#پندیات
گریز به حالات حضرت علی اصغر (ع)
..
..
غفاری زنجانی
..
..
ای لطف خدا حالینه شامل اولان انسان
ای خلقت آرا خلقت کامل اولان انسان
..
ایله بو سماواته بصیرتله تماشا
باخ گورنه گوزل نقشه چکوب خالق یکتا
..
چشمک وران اولدوزلارا باخ حیرتون آرتسون
نسبت او خداونده عبودیّتون آرتسون
..
بو داغلارا بو داشلارا بو خاک جماده
اشجار نباتات هامی آتش و باده
..
دریالرین امواجنه بیر ایله نظاره
ئوز خالقنون قدرتینه ایلور اشاره
..
نهری لره جنگل لره صحرا لره یکسر
باخدوقجا مجسّمدی بلی قدرت داور
..
هئچ قدرت اونون قدرت والاسینه چاتماز
هیچ صنعت اونون صنعت و زیباسینه چاتماز
..
ایلولّه بولار صبح مسا سعی فراوان
تأمین اولا هر نوعیله آسایش انسان
..
انسان اگر انسان اولا برتردی ملکدن
خالص چخا البته گرک سنگ محکدن
..
شکر ایله خداوندوه ای صاحب وجدان
خلّاقون ایدوبدی سنه بو نعمتی ارزان
..
ای صاحب وجدان ایلمه نعمته کفران
اللهه تمرد ایلمز پاک دل انسان
..
نفسون دیینه باخما گوزوم بوالهوس اولما
قؤنما بو کثافتلره بسدور مگس اولما
..
آلّانما بو دنیایه گوزوم یوخدی وفاسی
بو عالم فانیدی مسلّمدی فناسی
..
هیچ کمسه نی عفریت جهان کامه یتورمز
عاقل اولان انسان اونولان ال اله ویرمز
..
بو چرخ کهن چوخ ایوی ویران ایلیوبدی
چوخ قصرلری خاکیله یکسان ایلیوبدی
..
گوگدن یره چوخ صاحب فرمانی یخوبدی
دنیا یوزی اوستونده سلیمانی یخوبدی
..
نسبت گنه فرصت ویرور اغیاره بو دنیا
چوخ تنگ ایلیوب عرصه نی اخیاره بو دنیا
..
دنیا یاناسان سن یانورام من رَوشیندن
حیرتده قویوبسان هامونی سن رَوشیندن
..
صیّاده دوتوب قوشلاری پربسته ویرورسن
نه عقلیله غدّارنی سن مسته ویرورسن
..
اوچ شعبه اوخی حرملییه سن نیه ویردون
سالسون سودامر اصغری دلدن نیه ویردون
..
اصغر نه گناه اوسته او گون قاننه باتدی
یومّوشدی قرا گوزلرین اوخ دگدی اویاتدی
..
بیر اوچ پر اوخا طفل لب عطشان هدف اولدی
بیر اوخدا هدف ظلمیله درّ صدف اولدی
..
یاندیردی منیم قلبیمی بو نکتۀ باریک
اَنّیدی اوخون شعبه لری حنجری نازیک
..
اوخ گلدی دگوب سرعتیله حنجربن اوزدی
آغ دوشلگه قرمز قانی مرجان کیمی دوزدی
..
قوش تک ال ایاق چالدی بالا قان آراسندا
آغلار گونه قالدی آتا میدان آراسندا
..
مظلوم آناسی شعلۀ محنت ده یانوردی
اخیامه گتورسون آناسندان اوتانوردی
..
قتلگه اولوب اصغره آغوش امامت
دیسگیندی رباب آغلادی مخیمده او ساعت
..
ظلم اهلی اونون رشتۀ امّیدینی کسدی
اوخ اصغره دگدی آنا یاپراق کیمی اسدی
..
سن ناظریدون بو ایشه ای منتقم الله
توکدی اوقانی حرمله ناحق یره والله
..
اون دورت یوزایل آز قالدی گیچه بوجریانی
احباب چخاتمور گنه ده رخت قرانی
..
آیا نجه شیعه چخادار رخت عزانی
الاندا او مظلوم بالانون یرده دی قانی
..
اوندا سئویونار مهدی موعود گلنده
قان آلماقچون حجت معبود گلنده
..
«غفاری » دیر گل او گلن یولّارا قربان
هم اولدی «تقی زاده» فراقینده پریشان
..
..
..
#اصغریه #غفاری_زنجانی #پندیات_غفاری_زنجانی #پندیات #ترکی #زبدةالاشعار
نظر دهید