«روایت عشق»
.
✍️ زبدة الاشعار ✍️
?: @nohe_torki
.
محمدعلی مصیبی تبریزی
.
سویله دیم نقاش عشقه لوحه چک نقش جنانی
روحیم آرامش تاپار اخذ ائتسه جنّتدن نشانی
.
چوخلی تعریف ایلیوبلر جنّت الاعلادن اما
گورماقیم ، تنها یقینه دوندرر حدس و گمانی
.
گلدی پاسخ ایستسن تارویت اولسون روضۀ خُلد
اول مهیّا ، نفساً و روحاً بو دور سرّ معانی
.
گز دولان دنیاده کوی و برزنی آفاقی سیر ائت
لا یُریٰ لر فاش اولار گلمز اولاردان لَنْ ترَانی
.
حق تعالی جنّتین نقشین بو دنیاده یاراتمیش
جلوۀ رضوانی کیم گورسه گئچر جاندان هر آنی
.
سنده دنیانی اگر چشم بصیرتلن دولانسان
مطمئّناً درک ائدرسن نقش زیبای جنانی
.
حاضر اولدوم رهسپار کوی جانان اولماقا من
لازم اولسا آختارام کلّ جهان و ماسوانی
.
من گرکدور رام ائدم قلبیمده کی طوفان عشقی
ساحل آرامشه چاتسین بو کشتی نین سُکانی
.
منزل اوّلده شهر #یثربه ائتدیم عزیمت
تا ائدم بلکه زیارت بارگاه مصطفانی
.
گوزلریم مخموراولوب گورجاق همان عزّوجلالی
عشقیلن طوف ایله دیم من صحن ختم الانبیانی
.
خاک جنات العلادن دور یقین خاک #مدینه
باشلانوب روز ازّل بوردان رسالت امتحانی
.
خارج اولدوم شهر #یثربدن مُطاف حقه گلدیم
مُحرم اولدوم کوی حقه گوردوم اول بیت خدانی
.
زمزمی گوردوم ادا ائتدیم صفا و مروه سعیین
#کعبه ده بیر باشلادیم اخلاصیلن ذکر دعانی
.
بادۀ توحید مست ائتمیش منی دشت مناده
رگلریمده گلدی جوشه رحمت و تکبیر قانی
.
جنّتین بیر آیری مصداقی منه اولدی هویدا
رهسپار اولدوم گینه تا ختم ائدم بو ماجرانی
.
وارد اولدوم #کاظمینه وادی موسی بن جعفر
اوردادی باب الحوائج مدفنی ، عشقین مکانی
.
محبس هارون دوشور یاده باخاندا اول رواقه
حزن و اندوه حریم یار آلور الدن قوانی
.
گرچه چوخ پوزقوندی اما اوردا وارسودای جنّت
جلوۀ جناتیدن سالمیش قلوبه انجلانی
.
قلب سوزانیله ترک ائتدیم دیار #کاظمینی
شور عشقیلن قدم ووردوم گورم تا #سامرانی
.
بیرزمان عشقین شمیمی بوردا هریاندان اسردی
ایندی پوزقون قبرلر عرشه سالور آه و نوانی
.
آسمان عصمتین جوت اختری سو سو وروللار
نور تابان ولا تنویر ائدور پیر و جوانی
.
وارد اولدوم صحن #سردابه گورم غیبت مکانین
شورعشقیلن ئورکدن سسله دیم صاحب زمانی
.
گیزلنوب گوزدن همین سردابیده ناموس دوران
ظاهر اولسا ،شوکتی حیران ائدر هرانس وجانی
.
چک کناره سن یوزوندن پرده نی ای روح زهرا
گورگیلن زهرانین حقینده نه ظلم ایلوبدی ثانی
.
سامرادن قورتولوب قصد ایله دیم کوی ولانی
زائر اولدوم طوف ائدم تا مرقد شاه شهانی
.
شیر یزدان شاه مردان چلچراغ آفرینش
وصف شجعان عرب وجده گتورمیش عرشیانی
.
مرتضی صحنی یارالدیب شوروغوغابس، #نجفده
صحن و ایوانینده واردور جنت الاعلا نشانی
.
به ،عجب زیبا و روح افزادی طاق صحن مولا
پرتو نور حرم شوره سالوبدور جسم و جانی
.
بوردا زهرانین دو نور دیده سی سُکنی قیلیبدی
بوردا آرام اولدی کلّ شیعیانین حکمرانی
.
نور حیدردن تاپوبدور عالم امکان تلألو
آتش عشق علیدن کیم یانوب آلمیش جنانی
.
منزل پنجمده طیّ اولدی خدایا نیلیوم بس
هر طرفدن آلمیشام عطر بهشت و ماسوانی
.
سرّ عشقی بو جهاندا قادر الله فاش ائدوبدی
نفس باهمت گرک ، تا درک ائده بو ادّعانی
.
غفلتاً ذهن پریشانیمدن آیری صحنه گئچدی
یادیمه سالدیم #بقیع دشتینده بیر درد آشنانی
.
باشیمه دوشدی #بقیع شوری یاخونلاشدیم او دشته
حُزن و اندوهیمدا یاندیردیم دئسم ارض و سمانی
.
