ماجرای دیدار حضرت رسول الله(ص)از دُخت گرانقدرش زهرای مرضیه(س) و به خواب رفتن حسنین(ع) در غار و مُفاخره آن دو بزرگوار و #گریز به #قتلگاه
معزی اردبیلی
اورک گوزیله ای بشر رئیس انبیایه باخ
جلالت حسینه باخ مقام مجتبایه باخ
گتور مدینه شهرینی نظرده گوز قباقینه
جناب خیرة النساء حبیبۀ خدایه باخ
یازولاّ بیر گونی نبی گلوبدی دخترین گوره
علی ایوینده نازنین بتول اطهرین گوره
اورکده کی غم اسکیله رخ منوّرین گوره
بهشتین عطرینی آلا چمنده گللرین گوره
صفای گلستانه باخ وفای مصطفایه باخ
گوروب قاپی دالیندادور فسرده ناگران بتول
بویوردی علّتی ندور قیزیم چوخ اولموسان ملول؟
جواب ویردی ای اولان خدای عالمه رسول
حسینیلن حسن گیدوب قیتمه گی چکوبدی طول
گوزلّریم هایاندادور؟ شرارۀ نوایه باخ
گوروم خزان یلی بابا اسیلمه سون بو گلشنه
سحردن ایلورم دعا ایکی صفالی سوسنه
عم اوغلوم ایوده یوخ بوگون اورک سوزون دیوم سنه
اولاری سندن ایستورم آماندی تز یتور منه
عیال مرتضایه باخ دعایه باخ ثنایه باخ
دیدی حبیب ذوالمنن سن اولما ناگران قیزیم
گتورّم هاردا اولسالار عزیزۀ جهان قیزیم
ایکی شفیع محشره رئوف و مهربان قیزیم
هله خیانت ایلمز زمین و آسمان قیزیم
قاباخدا ماجرایه باخ اشارۀ عزایه باخ
اولوبدی هادی بشر فلات و دشته رهسپار
قاباقدا کوه گورسنوب واریدی دامنینده غار
یتیشدی گوردی خواب ایدوب حسن حسین گلعذار
ولی کناریده دوروب او غاریده مهیب مار
گلنده داده مصطفی او ماریده صدایه باخ
دیدی من آل هاشمی گوروب جسارت ایتمرم
بولار گل بهشتیدور نجه حراست ایتمرم
سنون امانتوندیلر وروب خیانت ایتمرم
نه نوعی امر خالقه بو گون اطاعت ایتمرم
حضور کردگاریده شئون اولیایه باخ
حسن حسینی چگنینه آلوب رسول ذوالجلال
ندا یتیشدی جبرئیل تز آچ یر اوزره پرّ و بال
حبیبیمه سلام ایله حسینی شهپر اوسته آل
آپار چوخ افتخاریلن مقدّس آستاندا سال
محبت خدایه باخ حسینه باخ ندایه باخ
بفوری بیر بیره پرین هواده چالدی جبرئیل
پیامینی پیمبره یتوردی قالدی جبرئیل
تفاخرات طوقینی دوباره سالدی جبرئیل
صفا تاپا پر اوستونه حسینی آلدی جبرئیل
امین وحی حقّه باخ وصیّ مرتضایه باخ
حسن دیدی حسین منی نبی اکرم حمل ایدور
توجّه ایله رتبه مه شریف آدم حمل ایدور
حسین دیدی مگر منی جلالتی کم حمل ایدور
مقاماً هر فرشته دن اولان معظّم حمل ایدور
امامه باخ مقامه باخ کلامه باخ صفایه باخ
حسن دیدی ئولنده من حسین جگرلریم یانار
حسین دیدی ئولن گونی یارالی قلبیم اوخلانار
حسن دیدی یتیم قالار بالام اورک آلولانار
حسین دیدی بالالاریم منیم طنابه باغلانار
اوگون گهی بناتیمه گهی دونوب جدایه باخ
یولا باخوردی فاطمه ایدردی چوخ دعاسینی
نه گوردی گتدی مصطفا ایکی گوزل بالاسینی
بتول چکدی سینیه اَوَلده مجتباسینی
ئوپوب یوزین ایدوب عوض توزا باتان لباسینی
وصاله باخ جماله باخ بالایه باخ آنایه باخ
دیدی حسینه فاطمه گل ای منیم شیرین دیلیم
آلیم سنی قوجاقیمه جمالوون توزین سیلیم
یوخیدون ایوده دلبریم صفاسیزیدی منزلیم
سن اولماسون قرا گیچر حقیقتاً آئیم ئیلیم
