دفن شهدا
.
✍️ زبدة الاشعار ✍️
?: @nohe_torki
.
محمد رضا صادقی
.
خامَم دولانوب سیریده صحرای بلانی
بو فکریله تشریح ائده دفن شهدانی
.
مقتلده باخوردوم گورم آیا نه خبر وار
دوشدی نظریم بیر خبره صبح زمانی
.
وار الده سند « شیخ قمی» ایلیوب اعلان
یوز هشتاد اوچومجی ورقه یازمش عیانی
.
مکتوب اولونوب نفثهٔ مصدوره بو مطلب ( 1 )
یازمش سوزینه بانی غریب الغربانی
.
جدّیندن ائدیبدور بوسوزی بیله روایت
معصوم گرک دفن ائده معصوم خدانی
.
سجّاده اولوب وحی گئده کرب و بلایه
ترک ایلیه معناده یول اوسته اُسرانی
.
بیر طُرفة الْعین ایچره او چول اولدی نمایان
سیر ایلدی حُجاج کیمی مرو و صفانی
.
بیر یرده گوروب نیزه و داش چوخدی دایاندی
مقتلده گلوب تاپدی یوزی اوسته آتانی
.
یورقون الیلن داشلاری گوتدی او دل افکار
بیر آغلادی آغلاتدی او دم اهل سَمانی
.
بیر عدّه گلوب حاضریدی دفن امامه
همناله اولوب سس بورودی دشت بلانی
.
تا قبرین آچوبلار او غریبین او مکاندا
جبریل گلوب قبرین ائدوب عطر فشانی
.
بیر کهنه حصیره آتاسین چولقادی سجّاد
دوندردی او دم قبلیه اولْ ذِبحِ قَفانی
.
ناگه نه گوروبدور کی قولی قاخدی امامیم
مبهوت ائلیوبدور او زمان اهل وِلانی
.
سس گلدی بو ایستور بالاسی اصغری سجاد
لای لای دیَه قوی سینه سینه نازلی بالانی
.
تا اصغری قویدی سینه سی اوسته امامون
باغلاندی قولی بولدی کی یوخ آیری گمانی
.
بیر قبریده آچدی ایاقی آلتدا امامون
زینت وئروب اکبرله اودم پائین پانی
.
نوبت یتشوب گوردولر اصحاب امامه
بیر یرده ائدوب دفن او جمع صُلَحانی
.
امر ائتدی گلون نهره طرف اهل قبیله
باش وئردی عموم وئرمدی الدن او لِوانی
.
عباسی گئدوب دفن ائلدی حضرت سجاد
آغلاردی تمام عمروده هر صبح و مسانی
.
سجّاد دوتار «صادقی» محشرده الوندن
گر دوز یازاسان آغلاداسان اهل عزانی
ـــــــــــــــــــــــ
( 1 ) : « نفس المهمُوم و نفثة المصدُور »تالیف شیخ عباس قمی (ره)
.
#دفن_شهدا
#خامم_دولانوب_سیریده_صحرای_بلانی
#محمدرضاصادقی
#ترکی
.
✍️ #زبدةالاشعار ✍️
?: @nohe_torki
نظر دهید