بیرقرانلوق دشت،کیم گورسه،دونرگوزیاشی قانه
اشک حسرت گوزدن آخسا قوزارعرشه آه و وانی
.
فاطمه ، اوغلی حسن ، سجّاد وباقر ، صادقیلن
گون قباقینده قالوبلار ، اُفّ اولا ، دنیای فانی
.
چوخلارین زهرانین آهی یاندیرار محشر گونونده
هم اونا سیلی ورانی ، هم او اسنادی جئرانی
.
هم او اوچ یوز ناکیشی،زهر ایلینلر کام عشقی
هم او وانفساده باب اهل بیتی یاندیرانی
.
صرصر ظلمیله پرپر اولدی عصمت غنچه سی
ظلم ثانی بو مکاندا بوکدی قدّ مرتضانی
.
باد رحمت سمت مشرقدن او صحرایه اسوردی
منده گوزدن جاری ایلیردیم یوزه اشک روانی
.
دفعتاً درک ایله دیم بیر هاتف غیبی نداسین
عالم معناده بیر سس گلدی تترتدی سمانی
.
سویله دی فاش ایستیسن گورسون گوزون خُلدبرینی
رجعت ایله ملک #طوسه قوی قَدَردوتسون قضانی
.
توپراقیندا بیر صفالی گوهر غلتان یاتوبدی
جنتین عطرین آلار کیم گورسه اقلیم #رضانی
.
رویت ائتدیم یدّیمینجی جلوه گاه عشق حقی
گوردیم اوردا گنبد زیبا و زرّین و طلانی
.
نور حق، هرگوشۀ صحن ِحرمدن پارلانوردی
زائران خسته سسلوردی امام ِ مه لقانی
.
بام گنبددن اوچور آزاده قوشلار چوخ سبکبال
اونلارا حسرت قالوب باغ بهشتین بلبلانی
.
کوی عشقه مَحرم اولدی کیم رضایه همدم اولدی
عاقبت تاپدی حریم عشقیده کنز وفانی
.
وئرخبردرداهلینه سالسین گذارین شهر #طوسه
آلماقا درده دوانی سسله سین دردآشنانی
.
ناز ائدر جنّات الاعلایه #خراسان ملکی یارب
فیض شایانه چاتار کیم گورسه بوصحن وسرانی
.
الله الله یدّی باب جنّته دوشدی گذاریم
هر بیریندن درد بی درمانیمه آلدیم دوانی
.
قبر #پیغمبر ، حریم #کعبه ، شهر #کاظمینی
هم #نجف هم #طوسی گزدیم،هم #بقیع و #سامرانی
.
واردی سگّیز بابی امّا جنتین پروردگارا
آخرین بابی اگر گورسم فدا قیللام بوجانی
.
نیلیوم آیا هایاندا قلبیمین سرّین آچوم من
چاتدی داده هاتف غیبی وئرنده بو ندانی
.
ای طریق معرفت رهروسی غافل یاتمیسان
هشتمین باب بهشتی ایستی سن ! ای یار فانی؟
.
شرطی واردوراوّلاً گوز حدقه سین قانیله دولدور
سینه وه وور خنجر خونین عشق اقربانی
.
باغریوی قان ایله ، قانلی نهردن آل دستمازین
امتناع ایله سودان ایچمه ،سوسوز گز بو منانی
.
اوندا کی روحین غبار عشقیلن ممزوج اولوندی
قورخولی دورانیده سال یادیوه #کرب وبلانی
.
شورعشقیلن حسینون آدینی سسله ئورکدن
نیلیوب گور کوفیانِ دون ذبیحاً مِن قفانی؟
.
اوردا زهرا اوغلونون دشمن باشین دالدان کسوبدی
سسلنوب آخر نفسده البلاءُ لِلولانی
.
اوردا اسدی قورخولی یللر گلستان ولایه
یوم عاشورا پوزولدی اهل بیتین دودمانی
.
اوردا اوچ پراوخ دگوبدی آلتی آیلیق صود امردن
درگه حقده فدا ائتدی حسین دیلسیز بالانی
.
اوردا جسم اکبری عدوان ائدوبدور پاره پاره
دوغرانان جسمی حسین جمع اتماقا آچدی عبانی
.
اورداعباسین اوزون قوللاری ذبح اولدی سواوسته
دوشدی تا آتدان یره آغلاتدی یثربده آنانی
.
قاسمین طوی حجله سین قورموشدی مولاکربلاده
طوی دونوب یاسه، حرملر قوزادی عرشه نوانی
.
اولدی قربانگاه ، دشت کربلا لب تشنه شاهه
کیم بو دشته زائر اولسا روز محشر وار امانی
.
سائل درگاه آل مصطفایم چوخدی دردیم
کربلانی گورمه سم من نیلورم ملک جنانی
.
فاطمه اولادی ، عمراً ، سائله یول باغلامازلار
استغاثه ایله سم والله وئرلّلر کربلانی
.
ای «مصیّب»روضه رضوانه وار سگّیز رواق
ایسته سن جنّت اگر ، سال قلبه نور اولیانی
.
شافع شیعه قیامتده علی اولادیدور
چارده معصومیدن دنیاده آل ، جنت سرانی
.
#14معصوم
#سویله_دیم_نقاش_عشقه_لوحه_چک_نقش_جنانی
#مصیبی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید