شهادت حضرت موسی ابن جعفر (ع)
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
خبیردن خبر آلدیم نه شور و غوغادی
تمام خلقده حال عزا هویدادی
.
چکوبله قاره اولوبلار سیاه پوش هامی
باتوبلا خلق عزایه هامی عزادی
.
دیدی مگر خبرون یوخدی کیم امام رضا
قراگیوبدی وفات امام موسادی
.
ویرویدی گوشه زنداندا جان غریبانه
ولی جنازه سینین نقلی چوخ غم افزادی
.
یازولا گوردی سلیمان که نقل اولور بیر نعش
اونون غریبلیقی آشکار و پیدادی
.
قویوبدیلار اوجا بیر نعشى قسّا تابوته
حقیر وضعیله نقل اول بلند بالادی
.
ایان طرفدن ایاقلاری باش طرفدن باش
آخوب کناره عجب حالتی غم افزادی
.
#نقل_جنازه_حضرت_موسی_ابن_جعفر (ع)
.
دوروب انوب آشاقا بیر نفردن ایتدی سئوال
گتور بیانه گوروم بونجه معمادی
.
بو نعش صاحبی کیمدور بیله حقیرانه
جنازه سین آپارولّار نه اسمه دارادی
.
هارالیدور یتر آیا کیمه حَسَب نَسَبی
ندندی خویش و ائلیندن بیله مجزّادی
.
بیله گمان ایدورم من بو مبتلای غمین
بو شهرده آدامی یوخدی فرد و تنهادی
.
غریب اولسادا باری غریبلر یتیشر
گلوب سراغ ایده نی یوخدی بونه معنادی
.
جواب ویردیله اصلی بونون مدینه لیدور
امام جعفر صادق بالاسی موسادی
.
مه سپهر امامتدی جدی پیغمبر
آتاسی شیر خدادور آناسی زهرادی
.
بونون وجودینه خاطر هامی اولور مرزوق
ثبات فرش زمین گنبد مُعَلادی
.
مقام زهدده ممتاز علمده اعلم
سالاردی حیرته زهدی تمام زهّادی
.
ولی اسیر اولوب اون بیر ایلدی هارونه
یاتوبدی حبسده دلده نوای آزادی
.
قوتاردی عمرینی زندان ده عبادتیله
عبادتیله ایدوب سرفراز عبّادی
.
بو شیر زاده دی روباه لر کمنده سالوب
ویروب شکنجه قفسده همیشه صیّادی
.
ووروبلا بوینونا زنجیر ایاقینه کنده
انیسی رشته زنجیر و کندۀ پادی
.
اوروج دوتوب گونوزی شام وقتی افطاری
ویروب غذا یرینه تازیانه جلادی
.
امامدور بو ولایتده چوخ دی ایستینی
ولیک دشمنی جابردی حکم فرمادی
.
او دور که گورماقا گلمزله شیعه لر یاخینا
آشوب داشوب خَفَقان چولقیوبدی بغدادی
.
#نالۀ_زنان_بغداد_سر_نعش_حضرت_موسی_ابن_جعفر
.
آلوب او نعشی سلیمان قویوب یره دولانوب
ویروب جماعته اول وقت اذن آزادی
.
دیدی خانم لاروزی یکسر ایلیون حاضر
گلوب بیر ایلیه لر بوردا ناله ایجادی
.
بوتون بو شهرده اهل وعیالی یوخدی گله
سالا جنازه سی اوسته فغان و فریادی
.
آناسی یوخدی اوغولوای دیه نوائیله
جهانی آغلادا فریاد و شیون ودادی
.
آنا دلیله گلوب اوخشاسون بونا آنالار
که ناله لرده مؤثر نوای ثکلادی
.
عیالی یوخدی باشی اوسته باشینی آچسون
باجی سی یوخدی ایده آه و ناله بنیادی
.
گوزلدی اوخشیه بیر کس عیالینین دلیجه
باجی یرینده بیری اوخشاسا چوخ اولادی
.
قزی یانندا گر اولسیدی یاخشی اوخشاردی
قز اوخشاسا گوزل اوخشار بو رسم دنیادی
.
قزی دلینجه گلوب اوخشاسون خانم قزلار
که قز سزیلتی سینین مشتری سی آبادی
.
گوزلدی آغلاماقوز بو غریب غربتینه
غریبه آغلاماق اجری رضای یکتادی
.
جنازه سینی خانم لار ایدوبله گل باران
گل آتدا ایتدیله پنهان غریب بغدادی
.
آنا باجی دلیجه اوخشیوبله شیونیله
سالوبلا قزلاری تک شور شیون و دادی
.
#گریز #قتلگاه
.
اولیدی آیری سلیمان گلیدی کاش اوگون
گوریدی کرب و بلاده او ظلم و بیدادی
.
حسین جنازه سینه قتلگهده گل یرینه
سنق قلج اوخی توکموشدی کفر افرادی
.
گلوب خانم باجی سی تاپدی قارداشین گوردی
نهان قلجلارین آتدا او جسم زیبادی
.
گوتوردی بیر به بیر آلات حربی آتدی کنار
گوروب یاتان یوزی اوسته امام والادی
.
حسین دیه دیه آلدی او نعشی آغوشه
چویردی آرخاسی اوسته او فخر اوتادی
.
حجازی دللریله اوخشادی او نعش اوسته
حسین عزاسینون اوردا قویولدی بنیادی
.
دیدی گوزوندن ایراق گورنه گون لره قالدیم
عدو نه حاله سالوب گور بو زار و ناشادی
.
او زینبم یارالی پرده پوش عفّتیدیم
گور ایمدی پرده سیز اولموش بو قد رعنادی
.
ایشیتمیوب سسیمی بیر كلام نا محرم
نقدر اوجالماسا عورت صداسی باجادی
.
یتوبدی بیر یره ایش چاره سیز سسیم اوجالور
اوجا سسیله دلیم وا حسین گویادی
.
ایدوم نه چاره منی درد و غم دانشدیریری
سیزیلدارام ایدرم بیله نوحه انشادی
.
خلوص نیتیله یاز یازاندا سوز تائب
قبول اولونسا دیللر نه عالی انشادی
.
.
.
#کاظمیه_تائب_تبریزی
#کاظمیه_شهادت
#خبیردن_خبر_آلدیم_نه_شور_و_غوغادی
#ترکی
.
✍️ #زبدةالاشعار ✍️
.
🆔: @nohe_torki
نظر دهید