او دم که چکدی حسین سمت خیمیه مأیوس #اصغریه_صدری_اردبیلی

سوز و گداز حضرت رباب (س)
..
..
مرحوم صدری اردبیلی
..
..
او دم که چکدی حسین سمت خیمیه مأیوس
یوزونده گوزیاشی پیدا ائدردی چوخ افسوس
..
اشارتیله بو بیر نکته نی ائدوب اظهار
آنام نشانی باجی اصغریمی اوخلادیلار
..
ربابه وئردیله بو غملو ماجرانی خبر
حسین عباسنه گوزآلتی ایلیوبدی نظر
..
گوروبدو قانه باتوب دامن شه افلاک
اوغول نشانه سینی قانیدن ائدوب ادراک
..
اولوبدی گوزیاشی جاری یوزینه بی پرده
یارالی قلبی خدایا گلوبدی چوخ درده
..
گلی خزانه گئدن بلبل جگر خسته
بو نحویله بالاسین اوخشیوردی آهسته
..
هایاندا قالموسان ای جسم ناتوانیمه جان
سسون قولاقیمه گلمز علی آنون قربان
..
دویونجا سن علیجان یاتمادون قوجاقیمده
ایاق دوتوب بالا بیر گزمدون قباقیمده
..
آنا همیشه گوزتلر اوغول دلین آچسون
ایاق دوتوب قباقیجان دوروب گزوب قاچسون
..
دل آچمادون سن اوغول قالدی قلبده حسرت
آنا بالا دانشوب بیرجه ایلیک صحبت
..
باخام سنون بویووا هم دوشوب یانونجه گئدم
اوغول آناسی اولوم منده بیر تفاخر ائدم
..
دیوم دالونجه بالا قالماسون اورکده سؤزوم
قرا گونوم کیمی اولدی منیم گئجه گونوزوم
..
گئجه اولاندا علی یاتمیوب فغان ائلدون
گونوز اولاندا بالا گوز یاشون روان ائلدون
..
گهی گئدردون علی هوشه گه گلوب حاله
امردون اوز دوداقون مثل غنچۀ لاله
..
دلون یوخیدی بالا دردوی عیان ائده سن
سوسوزلقون اثرین شرح ائدوب بیان ائده سن
..
دلون دوداقه وروب گوزلرون باخاردی منه
بیلردوم اوندا سوسوزلوق اثر ائدوبدی سنه
..
دوشومده صود یوخیدی تا ائدم سنی سیراب
یانوب یانوب اورگیم غصّه دن اولوردی کباب
..
بو فکرله سنى من عازم جدال ائلدوم
دئدوم وئرور سنه دشمن سوئی خیال ائلدوم
..
دئمم جداله سنى یولّادوم خطا ائتدوم
او بیر کومک سیزه منده سنی فدا ائتدوم
..
نه بی مروّتمش قاتل جفا پرور
ووروبدی حلقوه پیکان سنون علی اصغر
..
ائشیتمیشم بوغازوندان دگن زمان پیکان
باخوب حسین یوزونه گولموسن آنون قربان
..
تبسمه ندور علت اوغول او حالتده
مگر دییردون حسین قالماسون خجالتده
..
بو فکر لر نظریمدن کئچنده دیسکینّم
اوزوم اوزیمه اورک دردیمی دئیوب دینّم
..
گیلیلیگیم علی جان روز محشره قالدی
فلک ئولونجه منیم باشیمه قرا سالدی
..
توجه ایله على صدری گنهکاره
رباب خاطرینه ائیله دردینه چاره
..
..
#اصغریه #صدری_اردبیلی #اصغریه_شهادت #ترکی #زبدةالاشعار