حالات خرابه شام
.
.
مرحوم شانی تبریزی
.
.
ائشیت بو نقلی که چوخ غم فزا حکایتدور
جناب سید سجادیدن روایتدور
.
اودم که اولدی آتام عازم دیار عراق
ز بس که شعله ور اولدی شرار نار فراق
.
او ناریلن دل اهل مدینه داغلاندی
عراقه بار ملال حجاز باغلاندی
.
محارم حرمه یر وئروب محاملده
کشیک چکردیله محرم لری منازلده
.
باتاندا گون قورولاندا سیاه خیمۀ لیل
کیمی ائدردی نماز و کیمی عبادته میل
.
بابام علی کیمی تا صبح اولونجا اکثر شب
عبادت ائتماقا بیداریدی بیبیم زینب
.
واریدی بسکه طریق سلوکه راه وقوف
گئجه نمازینی ائتمزدی بیرگئجه موقوف
.
آچاندا حقه تهجد زمانی راز و نیاز
دگلدی قاعده سی دائماً قیلاردی نماز
.
ائدردی گرچه اونی زحمت سفر خسته
گینه قیلاردی نماز شبی ایاق اوسته
.
او دم که شامه یتوب کاروان آل رسول
خرابه مسجدی مسکن ائدوب بنات بتول
.
همیشه رسمیدی گوزلر قاپوچی چون ائشیگی
اویاق گوزیله چکردیم اسیرلر کشیگی
.
او یرده بیر گئجه گوردوم که عترت حیدر
هامی یاتوب بیری اما غریبه ناله ائدر
.
دوتوق گلور سسی گویا اودا دوشوب جرسی
یواش یواش گلوری چوخ حزین حزین سسی
.
گهی چیخور سسی ، گه غصّه دن اؤزون ایتورور
گویون ملک لری گویا سسینه سس یتورور
.
حزین صدائیله بونوعلیه ائدور زاری
دوشوب تزلزله درسیز خرابه دیواری
.
دئیدوم گئدوم گوروم آیا بو آغلیان کیمدور
شرار آهیله افلاکی داغلیان کیمدور
.
یتوب نه گوردوم اسیر بلا بیبیم زینب
قوری یر اوسته الینده ساچی به درد و تعب
.
دوتوبدی ضعف وجودین ز بس گلوب درده
نماز شب قیلور عمّم اوتوردوقی یرده
.
دئیدیم نه حالیدی بو عمّه نه حکایتدور
قیامی برهم ائدوبسن بو نه قیامتدور
.
که هیچ گئجه بئله سوز و گداز قیلمازدون
گئجه گونوزده اوتورموش نماز قیلمازدون
.
بو داغدار دله چکمه داغی داغ اوسته
مگر نولوبدی دورا بولموسن ایاق اوسته
.
دئیدی ئوزون بولوسن ای اسیر دل رنجور
خرابیه گله لی آل مصطفا مهجور
.
قویوب قرار ایکی قرص نان والی شام
بیزه وئرولّه بیرین صبح لر بیرین آخشام
.
اولور بویوکلره بیر زحمتیله قوّت جان
ولی اوشاقلارا از بس چتین اولور گُذَران
.
آتان ائدوبدی منی چونکه کافل ایتام
گرک ئوزوم قالام آج اونلارا ائدم اطعام
.
یتیم اوشاقلاری گوردوم طعامه چوخ محتاج
بو گئجه اوچ گئجه دور قالموشام خرابه ده آج
.
ئوزومی بذلیده اوخشاتموشام کریم لره
طعام حصّه می من وئرموشم یتیم لره
.
نه وار کمک نه یوخی بسکه اولموشام خسته
گئدوبدی تاب دورا بولمورم ایاق اوسته
.
دویورموشام او یتیمی که آج قویوب کفّار
قصوریم اولسا بغیشلر بو حالیمه غفّار
.
#خرابه_شام #شانی_تبریزی #ترکی #زبدةالاشعار
نظر دهید