زبانحال حضرت اباعبدالله (ع) در بالین برادر
.
.
#سبک_ای_آسمان_غمون
.
.
مرحوم تائب تبریزی
.
.
ای سو یانندا سوسوز قانه باتان یارالی
بو چولده قارداشینی گوزدن آتان یارالی
آچ قان دولان گوزیوی سورتمه یره یوزیوی
دلده اولان سوزیوی ایله بیان یارالی
.
.
گورسنمه میشدی که سن قارداشوی آتاسان
بو آشنای غمی بیگانیه قاتاسان
من باشون اوسته دورام سن نازیله یاتاسان
بیله سالوبدی ایشی دور زمان بارالی
.
.
هچ بیر شهید اولانون بیر بیله یوخ یاراسی
وار قانلو پیکریوین گورّم که چوخ یاراسی
چوخ یاندیرور منی بو آلنیندا اوخ یاراسی
تیر غمه دلیمی ایلور نشان یارالی
.
.
تاپدون سعادت ئوزون سن ای جوان رشید
آلدون فراتی سوسوز اولدون سو اوسته شهید
دشمن لر ایچره منی قویدون فرید و وحید
یالقیز منم بو قدر سفیانیان یارالی
.
.
حسرتلریله دونوب قانه شکسته دلیم
الدن الیم اوزولوب یوخدور قبیلم ائیلیم
چارم داخی آزالوب سنسیز سنوبدی بلیم
بار غمیله اولوب قدّیم کمان یارالی
.
.
رسماً نوازش اولار داغ جوان گورنه
تسکین دل وئریلر هر قارداشی ئولنه
تسکین دل یرینه قارداش گولولّه منه
چوخ چوخ شماتت ائدر بو کوفیان یارالی
.
.
جسمیمده روحیمیدون ضوء و ضیاء گوزوم
سنسیز اویان نئجه گور شامه دونوب گونوزوم
چکمز او قدر زمان گلّم دالونجا ئوزوم
جسمی چکر دالیجا گئتسه روان یارالی
.
.
الدن آلوبلا منیم سن تک برادریمی
گریان ائدوبله بوگون بو دیدۂ تریمی
دور گور قویوبلا نئجه قوینومدا اللریمی
گوزدن یوزه توکرم اشک روان یارالی
.
.
سندن صورا نقدر دنیا یوزونده قالام
لازمدی ناله ائدم بو امتیازی آلام
مشکل گوزل آدیوی دلدن وفالی سالام
من ایلرم گل آدون ورد زبان یارالی
.
.
مندن روا دگی سن قارداش بیله دویاسان
رخت علایقی بو تندن بو گون سویاسان
بی کس حسینوی سن بو چولده تک قویاسان
ای قید قارداشینا دائم قالان یارالی
.
.
سنسیز سوسوز بالالار کامه نه نوع چاتار
یاددان نئجه چیخادوب باشدان سو فکرین آتار
آل رسول نئجه آسوده بیرده یاتار
اطفالیمه سنیدون امن و امان یارالی
.
.
ایمدی سوسوز بالالار بیر بیرله صحبت ائدر
سو صحبتی سالوبان فکر سقایت ائدر
اما رقیه گوزی یولدا قیامت ائدر
گوزلر سنون یولون اول شیرین زبان یارالی
.
.
فکرون بودور خِیَمَه بو مشکیوی آپاروم
دور اشک آلویله بو مشکیوی آپاروم
نه نوع قانه باتان سو مشکیوی آپاروم
بوحالی نه یوزیله ایلوم بیان یارالی
.
.
«تائب» حسین دَرینه سالدون عجب یوزیوی
وار آجری صدقیله گر نظم ایله سن سوزیوی
سوز یاز حقیقتیله دولدور بوشات گوزیوی
تا سوزلرون اوخوسون هر نوحه خوان یارالی
.
.
#عباسیه #تائب_تبریزی #عباسیه_شهادت #ترکی #زبدةالاشعار
نظر دهید