یولا سالاندا جوانین شهید عشق الاه #اکبریه_حقیر_خویی

وداع حضرت علی اکبر علیه السلام
.
زبدة الاشعار

?: @nohe_torki
.
مرحوم میرزا عبدالوهاب حقیر خوئی
.
یولا سالاندا جوانین شهید عشق الاه
کمال حسرتیله آردیجا ایدردی نگاه
.
.
یاناردی اول شه عطشان شرار نسگلیله
خطاب ایدردی سپاه جفایه بو دلیله
.
.
«شاه بیت»:
.
اکبر گلوری اهل جفایه خبر اولسون
آماده اونون قتلنه قوم کفر اولسون
.
.
گتدیم بو جگر گوشه می قربانگه عشقه
آماده دی باش ویرماقا راه شه عشقه
لابدّ اولان مرحله پیما ره عشقه
هر باره ده تسلیم قضا و قدر اولسون
.
.
ای فرقه بی رحم گورورسوز بو جوانی
کیم مصر ملاحتده بو دور یوسف ثانی
انصافیدی بو سلسله مُشک فشانی
آغشته خون , ظلمله چون مشک تر اولسون
.
.
ای قوم بودور عزت پیغمبره دلبند
لیلایه اوغول زینبه همدم منه فرزند
گر قانه باتا زلفی علی باشینه سوگند
الحق یری وار آل علی خونجگر اولسون
.
.
دریای تجلاده زبس غرقیدی نوره
بی پرده گلور نور خدا بوندا ظهوره
تشبیه اولور نخل سنان نخله ی طوره
گر نوک جدا اوزری یوزی جلوه گر اولسون
.
.
خورشید رسالتده اولان معجز و آیات
مرآت جمالوندا سالوب عکسی ظهورات
حق کلمه سی اولماز سوزیله باطله اثبات
تا الده مگر معجز خیر البشر اولسون
.
.
آی پارچاسی تک جلوه لنوب عارض آلی
خونین شفقیله دوتولور بدر جمالی
انگشت نما چون مه نو نوک هلالی
آنّندا عیان معجز شق القمر اولسون
.
.
میدان شهادتده تیکوبدور یره بیدق
بو عشق بساطینده ویروب عشقیله رونق
فرق اولمیه حیدر کیمی فرقی اولا منشق
اکبرده علینون اثری فرق سر اولسون
.
.
قربان ره عشقیدی ایتموش قلم نور
آننّدا فدیناه بذبح آیه سی مسطور
نه فایده وار , دیده کوته نظران کور
ایستر گوره هر کیم گرک اهل نظر اولاسون
.
.
هر چند تمناسی شهادتدی نظرده
باشی کسیله تشنه ویره جان قوری یرده
نه رحم و مروتدی گورون قوم کفرده
بیر تازه جوان قاتلی یوز مین نفر اولسون
.
.
آماده سیز الده کیمی خنجر , کیمی شمشیر
خنجر یرینه نصب ایده سیز سینه سینه تیر
بالله دل لیلاده ایدر سوزشی تاثیر
هر زخم که گل پیکرینه کارگر اولسون
.
.
عمریله (حقیرا) ووراسان دفتره خامه
سوز آخره یتمز یتشور عمر تمامه
وار اهل نظر دیده سی تاثیر کلامه
سوزدن اثر ایستللّه ولو مختصر اولسون
.
.
#سبک_ای_باد_صبا
.
#اکبریه_شهادت
#یولا_سالاندا_جوانین_شهید_عشق_الاه
#اکبر_گلوری_اهل_جفایه_خبر_اولسون
#حقیر_خویی
#ترکی
.
زبدة الاشعار

?: @nohe_torki