وقایع حضرت قاسم (ع)
.
.
علومی تبریزی
.
.
نه عشق و محبتدی ناز اولماسا
نه عاشقدی اوندا نیاز اولماسا
.
یتیشمز مراده تاپانماز وصال
هر عاشقده سوز و گداز اولماسا
.
نه نوعیله محمود اولار کامیاب
اما اگر خاک پای ایاز اولماسا
.
دیولمز حسین عاشقی هر کسه
اگر اوندا بیر امتیاز اولماسا
.
گرک کشف اولا عاشقین منصبی
اگر عرض حالیم دراز اولماسا
.
مراد حسین گلمز آخر اله
حقیقتده ترک مجاز اولماسا
.
حسین دین اسلامه قربان اولوب
بولونمز اگر کشف راز اولماسا
.
عمل بال و پردی حسینی لره
اوچانماز پر شاهباز اولماسا
.
همین شیون و ناله و آه و زار
نتیجه ویرر حرص و آز اولماسا
.
بو مجلس بو ماتم بو بزم عزا
آلنماز نتیجه نماز اولماسا
.
.
نماز اوسته سلطان دین جان ویروب
نچه ماه رو دینه قربان ویروب
.
.
ایدون اشگ دیده روان قاسمه
ایدر ناله صاحب زمان قاسمه
.
امام حسن شاد اولار آغلاسا
جوانان مجلس جوان قاسمه
.
کفن گیدی طوی خلعتی فرض ایدوب
یتوب قان حنا مهربان قاسمه
.
گوروب کربلاده بلا موجنی
اولوب تیره ملک جهان قاسمه
.
شهید اولدی شهزاده اکبر غمی
یتیشدی کران تا کران قاسمه
.
علیدن صورا زنده قالماخ دیدی
چتیندی بو چولده عیان قاسمه
.
اوتورموشدی افسرده اکبر آدی
چون اولموشدی ورد زبان قاسمه
.
ایشتدی گلور هل مبارز سسی
بو سس اولدی طوق گران قاسمه
.
گلوب اذن آلا شاه بی یاریدن
که چوخ تنگیدی ملک جان قاسمه
.
عمودن آلوب رخصت کارزار
یتوب نوبت امتحان قاسمه
.
.
اولوب بو خبر خیمه ده انتشار
که قاسم اولور عازم کارزار
.
.
وداع ائتماقا جانی جانان گلوب
هره بیر سوزی ایلوب عنوان گلوب
.
سریّه اولوب هم صدا لیلیه
رقیّه ملول و پریشان گلوب
.
رباب آلدی دسمال اله آغلادی
قوجاقینده اصغر او نالان گلوب
.
.
دیور گل علی اصغری بیرده گور
که یوخ بوندا یارای هجران گلوب
.
سکینه باخوب فاطمه آغلادی
گوروبلر بیرى الده قرآن گلوب
.
خبردار اولوب عمه سى باش آچوب
دوروب بزم داماده مهمان گلوب
.
قورولدی عزا خیمه ده قاسمه
که هر گوشه دن داد و افغان گلوب
.
گلنده دله سسلینده آتا
قولاقینه هر سمتدن جان گلوب
.
گوروب دورسا وقت شهادت گچر
بو دعوت اونا بیلدی آسان گلوب
.
خداحافظ ایتدی چخوب خیمه دن
آناسین قویوب دیده گریان گلوب
.
.
چخاخ خیمه لردن یتاخ مطلبه
سوار اولدی شهزاده تا مرکبه
.
.
الینده حسامی یوزونده نقاب
چخوب شرق اخیامدن آفتاب
.
گوروب اشقیا بیر جوان دلیر
ایدور رزمه یتماقه سعی و شتاب
.
گلوب گوئیا مرحب اوسته على
گیدور گوئیا خیبره بوتراب
.
یتوب روبروی صف لشگره
دایاندی او فرزند مالک رقاب
.
بیوردی ندن ای سپاه یزید
ایدورسوز بو گون کاخ دینی خراب
.
بو فرزند زهرادی روح رسول
حسیندور بیلور منصبین شیخ و شاب
.
بو سروردی اسلامه پشت و پناه
بو مولادی طاهایه نائب مناب
.
دوتوبسوز فراتین یولین تشنه دی
سالوبسوز دل پاکنه اضطراب
.
زناکاره مزدور اولوبسوز هاموز
ندور سیزده روز قیامت جواب
.
پشیمان اولون ال چکون ظلمدن
گچر عمر دنیا یاخوندور عذاب
.
.
گوروب گلمدی کیمسه اصلا دله
گلوب غیظه شمشیرین آلدى اله
.
