اربعین
.
✍️ زبدة الاشعار ✍️
.
🆔: @nohe_torki
.
مرحوم حسینی سعدی زمان
.
گزمیشم آنام اوغلی کوفه نی
شامدن حکایت گتورمشم
پاره پاره بو قانلو کوینگون
مایۀ شکایت گتورمشم
.
ای شفیع محشر ایاقه دور
شورش قیامت گتورمشم
.
.
سن او گون که بو چولده تشنه لب
یتدون اوز مقدّس مراموه
طیّ ائدوب شهادت عوالمین
نائل اولدون عالی مقاموه
سویدولار بنات رسالتی
ووردی اهل کین اود خیاموه
من همان او اوددان بو آتشین
آهیمی علامت گتورمشم
.
.
کوچ ائدنده بو سرزمیندن
وئرمدی امان کوفیان منه
عور قویمیام زلفیمی آچام
ایلیم یارالی کفن سنه
واریدی بیر عذرِ موجّهیم
دستگیریدیم اوندا دشمنه
عذریمی قبول ائت گذشت ایله
روحیمی خجالت گتورمشم
.
.
کوفه ده جدا اوسته باشوی
گوردوم اوخشوری بدر کامله
اگلشوب جمال الله اوسته کول
کول ائدوب گونیله مقابله
یتمدی الیم سیلماقا کولین
واریدی آرالیقدا فاصله
گورموشم یارالی باشون دئمه
باشیمی سلامت گتورمشم
.
.
سرِّ مبهمِ عشقی فاش ائدم
ایلدیم ازلده تلاشیمی
گوستروب مقامات امتحان
داده سسلدیم آلِ هاشمی
باشووه باخوب ووردوم اول زمان
محمله بو شوریده باشمی
مینی دلیل عشقین مقابلی
باشدا بیر جراحت گتورمشم
.
.
حشر اولونجا یاددان چخارتمارام
گوزدن عترتون آتماقون سنون
خولیه قوناق گئتماقون گهی
کوللر اوسته تک یاتماقون سنون
شمر ائوینده اِجّانَه آتدا گه
توپراقا کوله باتماقون سنون (1)
یاتماماقدا اؤز حالیمی سنون
حالوه شهادت گتورمشم
.
.
صبح اولونجا یاندون سیزیلدادون
قانلی باشیله ایلدون نوا
گه عیالوی یادوه سالوب
گه کمک لرون ایلدون ندا
گه دئدون فراغت تاپانمادیم
گوندوزی مناجاته ای خدا
شکر اولا سنه بو گجه اله
موقع فراغت گتورمشم
.
.
بیر دقیقه قارداش حسین دئمه
زینبون بو مدتده دینجلوب
مجلسنده مرجانه اوغلونون
باغریمی شماتت اوخی دلوب
کوفه نین اراذل جماعتی
مجلسه تماشامیزه گلوب
سینه ده باشیم تک جراحتِ
طعنه و شماتت گتورمشم
.
.
عالم محبتده باشیمی
سن کیمی بلیّیاته سالمیشام
صبرده آنامدان مُبرّزم
جهد ائدوب بو تصدیقی آلمیشام
کوفه ده بُلورسن نه نحویله
دست بسته زنداندا قالمیشام
شدّت ایلدوقجا مصیبتیم
من دوام و طاقت گتورمشم
.
.
گون کیمی گوروب نیزه ده باشون
شام شومه چون سایه گئتمیشم
ملّت مسلمانه عار اولا
باش آچوخ کلیسایه گئتمیشم
سن بو یولدا باش وئرموسن اودور
منده دیر ترسایه گئتمیشم
نازنین باشوندان مزاروه
مژدۀ هدایت گتورمشم
.
.
گر چه چوخ جفا چکمیشم ولی
بیرجه شامیدن وار شکایتیم
شامیان ائدن جور و ظلمدن
ایمدیده پریشاندی حالتیم
شامده دونوب شامه گوندوزوم
غصه دن بوکولدی بو قامتیم
سرگذشتیمی ثابت ائتماقا
بیر خمیده قامت گتورمشم
.
.
شهر شامده رنگ محنته
شامیان بویاندوردولار بیزی
بیر خراب اولان شهرین اشقیا
هر یرین دولاندوردولار بیزی
باشلاریمیزا اودلی نی توکوب
نار ظلمه یاندوردولار بیزی
ذلّته دوام ائتمیشم اله
عزّت و سعادت گتورمشم
.
.
اهل بیتوی باسدیلار داشا
سنگدل یهودی جماعتی
وار یری دئسم آلِ حیدرین
اولدی آشکارا قیامتی
ووردی داش عجوزه جبینوه
ایلینده قرآن تلاوتی
باخمادی دیور نیزه ده باشون
معجز امامت گتورمشم
.
.
هر مصیبته دوزموشم ولی
بیر مصیبتیم چوخ گران اولوب
داد بزم شرب یزیددن
گوز یاشیم او مجلسده قان اولوب
بو کباب اولان قلبیمون آلان
تاب و طاقتین خیزران اولوب
دلده کی مفصّل شکایته
مختصر اشارت گتورمشم
.
.
موج سیل اشک ایلدی منیم
صبر ائویمی ویران خرابه ده
آجلیقا دوام ایلینمدی
وئردی بیر قزون جان خرابه ده
گوز یاشی بنات رسالتین
اولدی غصّه دن قان خرابه ده
قبرون اوسته گوز یاشی قان اولان
عترت رسالت گتورمشم
.
.
دکتر معالج سراغ ائدر
هر کیم اولسا بیر درده مبتلا
ای آدی دوا تربتی شفا
ایلورم سنه منده التجا
نوکروز #حسینی مریض دور
بیر نگاهیله وئر اؤزون شفا
گلمیشم الیمده حضوروزه
شعر بی لیاقت گتورمشم
.
(1)اِجّانه = تغار ، طشت
.
#سبک_ساخلا_ناقه_می_کاروانیدن (بیش از 8 سبک زنجیر و سینه زنی)
.
#اربعین
#سعدی_زمان
#گزمیشم_آنام_اوغلی_کوفه_نی
#چهارده_معصوم_حسینی ص 220
#ترکی
.
✍️ #زبدةالاشعار ✍️
.
🆔: @nohe_torki
نظر دهید