کوفه – راه شام
«گویا بیزی ئولدورماقا شامه آپاروللار»
.
.
حسین ساکت خسروشاهی
.
.
ای نوک جدایه وورلان سرور دوران
قاندور اورگیم آیریلیقندان سنه قربان
.
دور گئتمه نظرگاه من خسته جگردن
گوز یاشی کیمی زینبیوی سالما نظردن
.
.
درد و غم آلوب جانیمی جانانه یولوندا
تن دردین آتوب گلدی جانیم جانه یولوندا
قلبیم بو قدر قویما دونه قانه یولوندا
گه گه اوزیوی زینب نالانه نشان ویر
ای وارث عیسی تن بی جانیمه جان ویر
.
.
ای قلبیمون آرامشی ، ای روح و روانیم
پیشوازه گلیدون منه گلمزدی گمانیم
ای کاش بو آنیم تک اولیدی هامی آنیم
نه بولدون ئولوردوم یتیشوب بو دمی ویردون
جانانه قسم ، سانکی منه عالمی ویردون
.
.
هر قدر دئدیم آتما گوزوندن منی آتدون
جبرا حرمون منزل بیگانیه ساتدون
ای شمع کیمی یاندوروب آخرده کوله باتدون
خاکستر بال و پر زهرادی باشوندا
یا که اثر مطبخ اعدادی باشوندا؟
.
.
ایله کی باخار گون یوزونه دیده ی جمّاش
ایله باخورام صورت خونینیوه قارداش
باخدوقجا گوزومدن توکولر عارضه قانیاش
همسو اولالی یاره لرون عشوه لرونله
قان آغلادیسان زینبیوی جلوه لرونله
.
.
گاهی گورورم باشیوی القاندی جداده
گاهی گورورم گول کیمی خنداندی جداده
یا رب بو مگر جوهره ی جاندی جداده
هر چند دونن بو باش اولوب اوز بدنیدن
گولدی دیه سن ایندی دروبله چمنیندن
.
.
ای شاخ محبّت نه گوزل لاله لرون وار
لاله یاناغیندا اوتوران ژاله لرون وار
دورنده آییم ، آی نه گوزل هاله لرون وار
بیله که سالوب جلوه باشین ارض و سمایه
بو جلوه اولان یئرده نه حاجت گونه ، آیه
.
.
کیم گوردی کسیک باشدا اولا قدرت آواز
آواز دل انگیزی اولا مایه ی اعجاز
قرآن سسیوی کسمه سن ای قاری ممتاز
قوی دولدورا عالملری آواسی بو باشین
دنیا گوره یوخ مظهر و همتاسی بو باشین
.
.
قوی داغ داشا دوشدوقدا سسون عرشه ده چاتسین
بو سس قباقیندا نه قدر سس اولا باتسین
غفلت یوخوسوندان هامی دنیانی اویاتسین
فریاده گلن لر که گزر آیه دالینجا
گورسونله باشین آیه اوخور آیه دالینجا
.
.
تنها نه منم حسرت وصلونده پریشان
مندن صورا وار نچّه پریشان پریشان
گوهر کیمی گوز یاشلاری گل یوزلره افشان
حیرت زده آوای مناجاته چیخوبلا
باشون دالیجا گردش شاماته چیخوبلا
.
.
شامات نه شامات، سراسر یئری غمناک
جوّی خفقان، روحی سیخان مردمی بی باک
بیز قوللاری باغلی ، آپاران قاتل سفّاک
داغدان داغا، چولدن چوله ، بیله سفر اولماز
سن اولماسان ئولدورسله بیزدن خبر اولماز
.
.
بو قافله نین ، نیزه ده باشوندی پناهی
هم رهبری ، هم روشنی شام سیاهی
ای جلوه ی گردنده ی انوار الهی
گئت قویما دوشه قافله ی عشق جرسدن
امّا که یواش گئت بالالار دوشدی نفسدن
.
.
آهو کیمی قیزلار یارالی بیر بیره بسته
بعضی لرینین گوزلر آخوب ناقه لر اوسته
بعضی لرینین ال ایاقی خسته شکسته
آهولریوی گور نئجه دامه آپاروللار
گویا بیزی ئولدورماقا شامه آپاروللار
.
.
«ساکت» گینه نه شوریدی شوریده باشوندا
امواج غم اولموش بئله پیچیده باشوندا
تا واردی حسین فکری بلا دیده باشوندا
حقّ عاشقی اول قوخما حسینون یولونی گئت
بیراهه گئدنلر اتگین دوتما رها ائت
.
.
#کوفه #حسین_ساکت #راه_شام_حسین_ساکت #راه_شام #ترکی #زبدةالاشعار
نظر دهید