همیشه عشقیله هجرانه انفصال اولماز #اکبریه_شانی_تبریزی

حالات حضرت علی اکبر (ع)
..
..
مرحوم شانی تبریزی
..
..
همیشه عشقیله هجرانه انفصال اولماز
وصاله نایل اولان طالب وصال اولماز
..
علاقه کسمین عالمده قید الفتدن
طریق اهل محبّتده اهل حال اولماز
..
عَبَثدی اهل ولایه محبّت دنیا
حقیقی عاشق اولان بندِ مُلک و مال اولماز
..
محبّت اهلی سن ای دل اوتورما غفلتیله
بو قدر اهل محبّتده اغتفال اولماز
..
توک اشک حسرتی یول سال نگار محفلینه
نشانه اولماسا عاشقده اشگ آل اولماز
..
حسینون اکبرینه باخ محبّتی اورگش
ایله محبّ خداوند ذوالجلال اولماز
..
آتادان إذن آلوب ایلور وداع ئوز آناسین
ایله وداع ایله بیر پُر ملال حال اولماز
..
بولوردی گیتسه اولور راه حقّده قربان
آناسی ایتمه سه گر حقّینی حلال اولماز
..
ایله توکور گوزونون یاشین حسرتیله آنا
بهار فصلی بولوددا او اتّصال اولماز
..
گینه بونیله ال اوزدی ایله جوانیندن
که هئچ آناده ایله حبّ لا یزال اولماز
..
غم فراقی مؤثّر بولوب ئوزی گیتدی
بولوب آناسینا بیر ئوزگه اشتغال اولماز
..
اولاندا جلوه نما جلوۀ جمال على
قوشون دیردی بشرده بیله جمال اولماز
..
دیردیلر که پری دور بشرده بیله یقین
بو صورت و بو وجاهت بو خطّ و خال اولماز
..
و یا گلوبدی پیمبر حسینه امداده
اونیله امّت اولان طالب قتال اولماز
..
گوروب بو شورشی وقّاص زاده لشکرده
دیدی جَدَلده بو شورش بو قیل و قال اولماز
..
دگول بو احمد مُرسل اونا شباهتی وار
مگر بشر بشره صورتاً مثال اولماز
..
حسینون اوغلیدی بو نوجوان مه سیما
بو قتله یتسه حسین قادر قتال اولماز
..
دوشر قلنجی الیندن اولار خمیده قدی
بو غمده سرو قدی گور مثال دال اولماز
..
تانیتدی یوسف مصر وفانی سعد اوغلی
اگر چه حُسنده یوسف اونا مثال اولماز
..
جفا کمندی قورولموشدی هر طرفده نجه
ایله کمند شکاری ایله غزال اولماز
..
اگر چه قیردی قوشون پهلوانلار ئولدوردی
ولی او شرحه بو بیر جمله ده مجال اولماز
..
بویاندی قانینه گیدی لباس عزّ و شرف
بیله جلالت و عزّت بیله جلال اولماز
..
دولاندیروب یوزینی خمیه گاهه حسرتیله
ایله جوان مؤدّب اولار محال اولماز
..
باخوب آتاسینا سویلوب علیک منی سلام
که یعنی رسم ادب کلمۀ تعال اولماز(1)
..
سو جامی الده گلوب باشی اوسته پیغمبر
غم ایلمه بیله خوش حالت ایله حال اولماز
..
شه آلدى خیمه ده شهزاده نون سسون گلدی
نه حالیله نجه بو نطق بوردا لال اولماز
..
وقار معدنی شه رزمگه دولی دشمن
بو یرده لنگ نجه توسن خیال اولماز
..
ئوزون آتا یره آتدان دیزی دیزی سورونه
ندن بوعالم ایجاد پایمال اولماز
..
جوان اوغول باشین آلدی قوجا آتا دیزینه
گوروب حیاتینه قالماقه احتمال اولماز
..
اگیلدی قویدی یوزون شاهزاده نین یوزونه
الف قدی نجه گور مثل حرف دال اولماز
..
او آق محاسینی نی قانیله خضاب ایلدی
ایله خضاب ایله عالی رنگ آل اولماز
..
باسوب اوغول باشینی اودلانان اورگ باشینا
گوروب او شعله بو قیمتله اعتدال اولماز
..
اوجا سسیله دیدی یدّی دفعه وا ولدا
بو ناله نون سبب سرّینه سئوال اولماز
..
ایله جوانی ألیندن گیدن آتا، آیا
وقارینی وئروب الدن فشرده حال اولماز
..
دیدی سن اولدون على همّ و غمدن آزاد
اورکده سن گیده سن محنت و ملال اولماز
..
ولیک قالدی آتان دشمن ایچره فرد و وحید
هدایت حقّه طرف لشکر ضلال اولماز
..
آتا بالانی چوخ ایستردی بیر دانشدیرسون
گوروب ولیک اوغول قادر مقال اولماز
..
یغوب عبایه داغیلموش جنازه سین، گوردی
جنازه ئوزگه طریقیله انتقال اولماز
..
دیدی جوانلارا اکبر جنازه سین گوتورون
بیله بیر امره مگر فوراً امتثال اولماز
..
حَرَمده سس دوشوب اکبر جنازه سی گلدی
آناسی لیلیده گور حال ارتحال اولماز
..
آناسی دوزدی ولی چخدی عمه سی حیران
اگر چه عصمت حق، نظر رجال اولماز
..
امام گوردی حیا سدّ راه لیلادی
دیدی بو مرحله ده شرم و انفعال اولماز
..
اوغول جنازه سی اوسته آناسی اوخشاماسا
عزانون عزّتینه نقص اولار کمال اولماز
..
ستاره تک گوره مه پیکر اوغلونون یوزونی
آنا قدی نجه گور ضعفین هلال اولماز
..
دیدی که ای فلک حُسنده ایشیقلی گونوم
نه تئز غروب ایلدون بیله تئز زوال اولماز
..
نجه زمانه ده عمروم گولی گولر سن سیز
که باغ عمریمه سندن صورا نهال اولماز
..
بو فخر بسدی که یتدی قبوله قربانیم
مگر بو فخره عوض رنج ماه و سال اولماز
..
توجه اولماسا اول شاهزاده دن «شأنی»
ضعیف جسمده بو نطق و بو مقال اولماز
..
..
(1)تعال : بیا
..
..
#اکبریه #شانی_تبربزی #ترکی #زبدةالاشعار #اکبریه_شهادت