وقایع کوفه
.
#زبدةالاشعار
.
: @nohe_torki
.
مرحوم صافی تبریزی
.
کوفه ده سس دوشدی چون آل شه مردان گلور
زینب کبری اسیر فرقۀ عدوان گلور
.
عترت طاها اولوبدور بستۀ قید جفا
مو پریشان دیده گریان سینه سی سوزان گلور
.
عزّت و شوکتلری الدن گیدوبدور باالتّمام
خاندان عصمت اولموش خانمان ویران گلور
.
آل پیغمبر اسیر دیلم و تاتار تک
بیر بولوک عورت اوشاقدور بی سر و سامان گلور
.
قولّاری باغلی پریشانحال عریان ناقه ده
اهل بیت بیکس سلطان مظلومان گلور
.
صید اولوب صیّاد بی رحمه غزالان حرم
بیر سوری آهو کیمی سرگشته و حیران گلور
.
ناز پرور قیزلارین گل تک سولوب صورتلری
.
ساربانلار خردا قیزلارا ز بس سیلی ووروب
برگ بید آسا اسور اعضالری لرزان گلور
.
بیر سینق محملده بحر عصمتون دردانه سی
دلشکسته دست بسته عابد نالان گلور
.
غرق دریای تحیّر اشک ریزان دلکباب
غم دیزینده باشی دلده ناله و افغان گلور
.
گردنینده قید ایاقلار باغلی قولّاردا طناب
لیک سلم محض او قطب عالم امکان گلور
.
واردی از بس انکساری اگلشنمور ناقه ده
منتهای ضعفیله اول حجت رحمان گلور
.
گوئیا عیسادی غبطیلر ایدوبلر دستگیر
طور سینادن و یا کیم موسی عمران گلور
.
کربلادن کوفیه چوخ چوخ چکوب رنج و تعب
بار درد و غمدن اولموش قامتی چوگان گلور
.
حجة اللهی غلام آسا دیردی هر گورن
مطلقا بازار مصره یوسف کنعان گلور
.
عالمی وار قدرتی پامال ایده بیر لحظه ده
زینب کبری عزیز مریم دوران گلور
.
بی جهت گلمور امام عصر او ویران کوفیه
چون سراغ ایلوب او یرده گوشۀ ویران گلور
.
یا علی یاتما نجفده سنده استقباله گل
عترتون پا دست بسته کوفیه مهمان گلور
.
اهل کوفه مرد و زن چیخمیش تماشایه تمام
الده نای و نی اگنینده کسوت الوان گلور
.
گوئیا بایرامدی جشن ایلور جماعت کف چالور
هر کیمه باخسان گوررسن خرّم و خندان گلور
.
کوچه و بازار بام و غرفه لر مملوّیدی
یاد ایدن وقته او وضعی داده دل هر آن گلور
.
بعضی ایلردی شماتت اهل بیت عصمته
بعضی سویلردی دله هر حرف ناشایان گلور
.
نیزده اما کلام ناطقون قانلی باشی
دمبدم ایلور تلاوت آیۀ قرآن گلور
.
سرّی وار لحن حجازیله اوخور آیات حق
الده چون اثبات حقّه حجّت و برهان گلور
.
لمعه لمعه جلوه گردور صورتنده نور حق
مظهر انوار حیّ خالق سبحان گلور
.
ایلیوب شرق جدادن نیّر اعظم طلوع
لیلۀ دیجوریده یا بیر مه تابان گلور
.
آشکارادور لب لعلینده آثار عطش
تشنه لب اول منبع سرچشمۀ حیوان گلور
.
بیر عجوزه ظلمیله سالدی او باشی نطقدن
باخمادی دلده کلام ایزد منّان گلور
.
طاقتی طاق اولدی زینب ووردی باشین محمله
وجه وجه اللهی گوردی قانینه غلطان گلور
.
سویلدی سندن حسین قالمیشدی زینب ناگران
بو گجه آیا اولوب هاردا باشون مهمان گلور
.
کوللر اوسته یاتموسان یوخسا کول اولسون باشیمه
هانسی بیر باشه بو قدری ظلم بی پایان گلور
.
بیر گجه مندن اگر چه کسموسن سن الفتون
فرقتونده شامه تک باغریم اولوب شان شان گلور
.
نیزه باشوندا باشون گوردوقجا یانّام آغلارام
گوزده موج اشگیم ایلر بحر تک طغیان گلور
.
کاروان عشقه بو یولّاردا سن مهتاب سن
باشون آردینجا دوشوب بیر جمع سرگردان گلور
.
من اوزوم حیرتدیم زینب هارا بو یر هارا؟
جذبۀ عشقون چکور قارداش باجون هر یان گلور
.
بیزلره اهل عداوت آد قویوبدور خارجی
زینبه هرگز بو محنت سن دیمه آسان گلور
.
مسلم جنّاس نقل ایلور واریدیم کوفه ده
اوندا که سس دوشدی آل سرور دوران گلور
.
شهریدن چخدیم نه گوردوم عترت خیرالبشر
دستگیر تابعان آل بوسفیان گلور
.
نیزه لر الده قاباقدا نیزه داران صف به صف
هر بیری آلمیش اله بیر دانۀ رمّان گلور
.
شاهزاده اکبرین قانلی باشی بیر نیزه ده
سنبل زلفی اولوبدور گل یوزه افشان گلور
.
مه جبیننده عیاندور آیت شق القمر
زخم فرقی قان ویرور چون لالۀ نعمان گلور
.
قاسم تازه جواندور قاتلی الده باشی
نیزه ده گوئیا که بیر دسته گل ریحان گلور
.
ایلدیم احساس او باشین صاحبی داماددور
ظلمیله اما اولوبدور طوی حناسی قان گلور
.
نسگله سیر ایلیون داماد باشی نیزه ده
نو عروسی ناقه اوسته دیده سی گریان گلور
.
صود امر اصغر باشیندا بی مروّت حرمله
ایلیوب زیب جدا چون غنچۀ خندان گلور
.
دویمیوب اول سنگدل بی رحم ظالم ظلمدن
حلقینی ایلیوب نشان چون ناوک پیکان گلور
.
الغرض راوی دیور گوردوم جداده باشلاری
هر بیری ایلور جداده گون کیمی جولان گلور
.
بیر باشی اما سالوبدور بیر لعین اوزگه یره
قویمیوب اصلا جفاسینده او گون نقصان گلور
.
ظلمیله ماه بنی هاشم اولوبدور منخسف
گزلنوب گویا بودور انظاریدن پنهان گلور
.
بیلدیم عبّاس دلاوردور او باشین صاحبی
ظاهراً سقّادی اما باطناً عطشان گلور
.
سال او وقتی یادیوه قولاری باغلی اهل بیت
مجلس ابن زیاده خائف و لرزان گلور
.
ابن مرجانه او گون ویرمیشدی خلقه اذن عام
عالمه حاشا بیله بیر نطفۀ شیطان گلور
.
ساخلا ال «صافی» دایان یازما او بزمین شرحینی
باخما مشگ چشم دولموش چون یم عمّان گلور
#کوفه_صافی_تبریزی
#کوفه_ده_سس_دوشدی_چون_آل_شه_مردان_گلور
#ترکی
.
#زبدةالاشعار
.
: @nohe_torki
نظر دهید