در جستجوی نعش علی اصغر (ع)
زبانحال حضرت رباب (س)
..
..
مرحوم عاصی تبریزی
..
..
گل دعا ایله سکينه شام و کوفه لشگری
تاپماسون بلکه قیزیم نعش علی اصغری
..
..
اللرینده نیزه شام اهلی ائدولر هلهله
سرعتيله آختارولار ولوله سالموش چوله
وئر خبر يکسر بالا قیزلار آلا زلفين اله
درگه حقه گتورسونلر شفیع پیغمبری
..
..
بیر قیزیم شام اهلی باشدان معجریمی آلماسون
بیرده الله رحم قیلسون اصغریمی تاپماسون
دفن اولوندی نعشی اوسته اهل کين آت چاپماسون
گیزلدوب آخر آنان بو علّته اول گوهری
..
..
هر قساوت وار بو گون اهل شقاوت بوخلیوب
حرمله بو بس دگول عطشان بالامی اوخلیوب
نچه ساعتدور بالام قبر ایچره راحت یوخليوب
وای منه قویمولا قالسون قبریده گل پیکری
..
..
گئت سکینه خیمه ده سن آغلا توک گوز یاشوی
یان اورکدن داده گل وور سینیه آچ باشوی
زلفووی ائیله پریشان قیل دعا قارداشوی
اودلانان دلدن قیزیم سسله خدای داوری
..
..
نيليوم نه چاره وار الده و نه بير دادخواه
وار نه اکبر نه ابوالفضل و نه قاسم آه آه
نه آناسی وار یتیشسون دادیمه نه بیر پناه
سسلرم گلسون نجفدن اوز باباسی حیدری
..
..
بسدی بو غصّم بالامون باغلامادیم یاره سين
آرتوری دردیم گوزوم خالی گورور گهواره سین
من اؤزومدن چخموشام بولمم بو دردین چاره سين
گئت بو غمدن ائیله حالی زینب غم پروری
..
..
زلفونی آلسون اله شوریله اُول عليا جناب
اصغری دلدن دعا ائتسون او دخت بوتراب
او دعا ائتسه دعاسين الله ائیلر مستجاب
بوش قايتمز بولموشم درگاه حقدن اللرى
..
..
چون قیزیم آل اللهه محبوبدور بو سودامر
ایندی لازمدور دعا ائتسون باجیلار عمه لر
اللری قوینوندا گوز یاشلی عجب قالدیم ملر
من کیمی کیمدور فزون اولسون اورکده غملری
..
..
وار یری فریاد و آهیم چخسا چرخ اطلسه
بولمورم چاره ندور من بینوا و بی کسه
اولماسا چاره ويراخ بیردن تمامأ سس سسه
حالیمیز بلکه گتورسون رحمه قوم کافری
..
..
جام چشمیم آز قالور دلدن عذاره قان وئره
گور نئجه اهل جفا سبقت ائدوبلر بیربیره
بیله که لشگر ورولار نيزه غيظيلن بره
جنّت ایچره تیتره دور قلب بتول اطهری
..
..
«عاصيا» چرخ طول وئرمه مطلبه آچما سوزی
پرده لی سوز یاز باشارسان سوزلرین اولسون گوزی
اهل دل آنلار زبان حالدور بو سوز اؤزی
یاندیروب برماجرا دلدن رباب مضطری
..
..
#اصغریه #عاصی_تبریزی #اصغریه_شهادت #ترکی #زبدةالاشعار
نظر دهید