اگر چه لام الف لادن آیرولوبدور آه #حسینیه_واقف_سرابی #بیخود_سرابی

شهادت امام حسین علیه السلام
.
زبدة الاشعار
.
: @nohe_torki
.
مرحوم واقف سرابی
.
اگر چه لام الف لادن آیرولوبدور آه
عجب دگول اولا ما فِی الضَّمیریدن آگاه
.
خیال آهیله هر نقطه ده تصرف ایدر
به عشق نقطه ی ما تحت باء بسم الله
.
گوگولده عشق مجازی حقیقتین تانوماز
مقام قلبه اگر گوز یولوندان اولماسا راه
.
نه عشقدور اوزی مکنون سوزشی ظاهر
نه شوردوراوزی دلسوز ناله سی جانگاه
.
بو عشق حضرت موساده آشکار اولدی
بو شور طوری تجلاده ایلیوبدی تباه
.
بو عشق یوسفی آخر عزیز مصر ایتدی
بو شور محبس زندان ویروب اذیت چاه
.
بو شور عشق حسینه او قدر سخت اولدی
سالوب او حالته اَلحاج ایدوب رعیته شاه
.
گچوبدی سَرو گل و لاله تک جوانلاردان
وحید قالدی وجودین ایدوب فنا فِی الله
.
ایدوبدی اللری قوینوندا تکیه نیزه سینه
ئولن صحابه سینه حسرتیله قیلدی نگاه
.
گوتوردی قیدی اوزوندن چیخوبدی کثرتدن
توکولدی اوستونه یوز مین نفر قوشون ناگاه
.
او قدر یاره دگوب بند بندیدن اوزولوب
دوشوب یراوستونه شیرازه سیزکلام الله
.
یاناردی چوخ ئورگی اوخ دگوب او مظلومین
سبیل قانینی ایلردی فی سبیل الله
.
دوتوبدی قانینی اوجوندا یاخدی صورتینه
وجود صورتی محو اولدی قالدی ثارالله
.
دیوب رِضاً بِقَضائِک دوشوب یوزی اوسته
دیلینده ذکر عَلی مِلَّةِ رسول الله
.
دوروبدی سجده دن ائتسون شهادتینی ادا
سنان یتیشدی سنان الده غیظیله ناگاه
.
سنان سنانیله نحر ایتدی ناقة اللهی
دِیَنده اَشهَدُ اَن لا اِلهَ اِلَّا الله
.
قرا یل اسدی زمین موجه گلدی گون دوتولوب
هواعلی قزینون تک گونی اولوبدی سیاه
.
پیمبر امتی پیغمبر اوغلون اولدوردی
باشین جدایه ووروب خیمیه توکولدی سپاه
.
غریب السیز ایاقسیز اناث طایفه سی
اراذل عربون شورشین گوروب ناگاه
.
یتیشدی سید سجاده زینب عرض ایلدی
آلوشدی خیمه میز ای وارث خلیل الله
.
بویوردی عمه بویور چوللره فرار ایلسون
اوتورماسونلا داخی خیمه لرده آل الله
.
آلوشدی خیمه چیخان اود دوتوب قاچاردی چوله
یاناردی خوردا اوشاقلار دیردی یا الله
.
ووراردیلار یخیلاردی گیروب آتین دوشونه
دونوب دیردیله یا شیخ منده وارنه گناه
.
مخدرات سراپرده ی حریم حسین
به غیر زینب مظلومه تاپمیوبله پناه
.
جسارت ایلمیون « واقفیله بیخود» زار
بوغملی واقعه نین شرحین ایلیون کوتاه
.
.
#حسینیه_شهادت
#قتلگاه #غارت_خیام
#اگر_چه_لام_الف_لادن_آیرولوبدور_آه
#حسینیه_واقف_سرابی #بیخود_سرابی
#ترکی
.
#زبدةالاشعار
.
: @nohe_torki