گینه یالقوز امامون یاسی گلدی #ورود_محرم_کریمی_مراغه_ای

ورود ماه محرم
.
کریمی مراغه ای
.
گینه یالقوز امامون یاسی گلدی
حسینون یوم عاشورا سی گلدی
.
.
آچیلدی تکیه لرده قاره پرچم
قورولدی هر طرفده بزم ماتم
طلوع ائتمیش مگر ماه محرم
دمادم موجه غم دریاسی گلدی
.
.
حسینی لر گیوب ماتم لباسی
عروسین قانه دوندی طوی حناسی
جوانلار گیدیلر اکبر قراسی
قولاقه لیلی واویلاسی گلدی
.
.
بو آیدا سو بهاسین قان یازوبلار
کتاب ظلمه چوخ عنوان یازوبلار
امامون قتلنه فرمان یازوبلار
حسینون قتلنون فتواسی گلدی
.
.
بو آیدا اوخلانوب شش ماهه اصغر
بو آیدا دوغرانوب شهزاده اکبر
ملک لر سسلدی الله اکبر
اودیکه یاننه لیلاسی گلدی
.
.
بو آیدا یخدیلار عباسی آتدان
وئروب بیر جوت قولون بیر مشگه قربان
دیردی یول ویرون ای قوم عدوان
حسینون تشنه لب سقاسی گلدی
.
.
قویوبلار قاسمه بیر طوی بناسین
سریه ایسلادوب قاندان حناسین
بیچوب خنجر تیکوب اوخ طوی لباسین
عروسین محنت عظماسی گلدی
.
.
حسین جان اوسته دی آلقان ایچینده
وجودی گیزلنوب پیکان ایچینده
گورنده زینبی عدوان ایچینده
حزین صوتیله وا اُختاسی گلدی
.
.
نجفدن باش آچوخ ساقی کوثر
بهشت عدندن جدی پیمبر
بقیعدن مجتبی زار و مکدر
الینده ساچلاری زهراسی گلدی
.
.
قوشوندان آیریلوب شمر ستمگر
نه ظلم ائتدی آچوب باشین پیمبر
جدادن سس گلوب الله اکبر
بنات حیدرین غوغاسی گلدی
.
.
اسوبدی قاره یللر گون دوتولدی
حسین قتله یتشدی ایش قوتولدی
ئولوبدور باغبان گلشن پوزولدی
اسارت طرحنون طغراسی گلدی
.
.
کریمی مسئلت ایلر خدادن
امیدین کسمه سین آل عبادن
گیدنده قبره بو دار فنادن
گوره بالینینه مولاسی گلدی
.
.
#ورود_محرم #کریمی_مراغه_ای #ترکی #زبدةالاشعار