وصیت حضرت رسول اکرم (ص)
خطاب به حضرت زهرا(س)
..
..
مرحوم خوندل تبریزی
..
..
قیزیم گلمه بیله افغانه زهرا
آتان جان تاپشورور جانانه زهرا
..
..
قیزیم بیر گول کیمی چوخ تیز سولارسان
بهارین ابری تک دائم دولارسان
بو تیزلیقدا منه ملحق اولارسان
گلرسن روضۀ رضوانه زهرا
..
..
قیزیم وار عزّتون دوشمه بو حاله
منی جان اوسته سالما چوخ ملاله
بو قدری ایلمه هجریمده ناله
دایان صبر ایت غم هجرانه زهرا
..
..
قیزیم چوخ گلمه فریاد و نوایه
دوشر مندن صورا باشون بلایه
دایان صبر ایله هر بیر ابتلایه
یتور اوز عمریوی پایانه زهرا
..
..
قیزیم گوز یاشیوی توکمه عذاره
بیله گلمه فغان و آه و زاره
هله گول اولمیوب مقهور خاره
سرشگون آخمیوب دامانه زهرا
..
..
قیزیم چوخ اولماسون پژمرده حالون
هله وار عزّت و جاہ و جلالون
غنیمتدور بو ایّام وصالون
ملول اولما غم دورانه زهرا
..
..
قیزیم چوخ آغلاما چوخ ایتمه شیون
هله ال آچمیوبدور ظلمه دشمن
هله وار احترامون تا وارام من
قیزیم چوخ شکر ایله بو آنه زهرا
..
..
قیزیم آز اشگون ایت رخساره جاری
هله آز آغلا چوخ پوزما وقاری
خزانه دونمیوب عمرون بهاری
گلون خار اولمیوب عدوانه زهرا
..
..
قیزیم ظلم اهلی شورا قورمیوبلار
منیم گلزاریمی سولدورمیوبلار
هله درگاهیوی یاندیرمیوبلار
جهان اولموب سنه غمخانه زهرا
..
..
قیزیم وار باشیون چوخ چوخ بلاسی
هله اولما مصیبت آشناسی
هله سینونده یوخ دشمن یاراسی
وجودون باتمیوبدور قانه زهرا
..
..
قیزیم صبر ایله بو رنج و اَلَمده
جسارت یوخ هله اهل ستمده
هله کشتی عمرون بحر غمده
ستمله دوشمیوب طوفانه زهرا
..
..
قیزیم اولما هله زار و مکدّر
گلنده بیعته قوم ستمگر
اولار بیر کشمکش بیر شور محشر
او گون گلمز ملالون سانه زهرا
..
..
قیزیم وار شرح غم آغلار گوزونده
گرک شکر ایلیاق منده اؤزونده
هله یوخ نقش سیلی گول یوزونده
سرشگون دونمیوب عمّانه زهرا
..
..
قیزیم گللر سولار رنگون سولاندا
یانار قلبیم گوزون اشگه دولاندا
گوزوم نوری حسن مسموم اولاندا
گلر سن شیون و افغانه زهرا
..
..
قیزیم اولما هله غم مبتلاسی
بلالی باشیوین وار چوخ بلاسی
حسینون ماجرای کربلاسی
وورار اود عالم امکانه زهر
..
..
قیزیم ظلم اهلی بیر شورا قورالّار
بلائیله جهانی دولدورالّار
ایله گلزار دینی سولدورالّار
غم آرتار بو دل سوزانه زهرا
..
..
قیزیم اولما بلادن ایمدی خسته
او گونده آغلا یان ای دلشکسته
حسینون نعشی ایسّی قوملار اوسته
دوشر بیر قان دولان میدانه زهرا
..
..
قیزیم آغلا گر اول شورانی گورسن
نه شورا محشر کبرانی گورسن
نه محشر شور عاشورانی گورسن
گیدر صبر دلون تالانه زهرا
..
..
قیزیم «خوندل» بیزه ایتدوقجه خدمت
اورکده آرترار میل و ارادت
اونون وار حاجتی ایله عنایت
دی دردین خالق سبحانه زهرا
..
..
#پیامبراسلام #خوندل_تبریزی #پیامبراسلام_شهادت #ترکی #زبدةالاشعار
نظر دهید