دوزنمه دیم فراقیوه فراقیده بلایه باخ
بابام خبر ویروب منه یوزون سولاندا نیلرم؟
سپر اوخا یانان دیلون نشان اولاندا نیلرم
آخاندا یاره وون قانی گوزون دولاندا نیلرم
باشوون اوسته زینبیم باشین یولاندا نیلرم
گلنده باشدا الّلره او زار و مبتلایه باخ
بو سوزدن الّی ئیل گیچوب حسین بویاندی قانینه
یخیلدی قتلگاهینه یتشسون آرمانینه
جوان ئولن آناسینون دوشوبدی رعشه جانینه
الین آتوبدی زلفینه باخاندا مهربانینه
دیدی حسین نه تک منه صفوف اصفیایه باخ
نظاره ایله گور نجه نوایه پنج تن گلوب
اوشاقلیقوندا سینه ده سنه دیل اورگدن گلوب
سو جامی الده دیدووه ولیّ ذوالمنن گلوب
تولّدونده آد قویان عذارووی ئوپن گلوب
اوزاقدا قاتلون قالوب گلینجه اقربایه باخ
سورونمه قتلگاهیده حرارتیله گون شاخور
چیخوبدی تلّون اوستونه منایه زینبون باخور
وروبدیلار داش آلنووا جمالووه قانون آخور
محاسنینه قانووی پیمبر خدا یاخور
باشیندا انبیایه باخ نوایه باخ قرایه باخ
ئولوبدی قارداشون حسین عزالیسان چالیخلاما
خیام طاهراتیدن آرالیسان چالیخلاما
آنون گورور نجه سولوب سارالیسان چالیخلاما
بالام جانی دوزنمورم یارالیسان چالیخلاما
منا دولوبدی حوریلن منای کربلایه باخ
الینده حربه دوره ده قوشون دوروب جان آی بالا
بساط ظلم و کینه نی اولار قوروب جان آی بالا
سه شعبه تیری قلبووه عدو وروب جان آی بالا
اورگوون دامارلاین دگوب قیروب جان آی بالا
دواسی اشک چشمیدور گوزومده کی دوایه باخ
فلک هاچان جهانیده یوزومه گولدی آی بالا
سحر چاقیندا هیچ حالون بئله دگولدی آی بالا
نه اوسته اوستووه قوشون گلوب توکولدی آی بالا
ئولنده صاحب لوا بیلون بوکولدی آی بالا
دیدی هرایه گل حسین سو مشکینه لوایه باخ
سو کربلاده گورمیوب سولوبدی باغیم آی بالا
بالون ئولوب بالام ئولوب واریمدی داغیم آی بالا
گلر،گیدنده قاتلون سونر چراغیم آی بالا
بهشتیده گئجه منیم اوروج قوناقیم آی بالا
سالوبدی گوگده جبرئیل یارالارووا سایه باخ
حسین بیانه گلدی ای قابورقاسی سنان ننه
بلالره نشان ننه هوروگی آغ جوان ننه
بالاسی سقط اولان ننه اورگی داغلانان ننه
غمیمده موکنان ننه اورگی پارچا قان ننه
ورور گنه منه یارا حیاسیز اشقیایه باخ
منه دیل اورگدن ننه بوغازیمی ئوپن ننه
انیسه محن ننه بالالاری ئولن ننه
نیه گلنده سن ننه گتورمه دون کفن ننه
قالاندا عور من ننه بوکوله بو بدن ننه
سپاه بی حیایه باخ بلایه باخ جفایه باخ
باتان چاقی قمر ننه منه ایدوب اثر ننه
سن ایله دون نظر ننه سنوب نجه کمر ننه
بو چولده دربدر ننه ئولوبدی صود امر ننه
آناسی چوخ ملر ننه بالاسینی گزر ننه
خلیل کربلا منم منایه باخ فدایه باخ
«معزّیم» دخیلووم گوزوم سنه فدا حسین
قسم اورکده یارووه داریخمیشام آقا حسین
نه گورمیشم مدینه من نه دشت کربلا حسین
من ئولمه میش آماندی قیل جوازیمی عطا حسین
گلیم ئوپوم مزارووی دیوم آقا گدایه باخ
#حسنیه_مدح #حسنیه
#حسینیه_مدح #حسینیه
#مفاخره
#اورک_گوزیله_ای_بشر_رئیس_انبیایه_باخ
#معزی_اردبیلی
#ترکی
✍️ #زبدةالاشعار ✍️
?: @nohe_torki
نظر دهید