فانی دونیاده بنی نوع بشر قالمایاجاق #پندیات_اکبر_قنبری

عبرت نامه
.
.
اکبر قنبری تیکمه داش
.
.
فانی دونیاده بنی نوع بشر قالمایاجاق
ائده جک عالم عقبی یه سفر قالمایاجاق
.
چکه جک کامینه توپراق بو فنا دونیاده
اولا یوز یاشلی قوجا یا سود امر قالمایاجاق
.
نوحدن چوخ یاشایان اولسادا دونیاده اگر
اول اوزون عومر آخیر باشه یئتر قالمایاجاق
.
اولاسان رستم دستان بونو بیل گئتمه لی سن
نه بیلک قدرتی نه نیزه سپر قالمایاجاق
.
نولدو کی کاووس و جمشیدجم اسکندر هانی
لشگرو سلطنت و افسر و سر قالمایاجاق
.
آغ سارای باخما کی آغدیر اودا بیر گون قارالیب
اولاجاق توپراق ایله زیر و زبر قالمایاجاق
.
برج لار واردی اکیز تای، اوجالیب کهکشانا
هئچ اولارداندا بو دونیاده اثر قالمایاجاق
.
شاه اولا یا کی گدا بیر کفن ایلن گئده جک
اودا قسمت اولا یا اولمایا گر قالمایاجاق
.
گنج قارونیدن آرتیق اولا گر سیم و زرین
نئجه کی قالمادی قارونه او زر قالمایاجاق
.
وار قازاندی چوخو بو دهریده مین زحمت ایلن
اولاجاق بیلمه دی آخیرده هدر قالمایاجاق
.
ریشه دن اولسا قوی هر نئجه عومرون آغاجی
ویراجاق دست اجل بلکه تبر قالمایاجاق
.
قورتارانماز بیری جان معرکه دن، هر کیم اولا
ال اله وئرسه قضا ایله قدر قالمایاجاق
.
وان یکاد آیه سی مین یولدا تلاوت اولونا
کیمه صیاد اجل سالسا نظر قالمایاجاق
.
باخ بصیرتله او گئچمیش لره بیر عبرت ائله
قالمایب کیمسه، نه خاقان، نه نوکر قالمایاجاق
.
عومرون هر قدریده اولسا چالیش اول بانی خئیر
خئیر عمل توشه اولار محشره شر قالمایاجاق
.
بیر فقط نام نکو خصلت نیکو قالاجاق
قنبری هر گلن آخیرده گئدر قالمایاجاق
.
.
#پندیات_اکبر_قنبری #ختم_خوانی #ترکی