اجلال نزول حضرت سیدالشهدا(ع)به تربت خونبار کربلا و آمدن #ذوالجناح به خیمه ها
.
.
.
مرحوم انور اردبیلی
.
.
دل آچوب طوطی طبعیم دانیشور دلبردن
اورگیم غمله دولوب گوزلریم اشکِ تردن
عاشقم عمر بویی دلدن حسینون آدینا
ئوپرم نام حسین زینت اولان دفتردن
شکر اولا حقّه منه قدرت تمییز وئروب
آییروب عقل سلیمیم عَرَضی جوهردن
کاش ئولنده آقامون قاره‌سی اَگنیمده ئولم
جان تمنّایه چاتا عشقِ همایون فَردن
پیکریم حمل اولونا بزمِ عزادن قبره
ائتمیم کوچ اَبدی منزلیمه بستردن
گوزل آدی آقامون نقش اولا قبریم داشینا
رَهگذر یاد ائده مولایه گوره نوکردن
لحد آلتیندا بیله واردی بیر آز غصه‌لی خاک
یادگاریدی قالوب نوحه یازان «اَنوردن»
خار اُولوم یازدیقیم اَبیاتیمه مَغرور اُولسام
گرچه هر بِیت سوزیم نشأت آلوب باوردن
ای قلم حاشیه‌دن مطلبیمون اوستونه کِچ
آپاروم فیضِ دو چندان بو گوزل محضردن
ظهریله عصر آراسی دوشدی حسین زین اوستن
صوت عُرّا اوجالوب نُه فلکه لشگردن
قاش گوزی صورتی بیر پارچا قیزیل قانیدی
طاقت آلمیشدی تیکانلار او گل پَر پَردن
جسم موزونیده یارای تعادل یوخیدی
تیتریوردی بدنی اوخلار اِئدن لنگردن
یاره‌لی اَل یارالی قلبینون اوستونده امام
آیریلوب گون کیمی سیر ایلدیگی محوردن
ایکی سوزش واریدی قانی آخان قلبینده
بیری اوخدان، بیریده داغِ علی اکبردن
تپراق اوسته یخیلان وقته دئدی بسم الله
سجدهٔ شکریله یاد ائتدی حق داوردن
انبیای اولوالعزم آچدی او صحراده باشین
گلدی زهراده اورا جنّتِ جان پروردن
مرکبی باخدی حسینه، ائدوب احساسِ خطر
راکبین درک ائلدی قوزانا بیلمور یردن
هی دولاندی باشینا شیهه‌سینی اِئتدی بلند
بویادی کاکلینی خونِ شه محشردن
اُوجونا صاحبینون قانلی لُجامین قویدی
کلمه‌سیز قیلدی تمنّا یارالی سروردن
دور سوار اول سنی فوراً یتوروم خیمه‌لره
اِئتمه شرمنده منی عترتِ پیغمبردن
یاره‌لی جسموه هی اوخدی گلور، داشدی یاغور
چوخدی زَجری سنه داش یاره سینون خنجردن
هر قَدَر سَنده نفس وار وراجاق کوفه لیلر
بیر به بیر عضولرون آیریلاجاق پیکردن
ذوالجناحه بیر اشاره اِئلدی سَروَرِ دین
گئت خیامه دئدی اَل چک منِ بی یاوردن
گوزی یولدا قالان اَطفاله گوزل قاصدسن
اوجالوب ناله سَسی عائلهٔ حیدردن
سوسوز آهولریم ایندی ملشور هجریمدن
گئت حمایت اِئله بیر عدّه قرا معجردن
ویرمینجا باشیمی شمرِ دَنی نیزه سینه
کوفه‌نون اهلی بوراخماز یاخامی اَللّردن
حلّ اولان گوردی دَگل مشکل لاینحلّی
یارالی مرکب اَنوب خیمیه فوراً تلّی
بیر اوجا شیهه چکوب ایلدی اِعلانِ خطر
بیلون ای ختمِ رسول عِترتی ختم اولدی سَفَر
الظّلیمه سؤزی شِیهمده شعاریمدی منیم
قاصدم خیمه‌لره منده‌دی هر تازه خبر
ایسته‌سوز دردی سیزه روشن اولا صاحبیمون
ایلیون پیکر مجروحیمه دقّتله نظر
منه بیر یاره دگنده اونا یوزیوز دگدی
گورون ایندی یاراسی راکبیمون وار نقدر
مایلیدیم گتورم، گئت دئدی سن خیمه‌لره
باشینون اوسته آچوبدور باشینی پیغمبر
منتظر قلبلره منعکس اولدی بو صدا
چیخدی پیشوازینه وحشت‌زده آلِ حیدر
اللری باشدان اوجا، طُرّه‌لری یوزلرده
هاموسی تشنه لبیدی هاموسی تشنه جگر
بیر سوری قورخولی جیرانه شبیهیدی اولار
ایلیوردی مَله‌جَک سسلری آفاقه اثر
ناقصیم واردی خیال اِیلمه تشبیهیمده
هانسی جیران آتاسیز قیز کیمی نسکللی ملر
ذوالجناحی بیلوسوز گوردی نه حالدا بالالار
سورونور یرده جلو، قارنینین آلتیندا اَیَرْ
دوره وردی بالالار مرکبی آلدی آریا
بیرده گورمز اِئله بیر منظره تاریخِ بشر
اولمیوب آل عبایه اِئله مشکل صحنه
مدرکیم عصرین امامی اوخیان مرثیه‌لر
بیری سویلر نه قرا گونلره قالدوق یارب
نه جوان قالدی بیزه نه قوجا نه بیر صوداَمر
بیری امداده نجفدن چاغورور مولانی
بیری یردن گتوروب باشینه تپراقی سَپَر
بیری سویلردی بئله خانه بدوش اولمازدوق
یوردوموزدا اُمَوی‌لر بیزی قویسیدی اگر
قورخودان بعضی قیزون لرزه اِئدوردی بدنی
یِل اَسنده نجه که بیر قوری یاپراق تیترر
گتوروبدور او زمان داده علی قیزلارینی
ناگهان کچدی قباقه بالاجا بیر دختر
بالاجا اللرینی چکدی آتین کاکلینه
دئدی ای پیکِ پیام آور و خونین مَنظر
خیمیه سنکه بوحالدا یتوروبسن اؤزوی
قتلگهده بئله معلومیدی وار آیری خبر
باباما وئردیله سو یا که سوسوز جان وئردی؟
قوریان دیل دوداقی اولدی و یا اولمادی تَر
آیریلان وقته اُپوشدی منیله دوشدی یولا
واردی بیر خاطره‌سی ایندیده قلبیم گوینر
لبلریمدن بابامون لبلری چوخ ایستیدی
اونی آتش کیمی گوردوم اؤزومی ذرّه شَرَر
اؤ سوسوز ئولسه کول اولسون بو جهانون باشینا
او سوسوز ئولسه سرین سو نجه قیزلاری ایچر
اؤ سوسوز ئولسه نه لازمدی بیزه آب فرات
زندگینون بیزیچون فایده‌سی واردی مگر
مرحوم حاج قدير جليل‌زادگان (انور اردبیلی)
.
#حسینیه_شهادت
#قتلگاه #ذوالجناح #حسینیه
#دل_آچوب_طوطی_طبعیم_دانیشور_دلبردن
#انور_اردبیلی
#صدای_عاشورا_انور
#ترکی
#زبدةالاشعار
با سلام. این شعر استاد در کتاب هم ناقص چاپ شده است. نسخه خطی این شعر کاملتر می‌باشد. در واتس آپ براتون ارسال می کنم.