کوفه
..
..
حاج ناصر تبسمی اردبیلی
..
..
یازورام بیر خبر الده گوزل عنوانیم وار
طالب فیض اولا کیم تحفۀ شایانیم وار
..
آی حسین عاشقی ثابت قدم اول عشقونده
آند اولا خالقه دوز عشقدی برهانیم وار
..
..
چوخدی تاریخده بو مطلبه دایر مدرک
معترفدی آقامون لطفینه هر با مسلک
اسم اعظم آدی ، اوصاف پسندیده ده تک
بابا والله بو حسینون کرمی دریادور
قولاق آس گور نئجه محبوب حق یکتادور
..
..
بیر روایتدی ائدیب صاحب مفتاح رقم
اوخودوم ذوقه گتیردی منی بو اهل قلم
سعۀ واسعۀ رأفت ارباب کرم
پنجم پنج تنون رحمت بی پایانی
ایکی دنیا اولاجاق دردمیزون درمانی
..
..
سبط احمد شهدا شاهی قتیل العبره
دشمن و دوست دوشن وقتده مهلک خطره
چاغریب دادینه هر کیمسه چاتیبدی ثمره
بلی هر مشکلی حلّ ائتمگه قادردی حسین
زنده دی هاردا آدی ذکر اولا حاضردی حسین
..
..
ئولمیوب زنده دی جاویدیدی اون دورد معصوم
وار بو مخصوصده چوخ دهرده دُرّ منظوم
اهلنه مسئله روشندی مدلّل معلوم
اگر ئولسیدی حسین نعشی اذان وئرمزدی
داش دگوب نیزه ده باشی تزه قان وئرمزدی
..
..
قانی یثربده یهودیّه شفا وئرمزدی
جنگل هندده سلطانه صدا وئرمزدی
شیعیه حشره کیمین عشق عزا وئرمزدی
جوشه بو قانلاری گلمزدی محرّملرده
آدی مظلوم یازیلمازدی پرچملرده
..
..
طول عمرینده چوخ اعجازیله رجحان آپاریب
سنگ خارانی سودان اوتری احبّانه یاریب
کوفه نون اهلنی دورد دفعه عطشدن قوتاریب
اولسا توفیق بیرین شرح وئریم اجمالی
روشن اولسون آقامون بارقۀ اجلالی
..
..
جنگ صفّینده اردوی طرفدار علی
ویردیلار خیمه بیابانده انصار علی
استراحت ایلیه خسته هوادار علی
بیر بیابانیدی لم یزرع و بی آب و علف
تشنه صحرا ، ائلیوب شدّت گرمادن تَف
..
..
ناقه لر لنگه دوشوب گئتمدی یول خیل فَرَس
مشکل اولدی چکه انسانلارا گرماده نَفَس
زندگی ایلمگه ئولدی اورکلرده هوس
گلدیلر حیدر کرّار علی محضرینه
دئدیلر چاره قیل عطشانلارین اشک ترینه
..
..
از قضا بر حسب حُسن تصادف نورین
آتاسی حیدره همراهدی یولدا حسنین
دئدی دور گل بالا آی گوزلریمون نوری حسین
قوریب دیللر آغزلاردا قشون عطشاندی
سو مهیّا ایله لشکر سوسوزیندان یاندی
..
..
مرتضی چونکی امامیدی خبیر اسرار
واقفیدی نقدر باشدا حسینون غمی وار
یارالی باشینی بو کوفه لی بیر گون داشلار
اودی تکلیف ایلدی اوغلی حسینه بو سوزی
اوتانا کوفه نون اشراری او گون گورسه گوزی
..
..
قویدی اجرایه آتا امرینی بی وقفه بالا
اوینادوردی بیر آقاج الده حسین مثل عصا
اونی آتدی یره موسی کیمی سسلندی خدا
من حسینم نوۀ پاک رسول اللّهم
مرتضی اوغلی اوزوم در صف آل اللّهم
..
..
ای یاران سینۀ احجاری بیابانلاردا
حفظ ائدن ایسته دگین موجلی طوفانلاردا
آه سوزان یارادان سینۀ انسانلاردا
سینه سیندن آنامون جاری اولان قانه گوره
شب معراج حضورونده کی مهمانه گوره
..
..
در و دیوار آرا زهرانون آچلمیش باشینا
زینبون ناله سینه گوزدن آخان قان یاشینا
شیشۀ عمریمی قویما دگه حرمان داشینا
قویما بو بندۀ نالانی فلک سیندیرسون
بابامون قلبینی غم شعله چکیب یاندیرسون
..
..
باب حاجت تانیور خلق منی دنیاده
قاپیما گور نقدر تشنه گلیب افتاده
شرمسار ائتمه اولاردان منی بو صحراده
بو چولی لطف ایله غرق نعم یار اولسون
جنّتٌ تجریه من تحت الانهار اولسون
..
..
عاشقون سوزلری معشوقده تئز قویدی اثر
او آقاج کی یره آتمیشدی وئریب فوری ثمر
شاخ و برگ آچدی نموّ ایلدی گتدی گُل تر
ایله وسعتده یایلدی او چولون داغ داشینا
سایه سالدی اولارین چتر مثالی باشینا
..
..
یایلیب عطری چوله تاپدی طراوت شجری
آسلانیب خول بوداقیندان عسلی میوه لری
ییون احسان حسین گوگده دیور حور و پری
شجر طیّبه کی ایلدی اردونی محیط
آچدی بیر چشمه جوارینده خدای حضرات
..
..
