خانم یا فاطمه عطشان حسینون #وداع_شهاب_تبریزی

خطاب به حضرت زهرا (ع) در وداع آخر امام (ع)
.
.
مرحوم شهاب تبریزی
.
.
خانم یا فاطمه عطشان حسینون
اولوبدی عازم میدان حسینیون
.
دیار کربلایه قیل گذر گور
نجه یالقوزلیوب عدوان حسینون
.
گوزی یاشلی قویوب اهل عیالین
گئدور لب تشنه ویرسین جان حسینون
.
منای عشقیده قربان لارینی
گچوردوب بیر به بیر ساندان حسینون
.
اوزی عهد ایلمیشدی ظهر وقتی
ایده اوز جانینی قربان حسینون
.
گوروب وقت شهادت باشه یتدی
گرگ باشین ایده باشدان حسینون
.
گلوب خیمه قباقنده دایاندی
باخوب اطفالینه حیران حسینون
.
امان اول وقتدن ایتدی خیامه
وداع آخرین اعلان حسینون
.
توکولدی خیمه دن یکسر کناره
عیال بیکس و نالان حسینون
.
آلوب انجم تک اطرافین حرملر
تماماً اول مه تابان حسینون
.
حرملر آغلیوب چوخ آغلادوبلار
او چولده دیده سی گریان حسینون
.
قیام ایتدی قیامت خیمه لرده
اولاندا عازم میدان حسینون
.
حرملر باجیلار خردا اوشاقلار
دوتوبلار دامنین یکسان حسینون
.
او قدری ناله و فریاد ایدوبلر
اولوب باغری چو لاله قان حسینون
.
اوزی تیز گتماقا چوخ سعی ایدردی
تاپانمازدی ولی امکان حسینون
.
مگر خردا بالالار ال چکوردی
فراغت تاپماقا بیر آن حسینون
.
سکینه ناله سی زینب فغانی
دویورموشدی او گون جاندان حسینون
.
باجیسی زینبه چوخ یاندی قلبی
گلوب درده او دل سوزان حسینون
.
بیوردی صبر قیل چوخ ایتمه ناله
بله یاندیرما باجی جان حسینون
.
نقدری من صاقام سن آچما باشون
دوزنمز خانه سی ویران حسینون
.
گلنده زلفوی بول قتلگهده
گورنده نعشینی عریان حسینون
.
بوجمعیله شهاب اولسون نصیبون
مزاری وقفۀ قربان حسینون
.
.
#وداع #شهاب_تبریزی #حسینیه #حسینیه_وداع #ترکی #زبدةالاشعار