بو نه شور و نه غوغا دور که عالم اوزگه عالمدور #ورود_محرم_شوری_تبریزی

ماه محرم
..
..
..
مرحوم میر محمود آقا شوری تبریزی
..
..
..
بو نه شور و نه غوغا دور که عالم اوزگه عالمدور
دگوبدور بیر بیره عالم مگر ماه محرمدور
..
او دل لر که اولاردا حب اولاد علی واردور
پریشان حالدور رنگی سولوبدور چشمی پر نمدور
..
عزاخانه اولوب یرلر چکوبلر گوگلره قاره
حسین وای ناله سیندن کون و امکان نظمی برهمدور
..
حسین عاشقلری محزون اولوب مبهوت و حیراندور
بئله معلوم اولور یاران بو آی ماه محرمدور
..
اولاندا غرّۀ ماه محرم امر ایدر خالق
یارالی کوینگی عرشه آسون اخباری محکمدور
..
حسینه من عزادارم چکون سیز عرشیمه قاره
اولان لایق عزاخانه حسینه عرش اعظمدور
..
مقرّبلر دوتوب ماتم ملک لر سس چکر آغلار
تماماً انبیا غرق ملال محنت و غمدور
..
دیللر باش آچوب زهرا دیر ایوای حسینیم وای
عزاداری بو مظلومون رسول الله اکرمدور
..
اولوب ماتم سرا عالم حسینه سر بسر آغلار
گوز آچ ایدل تماشا قیل بو ماتم گور نه ماتمدور
..
آتاسی حیدر و صفدر قالوبدور بوینی چگننده
بالاسی مهدی دوران گوزی اشگیله پر نمدور
..
هر ایل بو کوینکی اون گون ایدللر عرشه آویزان
اودور علّت دونر قانه اورکلر بو مسلّمدور
..
بو آیدا هیچ بولورسوز نه اولوب دشت بلا ایچره
قزلقانه باتان یکسر جوانان معظّمدور
..
یارالی تشنه جان ویردی جوانان بنی هاشم
اولاردان اکثری اما خانم زهرایه محرمدور
..
او محرملر که عرض ایتدیم هاموسی اوز بالاسیدور
ولیکن من بئله بولم ابوالفضلی مقدّمدور
..
کسوب سو یولارین دشمن قالوب آل على عطشان
سوسوزدان هاشمیّه قزلارین احوالی برهمدور
..
بیری غشّ ایلیوب، سویلر بیری عبّاس عمو یاندیم
منی سیراب ایدن اما بیری سویلردی عمّه مدور
..
حسینون ظلمیلن نظم و نظامین پوزدی کافرلر
عمر سعدین ولیکن لشگری خیلی منظمدور
..
یتوبدور تک به تک قتله حسینون یار و انصاری
حضور شاه مظلوماندا ایمدی جمله باهمدور
..
ویروبدى سعد وقاص اوغلی عاشورا گونی بیر اود
نلر یاندی دیمم اما یانان ظلمیله مخیمدور
..
او زهرا بسلین یاران حسینه لشگر اعدا
او قدر ویردیلار یاره یارا اوستونده مدغمدور
..
سویوبلار اهل بیت مصطفانی قوم بد فطرت
نه نحویله دیه بولمم دلیم بو یرده ملجمدور
..
ولی اول بینوالر ظلمیله قولاری باغلاندی
او باعصمت خانملار گور اسیر قوم مظلمدور
..
نجه غارت ایدوبلر بولماخ اولماز بیر بولور الله
نه طرزیلندی بولمم من ولی اخباری مبهدور
..
مصائب هر نه قدر اولسا هاموسون چون گوروب زینب
بو قدر ظلم بیحدّه دؤزن علیا مکرّمدور
..
حسینه «شوریا» یاخشی بو آیدا سن عزادار اول
بولونسون جدّیوه باغلی بئلون دنیاده محکمدور
..
..
..
#ورود_محرم #شوری_تبریزی #ترکی #زبدةالاشعار