شب عاشورا
..
..
مرحوم سعدی زمان
..
یاد ایله گوگل لیلۀ عاشور حسینی
یان شمع کیمی عالمه سال شور حسینی
..
..
پروانه تک عشق آتشینه یان نه که یان دور
غم شمعی کیمی اوز شرر آهوى یاندور
مدّ نظرونله او شهنشاهی دولاندور
گور دشت بلانی بوریوب نور حسینی
..
..
انوار جمال الله اولوب ایله هویدا
خورشید درخشنده دی گویا شب یلدا
ارنی دیمز اول دشته گذر ایلسه موسی
لن نکته سینی واضح ایدر طور حسینی
..
..
اوردو داغلوبدور پوزولوب نظم و نظامی
بیر جمع وفادار آلوب دور امامی
پوزقوندى اوز احوالی قیامتدی خیامی
اطفالی بُلور صبحده منظور حسینی
..
..
لیلانی ایدوب اکبرین عشقی ایله مجنون
گوردوقجا قد سروین اولور حالی دگرگون
قانه باتاجاقدور بلور اول قامت موزون
دشمنلری مقتول ایده جاق پور حسینی
..
..
سویلور اى اولان ثالث قربان محبت
اوز جدّینه ذبحی و فدینائیله عزّت
اگلش یره هاجر کیمی ایلوم سنه زینت
فخر ایله خلیله اوخی منشور حسینی
..
..
قاسم آناسی اوغلونا باخدوقجا چکور داد
داماد اولاجاقدور بُلوری قاسم ناشاد
اما یاخاجاقدور اله قان طوی گونی داماد
مشهور اولاجاق نکتۀ مستور حسینی
..
..
اللرده سو جامی بالا قیزلار دولانولّار
گاهی دولانوب خیمه لرى گه دایانولّار
بیر نوع حرملر یانار اودلاره یا نولّار
گویا گذر اعرافه سالوب حور حسینی
..
..
سوز عطشندن یانوری اصغر نالان
بنزور پوزولان گلشنه اول غنچۀ خندان
بیچاره رباب آغلور ایدور ناله وافنان
بو غصه پوزوب عترت رنجور حسینی
..
..
زلف سر اکبر کیمین آشفته دور عباس
شمشیره ویرور صیقل اؤزی لیک دوتوب یاس
نه ظلم ایده جاق زینبه اعدا ایدوب احساس
باشه یتیشنده غم مزبور حسینی
..
..
صبح اولسا حسینه تاپار ال فرقۀ اعدا
باشی کسیلر باشه وورار زینب کبری
فریاد اوغول وای سالار عالملره زهرا
قان ایچره گورر سینۀ مکسور حسینی
..
..
«سعدیّ زمان» اشگیله سرشار ایدوب عینی
وار عشقی حسینه اوجالوب شیون وشینی
قسمت اولا آغوشه آلا قبر حسینی
واللهی بودور قلبده منظور حسینی
..
..
#شب_عاشورا #سعدی_زمان #کنزالحسینی2 #ترکی #زبدةالاشعار
نظر دهید