قلبیمی تسخیر ائدیب بیر ماه سیما دوغروسی #حیدریه

یا علی
.
✍️ زبدة الاشعار ✍️
.
🆔: @nohe_torki
.
مرحوم سید یوسف بهجت اردبیلی
.
قلبیمی تسخیر ائدیب بیر ماه سیما دوغروسی
اولموشام دیوانه سر، مجنونِ شیدا دوغروسی
.
من دئیردیم اختیارین وئرمز الدن هوشیار
اختیاریم آلدی بیر زلف چلیپا دوغروسی
.
ایندی بیلدیم چون اؤزوم یاندیم شرار عشقیلن
عشق یوسف دن نه لر چکمیش زلیخا دوغروسی
.
کامِ فرهادی نه سان تلخ ائیله ییب شیرین غمی
یا نه لر مجنونه ائتمیش حُبّ لیلا دوغروسی
.
وامق بیچاره یه هرگز شماتت قیلمایین
هوشی نی باشدان چیخارتمیش حُسن عذرا دوغروسی
.
اولموشام رسوای شهر آخیر یانار احوالیما
بخته باخ هم اهل مسجد هم کلیسا دوغروسی
.
قورخورام مندن خدایا! یار نازک دل سینا
تاپموشام بیر اؤزگه معشوقِ دل آرا دوغروسی
.
بندبندیمدن سیزیلدار بوسبوتون اعضالریم
بس سیخیلمور عقلیمه بو فیض عظما دوغروسی
.
یا علی! دیوانه ی عشقم نئجه وصفون قیلیم
گلموری وصل و بیانه شأن والا دوغروسی
.
هل اتیٰ باشدان باشا وصف کمالوندور سنون
شأنه باخ مدحون قیلار خلاق یکتا دوغروسی
.
یا علی یا ایلیا یا بوالحسن یا بوتراب
شأنووی تأیید ائدر حی توانا دوغروسی
.
سس گلیب گؤیدن ووراندا عبده وده ذوالفقار
لافتی الا علی لاسیف الا دوغروسی
.
بیلمه رم ناحق دی، برحق بو علی اللهی لر
شأنووه حیران قالیب اعلی و ادنی دوغروسی
.
حیدر آد قویموش آنان قونداقیده بیر طفل ایکن
لیک معناده بو اسمه بیر مسما دوغروسی
.
اهل جابلقا سنی ذکر ائیله ییر اولدور سبب
موم اولوبدور اللرینده سنگ خارا دوغروسی
.
عالم الغیبه نه لازم عرض ائدک درویش لر
تک سنی توتموش آتیب دنیا و عقبا دوغروسی
.
سن کی عین الله سن قیل خانقاهه بیر نظر
تا اولا باغ جنان تک عنبرآسا دوغروسی
.
بهجته الله عؤمور وئر مدح مولا سؤیله سین
حیف دور خاموش اولا بو نطق گویا دوغروسی
.
.
#حیدریه_مدح
#قلبیمی_تسخیر_ائدیب_بیر_ماه_سیما_دوغروسی
#بهجت_اردبیلی
#ترکی
.
✍️ #زبدةالاشعار ✍️
.
🆔: @nohe_torki