شهادت حضرت امام حسن (ع)
.
✍️ #زبدةالاشعار ✍️
.
🆔: @nohe_torki
.
مرحوم وافی تبریزی
.
باجی دور بیر علاج ایله دوتوب اود لبلریم یاندیم
نه وار بو کوزه دن آخر ایچوب اود دوتدوم اودلاندیم
اماندور الامان یاندیم
.
.
گنه بو نصف شب تاپدی منه یول هانسی آهن دل
آیردی اهل بیتمدن منی اول دیندن غافل
گیدور ، دور ، قارداشون الدن ایله کام دلون حاصل
قضا تدبیر ایدوب مطلق بو دام غم که اولاندیم
.
.
قضا صیّادی قورموشدی منه گویا اجل دامی
حرم آهوسی تک سالدی کمنده بو غم انجامی
شکارین ایلدی گلدی اله مقصود و ابرامی
او کامه یتدی من حسرت عیالیمدن آرالاندیم
.
.
باجی یاتمشدیم ، آثار عطشدن اضطرابیله
دوروب بو کوزه دن ایچدیم هراسان فکر آبیله
دلیم آغزیم سینم گویلوم آلوب اود مین شتابیله
سموم زهریله باشدان باشا یاندیم الولاندیم
.
.
ایدیم نه چاره قویموبلار قطا تک آشیانیمده
بو نصف شبده ده راحت یانام اوز خانمانیمده
زمان احتضاریمدور گل اگلش بیرجه یانیمده
نه داغ ظلمله دلدن دیوم بو گونده داغلاندیم
.
.
باجی دور ویر خبرگلسون باشیم أوسته بنی هاشم
اورکده طاقتیم روحیم حسینیم ، قوم و قارداشیم
اماندور بیر علاج ایله دونوبدور قانه گوز یاشیم
اگر چه بیر علاجیم یوخ من اؤز احوالیمی قاندیم
.
.
بوحال احتضاریمده کناره گیتمه یانیمدان
حسینه ویر خبر گلسون دیوم راز نهانیمدان
گوزوم یاشین جگر قانین بو چشم خونفشانیمدان
اوزون سیل گور نجه دلدن گلن قانیله ایسلاندیم
.
.
گسینه گلدی حسین آدی اورکلر قانیله دولدی
سوسوزجان ویرمگی ، بیکس حسینون بیرده یاد اولدی
دیردی گل باجی زینب عطشدن گل یوزوم سونلی
قلجلار اوخلار آلتندا بوگون لب تشنه دوغراندیم
.
.
دلوبدور سینمی بیر اوخ کیچوبدور قلبیمی داغلار
اَسَر یل ، ایسی تپراقلار ساغالماز یاره می باغلار
سیزیلدار آغلیان گوز تک یارام احوالیمه آغلار
اوزوم اوز حالیمه یاندیم باجی دلدن یارالاندیم
.
.
یاریلدی ظلمیله باشیم آخوب قان گوزلریم دولدی
گوز آخدی طاقتیم گیتدی سارالدی گل یوزوم سولدى
یارالی سینه مه دشمن چاپوب آت خرد خرد اولدی
قالوب نعشیم قوری یرده ایاق آتدا یارالاندیم
.
.
بو سوده گر چه ظاهرده منی چوخ مستمند ایلوب
ولی سود سعادتله حقیقت ارجمند ایلوب
بو حاله دلخوشام بولّم که جانانیم پسند ایلوب
ویروب جان «وافیا» جانان رضاسین مغتنم ساندیم
.
.
.
#حسنیه_وافی_تبریزی
#حسنیه_شهادت
#باجی_دور_بیر_علاج_ایله_دوتوب_اود_لبلریم_یاندیم
#ترکی
.
✍️ #زبدةالاشعار ✍️
.
🆔: @nohe_torki
نظر دهید