زینبیدی
.
.
بیر گیجه ویرانه سینه دیده گلوب رأس امام
اورتو گونی ردّ ایله دی قانلو باشا وئردی سلام
وای بابا بیر دفعه دیدی گوز آخینوب گیتدی دوام
عمّه سی سسلندی گلون ئولدی بالام ئولدی بالام
دائر ایدن بزم عزا زینبیدی زینبیدی
.
.
تپراقا تاپشوردی ئوزی سینه سینون زینتینی
شامیده اعلام ایله دی ساخلیالار حرمتینی
کرب و بلایه گتوروب قارداشینون عترتینی
قبرین ئوپوب قویدی صورا غُصّه لَه نن صورتینی
عشق فضاسینده هُما زینبیدی زینبیدی
.
.
کرب و بلادن دئدیکی درده گرفتارم حسین
فوج ملائک چوخ ئوپن قبرووه زوّارم حسین
شامیده جان وئردی قیزون گلدیم عزادارم حسین
آج دیسم ئولدی قیناما نازلی جگر پاره م حسین
تاپمیان اطفاله غذا زینبیدی زینبیدی
.
.
یثربه یورقون اسرا زار و پریشان قَیِیدوب
شهریده قاصد دیدیکی زینب نالان قَیِیدوب
تشنه شهید اولدی حسین قیزلاری گریان قَیِیدوب
ئولدی ئولن سالمی ده قلبی دولی قان قَیِیدوب
غصه چکن صبح و مسا زینبیدی زینبیدی
.
.
خارج شهره توکولوب مردم بطحا یتیشوب
گورسون علی اکبرینی غم زده صغرا یتیشوب
زینبون اوز صاحبی ده محضره حتّی یتیشوب
وای دیدی آغلار وطنه عترت طاها یتیشوب
دردیمه عُمریمده دوا زینبیدی زینبیدی
.
.
اُمّت مظلومه بُیوک پشت و پناه آختارورام
قدّن اوجا قولدان اوزون میر سپاه آختارورام
اکبری من قاسمی من هی چکوب آه آختارورام
گوزلریم اطرافی گزور عصمته ماه آختارورام
صورتی مرآت حیا زینبیدی زینبیدی
.
.
عمّه سینی صاحبینه زین العبا ویردی نشان
گلدی مقابلده قالوب ناله کنان اشگ فشان
قامتینی ایتمیشدی بار غمی مثل کمان
زینبه اوخشاتمادی هیچ زینبینی ایتدی بیان
کول باشیما قدّی رسا زینبیدی زینبیدی
.
.
زینبه عرض ایتدی: حسین،سیّد عالم هانی بس
نصف شب عزّتله گیدن صاحب پرچم هانی بس
قاسم علی اکبریلن گلمه دی باهم هانی بس
اکبر هانی اصغر هانی نازلی رقیّم هانی بس
اوندا دِیَن وا اسفا زینبیدی زینبیدی
.
.
قانلو بیاباندا دیدی سروریم اَللّرده ئولوب
لیلی سالوب قاره سینی اکبریم اَللّرده ئولوب
اوخ بوغازیندان وورولوب اصغریم اَللّرده ئولوب
قاسم و عبّاس وفا پروریم اَللّرده ئولوب
قاره لئچک قاره قبا زینبیدی زینبیدی
.
.
پنجۀ دشمنده دئدی زهریلی پیکان دوتولوب
یاره لی بیر قلبه دگوب شیشه لره قان دوتولوب
سایه سالان یاره سینه زلف پریشان دوتولوب
تشنه شهیدانه گئجه شام غریبان دوتولوب
وصفی گوزَل شأنی اوجا زینبیدی زینبیدی
.
.
بیرده دیدی خنجر آلوب اَللره اوغلانلاریمیز
عرصه ده دعواده آچوب منظره اوغلانلاریمیز
ضربۀ شمشیر ووروب لشگره اوغلانلاریمیز
بَذل ایله دی جانلارینی اکبره اوغلانلاریمیز
آری ویرن دینه جلا زینبیدی زینبیدی
.
.
گلشن عشقون دئدی کی قرمز ایکی گُل بیتوروب
باشلارینین اوسته ئوزین فوری حسینیم یتوروب
قتلگهینده بویوگون نعشینی یِردن گوتوروب
خورداسین عبّاسه ویروب خیمه سرایه گتوروب
اهل عزا؛ کان سخا زینبیدی زینبیدی
.
.
چوخدی «مُعزّی» بیلوسن زینب عُلیاده عطا
درگهینه قوی ئوزووی صدقیله سن صبح و مسا
گیزلین اولان دردووه تا ویرسون عنایتله دوا
مین نچه یوز ایلدی ایدوب ورد زبان اهل عزا
پشت و پناه ضُعفا زینبیدی زینبیدی
.
.

این متن را هم بخوانید:  رحلت ایدوب خدیجه یاسین و کوثر آغلار #حضرت_خدیجه #رضوی_زنجانی

#زینبیه_مدح
#طفلان_زینب
#از_مدینه_تا_مدینه
#خروج_مدینه
#ورود_مدینه
#قتلگاه
#نیره_چرخ_حیا_زینبیدی_زینبیدی
#معزی_اردبیلی
#ترکی
.
✍️ #زبدةالاشعار ✍️
.
🆔: @nohe_torki

نظر دهید

دسته بندی درختی

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

Search
Generic filters
Filter by Custom Post Type

دسته بندی درختی