استمداد حضرت ابوالفضل (ع)
.
.
مرحوم انور اردبیلی
.
.
درک ایله عباسوی ای عترتین سالاری قارداش
قارداشا جان اوسته خوشدور قارداشین دیداری قارداش
.
.
پنج تندن دهرده بیر سن قالوبسان یادگاری
آبروی آل عصمت سن ذوی القربا وقاری
بیر کیچیک سربازیدیم منده قاپوندا آری آری
گل کیچیک سربازوین ختمه یتوب پیکاری قارداش
.
.
پنجۀ ایمانیلن من پوزۀ ابلیسی ازدیم
شکری واردور شهر عشقی کو به کو عشقیله گزدیم
هر زمان مولا دیردیم من سنه، قارداش دیمزدیم
حضرت زهرا منه اورگتدی بو گفتاری قارداش
.
.
مکتب حرّیتونده حمد اولا مقصوده یتدیم
چوخ فضیلت اخذ ایدوب افسوس اولا آز خدمت ایتدیم
خرج ایدوب جان سکّه سین سندن ولی شرمنده گیتدیم
قیمتیم سندی سو اوستونده منیم اجباری قارداش
.
.
غنچه مثلی یانمشیدی قزلارین زیبا دوداقی
من دیدیم سو حمل ایدوب اولّام سوسوز قزلاره ساقی
یثربون جیرانلارین قیلّام خیمده سو قوناقی
ایتمدی افسوس صد افسوس بختیم یاری قارداش
.
.
عمرلر ایل لر ستون اولدوم رکابونده ملازم
رخصت میدان ویروب نهر فراته ایتدون عازم
قولّاری تندن دوشن بیر پهلوانه باش نه لازم
اهل عشقه ساخلاماق بیجادی سنگین باری قارداش
.
.
مشکده تا سو واریدی آیریلقدان سوز یوخیدی
مجمر قلبیمده أصلا یأسدن بیر کوز یوخیدی
حافظیدی صول گوزوم سو مشکیمه صاق گوز یوخیدی
شادمانیدیم گلوردوم خیمه گاهه ساری قارداش
.
.
غفلتاً بیر اوخ گلوب دگدی سبوی جان داغلدی
آرزو قصریم خطر گوردی اولوب ویران داغلدی
دردیم آرتدی فی المثل شیشم سنوب درمان داغلدی
ایلدیم نفرین تیرانداز کج رفتاری قارداش
.
.
حمله ور دور اشقیا بیر پنچه دن مأیوسون اوسته
گوئیا شهپر آچوبدور زاغلر طاووسون اوسته
داش یاغور باران مثالی بیر سنق فانوسون اوسته
شیشه تک سینم سنوب یوخ یاره مون آماری قارداش
.
.
صاق گوزوم قانیله دولموش گورمیوردی سبط خاتم
صول گوزومدن اشک آخور رخساره چون باران نم نم
دیدۀ دلده نمای صورتون اولموش مجسّم
گورمیور دیر خراب آبادده دیّاری قارداش
.
.
کعبۀ دل سن طریقت عالمی اهل دلم من
کعبه دن آرتوق سنه اجلال و حرمت قائلم من
حاجتیم وار دامنوندن دوتماقا چوخ مایلم من
ال سیزه أل ویرمز امّا کعبه نون استاری قارداش
.
.
مست و مست اولدوم ازل گوندن محبت ساغروندن
گون به گون تاپدی صفا مرآت عشقیم جوهروندن
کیمیانی کم بها بلدیم سنون خاک دروندن
چاتمادی بازار عشقه کیمیا بازاری قارداشی
.
.
عاشقم جوش و خروش عشق واردی رگلریمده
قطره به قطره آخان قانیمده قولسوز پیکریمده
گورسنور عکسون حُباب أبیض اشک تریمده
سندیروب قیمتده اشکیم درّ قیمتداری قارداش
.
.
دگدی بیر اوخ سجده گاهیمدن منه چون مشکل اولدی
دیزلریمله تیری چکدیم نسگل اندر نسگل اولدی
جوشدی قانیم اوخ یریندن خط سیریم گُل گُل اولدی
مین خزان گورسه سارالماز کربلا گلزاری قارداش
.
.
دل یاراسی وردی نوفل آتش حسرتده یاندیم
چاره سیز عنقا کیمی کرکس قباقنده دایاندیم
پنجه سیز اصلان کیمی روباه الینده پارچالاندیم
وردی سندیردی عمودیله سرِ سرداری قارداش
.
.
بزم عشقین شاهد پرشور و شیرین کاریَم من
لشکر دینون ایکی دیرسَکله پرچمداریَم من
هر مرضدن عاریم، بیر عشقوین بیماریَم من
کسر شأن اولماز طبیبه یؤخلاسا بیماری قارداش
.
.
آلنیم أوسته تپراقا دوشدوم عقابیمدن دوشنده
نیلر آخر بال و پرسیز قوش یره گویدن اننده
یوخ صلاحیّت دیَم الان نه حالت واردی منده
دردیمی گلسون بُلرسن آچمورام اسراری قارداش
.
.
پر شکسته عاشقم من سرشکسته سینه شان شان
قلَّتِ سرمایه ایتمش حالیمی زار و پریشان
موقع ایثار اولیدی کاش ابوالفضلونده مین جان
بیر به بیر قربان ایدیدیم جانیوه تکراری قارداش
.
.
قلبیون صندوقین ایتدیم مریم بکرِ معانی
هر نه گلدی باشیمه فاش ایتمرم قالسین نهانی
یازمشام عشق و مواساته کتابی جاودانی
قوی مشام پشت سریمده سرحد ایثاری قارداش
.
.
ترک ایدنده خیمه نی نه آه چک نه سینه داغلا
ئوپ رقیّه لبلریندن زینبون بوینون قوجاخلا
بعضی سوزلر که دیدیم فاش ایلمه سربسته ساخلا
ناامید ایتمه هله یول گوزلین قزلاری قارداش
.
.
کاش مین ایل خارلر اوسته گزیدیم پا پیاده
کاش مین داغی یخیدیم کیپریگمله نینواده
کاش مین قطعه اولیدی پیکریم دشت بلاده
قانه باتموردی علیّ اکبرین بیر تاری قارداش
.
.
#عباسیه #انور_اردبیلی #عباسیه_شهادت #ترکی #زبدةالاشعار #صدای_عاشورا
نظر دهید