شب اربعین
.
✍️ #زبدةالاشعار ✍️
.
🆔: @nohe_torki
.
مرحوم سید یوسف نجمی تبریزی
.
نجه دوزوم دایانوم گلمیوم فغانه نجه
حسین تشنه لبون اربعینیدور بو گجه
.
فغان و شیونله نه فلک دولان گجه دور
آناسی فاطمه نون اشکی قان اولان گجه دور
.
دل جهانی اودا درد و غم یاخان گجه دور
امام عصرین اوزه گوزیاشی آخان گجه دور
.
خدنگ غم دل پیغمبری دلن گجه دور
دلنده وا ولدا شیونه گلن گجه دور
.
علی ولی خدا بیقرار اولان گجه دور
دوباره اودلی دلی پرشرار اولان گجه دور
.
سحر آچیلسا نوائیله نینوا دولاجاق
قیامت عالمی عالمده آشکار اولاجاق
.
نوایه نی کیمی سکّان آسمان گله جاق
او قبر پاکه نچه دسته کاروان گله جاق
.
فغانیله جبروت اهلی دسته بدسته
زیارته گله جاقلار او توزلی قبر اوسته
.
هامی پیمبر او صحرای ایمنه گله جاق
او آلتی گوشه مزار اوسته شیونه گله جاق
.
بتول حسین آدینی دلده ازبر ایلیه جاق
عیان او دشتیده بیر تازه محشر ایلیه جاق
.
ابوتراب شه لافتی گریبان چاک
او دشتده سپه جاق شیوینیله باشنه خاک
.
سالوب او قبره اوزین مجتبی فغان ایده جاق
دلنده قارداش آدی گوزیاشین روان ایده جاق
.
یانا یانا گله جاق دلده نالهء جانکاه
حسین زیارتینه جابر ابن عبدالله
.
پیمبرین قوجا اصحابی درد و غم اوتاجاق
پیمبر اوغلونا قبرینده اربعین دوتاجاق
.
حسین دیه دیه گوزیاشلی شام اسیر لری
زیارته گله جاق شمر دستگیرلری
.
رباب اصغره لای لای دیه دیه گله جاق
یواش یواش بالام ایوای دیه دیه گله جاق
.
عروس اود سالاجاق حسرتیله ایجاده
فغانیله گله جاق اربعین داماده
.
شرار حسرتیله لیلی سینه داغلیه جاق
علیّ اکبره پایین پاده آغلیه جاق
.
سکینه قبر حسین اوسته دلده شور و نوا
سیزیلدییوب دیه جاق یانه یانه وااَبتا
.
بیوک لر آغلیه جاق خردا قبرده یاتانا
لب فراتیده لب تشنه قانینه باتانا
.
باتوب فغانیله کلثوم تازه بیر یاسه
سرشگیله سپهدجاق سو مزار عباسه
.
خدا بولر که نه حاله علی قیزی قالاجاق
اوزون نجه او گوزل مدفن اوستنه سالاجاق
.
دلنده ناله اَلنده حسین پیرهنی
نه نوعی اوخشیاجاقدور او شاه ممتحنی
.
یوزنده گوزیاشنی قطره قطره سان ویره جاق
کبود اولان بدنین قارداشا نشان ویره جاق
.
سپهره اود سالاجاق آتش ملالندن
او قبره سو سپه جاق اوز سرشک آلندن
.
دویونجا آغلیاجاق گوزیاشین روان ایده جاق
رقیه حالنی قارداشنا بیان ایده جاق
.
حسیننه دیه جاق تیکمه چوخ گوزوی یولا
خرابده بالام اُلدی سنون باشون صاق اولا
.
ویرنده جان سنی گوزلردی سینه داغلاردی
باخاردی صاق صولا حیرتله سینه داغلاردی
.
قوری یر اوسته ویروب جان ایکی قولوندا طناب
باخوب اونا باشا توپراق سپوب بو خانه خراب
.
او حالتی بالامون اُمّهاتی یاندوردی
سالوب شراره دل کایناتی یاندوردی
.
اونون او حالنه تا وار جهان، جهانیان یاناجاق
ولیّ ِ عصرین اولوب اشک چشمی قان یاناجاق
.
مجسم ایلیه جاق #نجمی حالین آغلیه جاق
رقیه وای دیه جاق غمله سینه داغلیه جاق
.
.
#نجه_دوزوم_دایانوم_گلمیوم_فغانه_نجه
#ترکی
.
✍️ #زبدةالاشعار ✍️
.
🆔: @nohe_torki
نظر دهید