استمداد حضرت قاسم(ع)
.
.
#سبک_ای_باشی_سرنیزده_معراج_ایدن
.
.
مرحوم میرزا عبدالوهاب حقیرخویی
.
.
.
.
هارداسان ای دادرسیم داوریم
آلدیلا اطرافیمی دشمن لریم
یخدیلا آتدان منی/لشگر عدوان منی
لطف ائله یردن گوتور/ای شه عطشان منی
.
.
عرصه نی دشمن منه چوخ ائتدی تنگ
قالدی نه قدرت و نه یارای جنگ
جسمیم اولوب بسکه نشان خدنگ
دوشدی یئر اوزره یارالی پیکریم
.
.
دادیمه یوخدی عمو بیر کیمسنه
محض قالوب بیرجه امیدیم سنه
دورما اؤزون ایمدی یتور تئز منه
منتظرم گوزلوری یول گوزلریم
.
.
آرتوق اولوب زخم لریم کارگر
جان گئدر ایله باشیم اوسته گذر
گر منی ئولدورمه سه بو یاره لر
ئولدورر البته بو زخم سریم
.
.
چون اوزولور دامن وصلوندن ال
باعث تأخیر ندور العجل
وئرمیه قورخوم بودی مهلت اجل
بیرده جمالون گورم ای سروریم
.
.
صوت حزینیله یتوردی سلام
ردّ جواب ائتدی امام انام
ایلدی فی الفور یریندن قیام
سسلدی تئز آت گتور ای خواهریم
.
.
حمله ائدوب لشگره چون شاه باز
گلدی باشی اوسته امیر حجاز
لطفیله دامادین ائدوب سرفراز
کای فلک حُسنه مه انوریم
.
.
آچ گوزون ای وارث حُسن حسن
سنده حسن حُسنی به وجه حسن
عکس سالوب جام حسینیده سن
گور اؤزون ای آینه ی مظهریم
.
.
سن منه قارداشسان اوغول من سنی
جان کیمی آغوشه چکوم من سنی
لیک حیاسیزدی بو قوم دنی
هرگز امان وئرماقا یوخ یاوریم
.
.
خیلی گراندور منی فریادوه
سسلیه سن یِئتمیَم امدادیوه
یا یتیشن دمده اوغول دادوه
ایش گچه ایشدن سینا بال و پریم
.
.
آه بو بیر گوندی اعادی فزون
یار و هوادارلریم غرق خون
قلّت احباب و علم واژگون
وار نه معینیم نه قالور لشگریم
.
.
گل بدنون ای مه برج جمال
آتلار ایاقینده اولوب پایمال
فرق ائلمز بیر سوز علی ایّ حال
اؤز نظریمده سنیله اکبریم
.
.
آچدی گوزون قاسم گلگون قبا
عرض ائدوب ای خامس آل عبا
گَتدی سو کوثردن آتام مجتبا
گوردی عطشدن قوریوب لبلریم
.
.
قوی یوزومی توپراقا ای شهریار
تا سر کویونده ائدم جان نثار
بسدی منه بو شرف و افتخار
خاک رهون اولسا اگر بستریم
.
.
یازماقا وار الده «حقیرا» مجال
فوت ائلمه روز و شب و ماه و سال
تا ساق الیمده اولا وقت سؤال
نامه ی اعمال کیمی دفتریم
.
.
.
#قاسمیه_شهادت
#هارداسان_ای_دادرسیم_داوریم
#حقیر_خویی #قاسمیه
#ترکی
#زبدةالاشعار
نظر دهید