نجه بیر چشمه اونی وصف ائده عاجزدی قلم
غبطه ایلوردی او شیرین سوا آب زمزم
تشنه لر ایچدی وئریب جان اولارا عیسی دم
آلشان سینه لره جمله دوا ایلدیلر
بانی خیری خلوصیله دعا ایلدیلر
..
..
الغرض جیش یدالله تاپیب آسایش
سو ایچیب سایه ده احساس ایلدی آرامش
سینه لر مهر حسینیله اولوب آرایش
یا حسین سسلدیلر هامّوسی اللهُ معک
مزدینه خدمتوون گَل اَل ایاقوندن اؤپَک
..
..
بو محبّت دئدیلر شعله سی خاموش اولماز
عمرمیز هر نقدر اولسا فراموش اولماز
سنسیز هئچ آب گوارانی بیزه نوش اولماز
گورمسین سایوی چوخ باشیمزه ربّ جلی
بیزده جبران ائدروک بیر گونی بو خیر عملی
..
..
سوسوزیندان هامی ئولموشدی بیزه جان وئردون
سن بو دنیاده او دنیا سوئی احسان وئردون
درس حفظ ادب حرمت مهمان وئردون
قسمت اولسون گذرون کوفیه ای کاش دوشه
پیشواز ایلروک اجلالیله گلّوک گوروشه
..
..
آرزو کی ایلمیشدی یتشیب کوفه لیلر
دولانیب ئیللر همان شهره حسین سالدی گذر
نجه سالدی گذر امّا ایله ای شیعه نظر
یارالی باشی جداده کوله قانه بَلَشیب
آدی مهماندی ولی نیزه لر اوستونده گلیب
..
..
موکبی نیزه دی گویا دولانور آی پاراسی
قارشیب بیر بیرینه گوزلرینون آغ قاراسی
سجده گاهینده هویدادی بویوک داش یاراسی
فاطمه گلشنینه باد مخالف اسیلیب
اون ایکی ضربتیله باشی قفادن کسیلیب
..
..
بیر نفر اولمادی قاضی ایلسون وجدانی
یادینه سالسون او صُفینده کی بحرانی
دشت بی آبیده سو جاری ائدن مولانی
دیه آی مسند حقّه چیخادان اوباشی
بویمیش پس سیزی سیراب ائده نون پاداشی
..
..
چکدیریب جار عبیدالله بی شرم و حیا
هامی فاخر گینوب اللرینه یاخسون حنا
پیشوازه چیخون اللرده ولی سنگ جفا
یارالی باشلاری گوردوقجه گرک داش ویراسوز
هر باجی سسلسه امدادینه قارداش ویراسوز
..
..
باغلانیب بیر ایپه هشتاده یوخون عورت اوشاق
واردی اوچ سنّیدن اللی بشه جن طاقتی طاق
قارداشی اوغلی ئولنلردی گرفتار فراق
فاطمه قیزلاریدی عاریه دنیادن سیر
قولّاری باغلیدی عریان دوه لر اوسته اسیر
..
..
قلبلر نار مصیباتیدن اولموشدی کباب
کاسة چشمده گوزیاشلاری ویرمیشدی حُباب
شیرخواره بالاسین سسلیوب آغلاردی رباب
هره ئوز دلبرینی یاده سالیب اوخشاردی
اولارین حالینه یورقون دوه لر آغلاردی
..
..
بیری اوخشاردی باباسین بیریسی قارداشین
سوزه گلمور دیلی بعضی آخیدور گوزیاشین
اللرین پوشش ائدیب چوخلاری اورتسون باشین
دیَن اولمادی بولار عرش عفاف اولدوزیدی
هاموسی فاطمه مظهردی پیمبر قیزیدی
..
..
گوردی شه دشمن دین خارجی آد قویدی اونا
بو بهانیله دوشر مشکله بیلدی اُسرا
فوری کهف آیه سینی باشلادی شاه شهدا
دوشونه خلق اولار وارث پیغمبردی
نیده قرآن اوخیان رأس شه محشردی
..
..
جان تاپیب زینب حسینون دل بیداریندن
سس قوشوب قارداشنا غصّۀ سرشاریندن
اشک حسرت اله دی دیدۀ خونباریندن
غم یمه سویلدی پیکارده تنهادی باجون
نفسیم واردی هله دوشمیوب الدن آغاجون
..
..
اوخی سن نیزه ده قرآنی باجون محملده
عطر مخصوص طبیعت یارادیب هر گوُلده
قویمیاخ کشتی دینی سالا لنگر گِلده
باجی قارداش چالیشاخ امّتی بیدار اولسون
داش آتانلار بیزه بلکه اوتانیب خوار اولسون
..
..
زینبم منده علینون قیزیام بی پروا
ابن مرجانه نی بو شهرده قیلّام رسوا
دشمن دینه سلاحیمدی لسان شیوا
اونی تصویره چکر خامۀ مأجور «صفا»
درس عبرت آلا آینده ده نسل طلقا
..
..
قرن لردی آقامون وصفنی امجاد یازار
نه یازیم من اونا کی فضلنی اوتاد یازار
قانین آلله قانی پیغمبر عُباد یازار
بیرین آلله بگنه من نه دیم دنیاده
یازورام نوحه الیمدن یاپیشا عقباده
..
..
آی ولادت گونی معراج ایلین گوگلرده
آی اولان ختم رسولان قزینا پرورده
آی باشی نیزه ده قرآن اوخیان منظرده
وار بویوک منزلتون درگه کرّمناده
جان کنش حالده محشرده یتیش امداده
..
..
#کوفه #تبسمی #ترکی #زبدةالاشعار
نظر دهید