زبانحال حضرت امام حسین (ع) خطاب به زینب کبری(س)
در شهادت حضرت علی اصغر (ع)
.
#زبدةالاشعار
.
: @nohe_torki
.
مرحوم رهبری تبریزی
.
گل زینب الیم اوسته لب عطشان بالام ئولدی
جان بر کف اولوب عاشق جانان بالام ئولدی
.
بو غنچه گلی خار جفا ایله دی خندان
اولدی الیم اوستنده بالام قانینه غلطان
جانین ایله دی سود امریم دینینه قربان
قانه بویانوب حال پریشان بالام ئولدی
.
.
گلموشدی بالام سو ایچه سو ویرمدی اعدا
شام اهلی ولی قوردولا تیز قتلینه شورا
گل قارداشوا زینب اولوب محشری کبرا
هر آن دولانور باشیمه میدان بالام ئولدی
.
.
بیر ظلم ایله دی حرمله دنیا دلی یاندی
اوخلاندی بالام ظلمیله گل قانه بویاندی
یاتموشدی باجی اللریم اوستونده اویاندی
اوخ حلقین ایدوب گل کیمی خندان بالام ئولدی
.
.
یوز دوتدوم او قومه دیدیم ای قوم ستمگر
اوچ گوندی سوسوزدان یانوری نسل پیمبر
دوشموش چوخورا علت اودور خردا بو گوزلر
سؤ ویرمه دیلر فرقۀ عدوان بالام ئولدی
.
.
کیم بیله پوزار حرمتین عزتلی قوناقین
مهمانی قالا تشنه أمه خشک دوداقین
اوخ دگدی بالام قوش کیمی چالدی ال ایاقین
ظلمونده ایدوب حرمله طغیان بالام ئولدی
.
.
باخدوم بالاما حسرتیله گوز یاشیم آخدی
یاندیردی منی محنتی عالملری یاخدی
اوخ دگدی گوزون آچدی بالام بیر منه باخدى
اولدی یوخودان اوندا هراسان بالام ئولدی
.
.
دوشموشدی بالام سوز عطشدن ایله دلدن
رنگی سارالوب سولموشدی هر ساری گلدن
آلدى بالامی دست جفا ظلمیله الدن
جان ویردی الیمده مه تابان بالام ئولدی
.
.
هیچ کیم بالامی اولمادی الدن منیم آلسون
جبرانی بونون قومه دیدوم محشره قالسون
یورقون بالاسین ویر آنا گهواریه سالسون
چوخ سعی ایله دیم اولمادی درمان بالام ئولدی
.
.
حلقیندن آخان قانینه گوز یاشینی قاتدی
اولدوز کیمی آغلار او گوزل گوزلری باتدی
زینب دی ربابه دیمه لای لای داخی یاتدی
بیرده گتیمز سو آدی عطشان بالام ئولدی
.
.
آیینه کیمی حالی عیان اولدی گوزومده
وار قاندان علامت باجی جان قانلو یوزومده
اوخ اصغره دگدی یارالاندوم من اوزمده
آرامین آلوب زھریلی پیکان بالام ئولدی
.
.
اود سالدى شقی حرمله بو ملک جهانه
اوچ شعبه لی پیکانه بالام اولدی نشانه
باتدی بالامون لاله کیمی یوز گوزی قانه
قاتل بالاما اولدی بو عدوان بالام ئولدی
.
.
یالقوز یارالی گور نجه درد و غمه باتدوم
گوز یاشیمی من اصغریمون قانینه قاتدوم
دوتدوم او قانی اوجوما گوی سمتینه آتدوم
شاهد دئدیم اول خالق سبحان بالام ئولدی
.
.
ایفای وظیفه منی ایتدی داخی وادار
منضم ایلدیم شعرلره بیر نچه اشعار
تا (صدریدن) اولسون قالان اشعاریده آثار
مطلعده یازوب (رهبری) عطشان بالام ئولدی
.
.
.
#اصغریه_رهبری_تبریزی
#اصغریه_شهادت
#گل_زینب_الیم_اوسته_لب_عطشان_بالام_ئولدی
#ترکی
.
#زبدةالاشعار
.
: @nohe_torki
نظر دهید