بودی کوفه شهر اعظم آتامین دیاری قارداش #کوفه_کریمی_مراغه_ای

کوفه
زبانحال حضرت زینب (س)
..
..
مرحوم کریمی مراغه ای
..
..
بودی کوفه شهر اعظم آتامین دیاری قارداش
دئمیشم علوم قرآن بش ایل افتخاری قارداش
..
..
بو خانملارا حسینجان بش ایل ائتمیشم خدارت
چوخی آرزو ائدردی منی ایلسون زیارت
تانورام چوخون گورنده چکورم اودور خجالت
توکورم خجالتیمدن یوزه زلف تاری قارداش
..
..
ایکی دفعه قسمت اولدی باجووا ورود کوفه
بیری گلستان بختیم گل آچوب ویروب شکوفه
بیری ایمدی طالعیمده قمریم دوشوب خسوفه
دایانیدی گردشیندن بئله روزگاری قارداش
..
..
بو دیاردن او گئچمش گونومین صفاسین آلّام
او محلّیه باخاندا آتامین صداسین آلّام
او نه کولدی گل یوزونده گوزیوین قاداسین آلّام
یتشیدى ال سیلیدیم او قانی غباری قارداش
..
..
سسیوی آلوب جدادن بئله بولدوم عزّتیم وار
گینه ساغدی آل هاشم سِمَت خدارتیم وار
قولی باغلیام اسیرم اوره گیمده حسرتیم وار
بو شماتت و بو ذلّت آلوب اختیاری قارداش
..
..
سالورام خیاله قارداش آتامین او باش یاراسین
الیم اسدی باغلیاندا نه یاواش یاواش یاراسین
گتور ایمدی باغلیوم من آنام اوغلی داش یاراسین
یارا باغلاماق اولوبدی باجووین شعاری قارداش
..
..
بولوسن غم آتشینده آلشان سمندرم من
بولوسن بابام ئولندن بئله قاره معجرم من
هانی یدّی قارداشیمدان بیری زار و مضطرم من
باجووین گئدوب وقاری کسیلوب قراری قارداش
..
..
نقدر تفاوت اولدی بو ایکی سفرده اما
او زمان کجاوم اوسته گول آتاردی پیر و برنا
باشیما توکولَّه کوللر داش آتولّار ایمدی اعدا
او گون اختیاری گلدیم بو گون اضطراری قارداش
..
..
بو دیارین اهلی قارداش نجه بیوفائیمیشلر
هامی ظاهراً مسلمان نجه باصفائیمیشلر
یوخومش بولاردا ایمان بئله بیحیائیمیشلر
ایکی اوزلی لردی آتمیش هامی شرم و عاری قارداش
..
..
نقدر «کریمی» تیکسین یولا چشم اشکبارین
اورگینده چکسین عکسین او مزار شش کنارین
اونی دعوت ایله گلسین قوجالیق آلوب قرارین
یا وئرنده جان اوزون گل قوتار انتظاری قارداش
..
..
#کوفه #کریمی_مراغه_ای #ترکی #زبدةالاشعار