حالات حضرت ابوالفضل (ع)
..
..
..
مرحوم خوندل تبریزی
..
..
..
تا اوخلادیلار اهل جفا مشکیمی قارداش
قان ایتدیله بو سوتک آخان اشکیمی قارداش
..
..
چکمزلر عبث اهل وفا رشکیمی قارداش
ترجیح ویروب اوخ گوزومه مشکیمی قارداش
..
..
بیر مشک سوئی که اونا ارزش اولا مین جان
بیر تیر خطا توکدی یره ای شه عطشان
بولمزدی سوسوزلوق نه بلادی سولی پیکان
ترجیح ویروب اوخ گوزومه مشکیمی قارداش
..
..
من مایلیدیم مشکه ایدم جانیمی شاباش
تا بلکه او بیر آز سو سلامت قالا قارداش
اوخ دگمیه بو مشگه گوزومدن دگه ای کاش
ترجیح ویروب اوخ گوزومه مشکیمی قارداش
..
..
خرگهده سوسوز قیزلاریون حالینه یاندیم
سو مشکی دیشیمدیدی بو میدانی دولاندیم
تا مشگیمه اوخ دگدی اورکدن پارالاندیم
ترجیح ویروب اوخ گوزومه مشکیمی قارداش
..
..
صبرین اؤزونی حیرته سالدیم دوزومیله
پیکانلاری بیر جان ایلدیم تا اوزومیله
سومشکیمی محفوظ ایلمیشدیم گوزومیله
ترجیح ویروب اوخ گوزومه مشکیمی قارداش
..
..
تا سو واریدی دلده دیردیم که غمیم یوخ
شهبازه پر اولدی سو امیدیله گلن اوخ
«بو مشکه دگن اوخ منی مأیوس ایلدی چوخ» (1)
ترجیح ویروب اوخ گوزومه مشکیمی قارداش
..
..
بیر مشک سوگتدیم اله مین دردسریله
ایتمزدیم عوض قطره سینی مین گھریله
اما بوشالوب دولدى گوزوم اشک تریله
ترجیح ویروب اوخ گوزومه مشکیمی قارداش
..
..
هر اوخ خوشیدیم سینه مه ایتسیدی اصابت
بیر اوخدا ولی اولمادی انصاف و مروت
تا مشگیمه دگدی هدر اولدى هامی زحمت
ترجیح ویروب اوخ گوزومه مشکیمی قارداش
..
..
اوخلار او قدر منده گوروب عشق و ارادت
پیکان بلا گلدی دیدیم پیک محبت
اوخ مشگیمه دگدی منی یاندیردی او حسرت
ترجیح ویروب اوخ گوزومه مشکیمی قارداش
..
..
ای باب الحوائج نظری دردیمه درمان
واضحدی یوروب «خوندلی» افکار پریشان
بو مصرعی مقبول ایله بیر تحفۀ ارزان
ترجیح ویروب اوخ گوزومه مشکیمی قارداش
..
..
(1)از مرحوم #شانی_تبریزی
..
..
..
#عباسیه #خوندل_تبریزی #عباسیه_شهادت #ترکی #زبدةالاشعار
نظر دهید