ازل چکدی بیر نعرۀ حیدری
سالوب اضطرابه دل لشگری
.
اؤزین ویردی دریا کیمی لشگره
پوزوب اوّلین حمله ده صف لری
.
بلا نازل اولدی گینه لشگره
ویروب بیر بیره فرقۀ کافری
.
خزان تک توکوب باشلاری توپراقا
هم آواز ایدوب پیکره پیکری
.
ایدوبدی او صحرانی دریای خون
چخوب لشگرین عرشه شور شری
.
فرار ایتدی مور ملخ تک قوشون
بیری تیغین آتدی بیری خنجری
.
قباقندا خوار اولدی فوج نظام
قوشون یاد ایدوب ساقی کوثری
.
چکوب دلدن الله اکبر سسین
سالوب خوفه قوم ستم پروری
.
گوروب ضرب شصتین خیال ایتدیلر
علیدور آچور قلعۀ خیبری
.
.
دایاندی بیر آز هم نبرد ایستدی
مصافه او شهزاده مرد ایستدی
.
.
بو حالی گوروب ابن سعد شریر
یوزون ازرقه دوندروب ناگزیر
.
دیدی بو جوانه اوزون ویر جواب
جوابینده عاجزدی قوم کثیر
.
بو سوز چوخ گران گلدی اول کافره
منی سویلدی ایلدون چوخ حقیر
.
منه عاریدور جنگ ایدم طفلیله
بو بیر طفل من پهلوان دلیر
.
بیرین ایندی دورت اوغلومین یولّارام
بو شهباز چالاکی ایلر اسیر
.
غرض ازرقین دورت جوان اوغلنی
شکار ایتدی میداندا شیراوغلی شیر
.
گورنده که دورت اوغلی اولدی هلاک
غضبله یرندن دوروب کلب پیر
.
گلوب قاسمون جنگینه هولیله
تماشایه دوردی سپاه شریر
.
قوشوندان چخوب گویلره هلهله
بیابانی دولدوردی بانگ نفیر
.
یتیشدی بو سسلر خیامه او دم
تماشایه چخدی صغیر و کبیر
.
.
آناگوردی شور و نوا ایلدی
عموسی اورکدن دعا ایلدی
.
.
مفصلدی گرنکته تقریر اولا
مطالب یته باشه تحریر اولا
.
بو مجمل بیانیمده بیر شرح وار
که لازمدی بو یرده تفسیر اولا
.
کومکسیزلوق عالمده چوخ سختدور
نه تنها جوانه ولو پیر اولا
.
نه نوعی دیوم یا امام زمان
نه جرعتله بو غصّه تعبیر اولا
.
جوان قاسمه اولمیا بیر کومک
اوزی خسته عطشان و دلگیر اولا
.
حریفی ولی مست جام غرور
دالندا سپاه الده شمشیر اولا
.
اودور باخدی بیر خیمه گاهه طرف
او باخماقدا بلمم نه تدبیر اولا
.
گوروب ال دعاده آچوب باشنی
که جاری گرک حکم تقدیر اولا
.
یقین ایلدی ئولدورر دشمنی
مسلّم دعاسنده تأثیر اولا
.
.
ویروب یخدی قان ایتدی گوزیاشنی
انوب مرکبیندن کسوب باشنی
.
.
الینده او باش قاسم نوجوان
اولوب شوقیله خیمه گاهه روان
.
یتوب مقدم شهریاره آتوب
گلوب شوره قلب امام زمان
.
آچوب قولارین اهلبیت آغلادی
باسوب باغرینا قاسمی ناگهان
.
دیدی هاردادور بس حسن قارداشیم
گوریدی سنی اول شه انس و جان
.
عمون بیر بیله ضرب شصته فدا
که سندن ظهور ایلدی ای جوان
.
شجاعتله ئولدورموسن دشمنی
ایدوبسن جهیمه او شومی روان
.
نه ایسترسن ایسته نه اولسا سوزون
حسین باخما یالقوزدی ایله بیان
.
سوسوزلقدان ایتدی شکایت دیدی
یانور دل دوداقیم عمو الامان
.
یانوب قلب شه آتش خجلته
بیوردی آز ایت اشگ آلون روان
.
قایت ایمدی گوزلور سنی اکبریم
سو جامی گزور الده ایمدی آتان
.
.
قایتدی نچون باشدا شوق لقا
شهید اولدی تاپدی مقام بقا
.
.
.
#قاسمیه #علومی_تبریزی #قاسمیه_شجاعت #قاسمیه_شهادت #ترکی #زبدةالاشعار
نظر دهید